Виктор Петрович ИГНАТОВ — «Кулöмдiн» овмöдчöминса администрацияöн веськöдлысь:

• Воыс юрсиктлы вöлi зэв тöдчанаöн. Августын воссис лыжероллерöн котраланiн, декабрын лыжи сеталанiн. В.С.Лодыгин нима улича вылын вöчисны туй. Ленинлöн улича вылын нюжöдiсны канализация визь да уна патераа öкмыс керкаысь олысьяс йитчисны нин сэтчö, мукöд керкаяс йитчасны локтан воын. Эштöдiсны шöр школалысь кыпöдöм торъя юкöн, кытчö ичöт класса велöдчысьяс пырасны локтан велöдчан воын.
  Выльмöдiм В.И.Ленинлы пас, восьтiм гозйöдчысьяслы эрд, югзьöдiм Солнечнöй улича. Сбербанк водзын лöсьöдiм машинаяслы сувтланiн, югзьöдiм, мичмöдiм тышъясын усьöмъясöс казьтылан пас гöгöр, выльмöдiм райадминистрация сайысь челядьлы ворсанiн. Асшöр уджалысь кыпöдiс кулöмъяскöд колльöдчан жыр, коррекционнöй школа весьтсянь катыдлань вöчисны подаяслы 120 метра кузьта ветланiн. Локтан воын урчитiм Ручейная улича вылын вöчны 200 метра кузьта туй, нюжöдны сы кузьта жö ва визь, аптекалöн важ керка весьтсянь шылада школаöдз вöчны пу пос.

Валентина Петровна НЕСТЕРЕНКО — Кулöмдiнса олöма йöзлöн котырöн юрнуöдысь:

• Öнi эм кöнi чукöртчыны юрсиктса олöма йöзлы. «Кулöмдiн» овмöдчöминса администрация «Парма гор» газет редакциялöн керкаын вичмöдiс кык жыр, öтиыс «Кузь нэм» котырö пырысьяслы да сэтысь «Гöрд гвоздика» котырса сьылысьяслы, мöдыс «Дзоньвидзалунлы» да «Надеждаын» сьылысьяслы. Асьным шпалеритiм, мавтiм джоджъяс. Танi кутам öта-мöдлысь мыйöкö да велöдчыны, аддзысьлыны мукöд сиктпосёлокъясса олöмаяслöн котыръяскöд, нимöдны тшупöда пасаясöс. Татчö ваям асланым олöм-водзмöстчöм йылысь лöсьöдöм альбомъяс, снимокъяс, гижöдъяс. Кутам видзны сöстöма, ковмас кö, дзоньтавны. Тайö миянлы зэв бур козин.

Надежда Ивановна ИГНАТОВА — Немдiнса ань:

• Нимкодь, мый таво миян сиктын вужвыйöн дзоньталiсны дзик нин шогмытöм туй. Вужвыйöн дзоньталiсны и Дон сайса туй, кытi ми воöдчам юрсиктö да мукöдлаö. Öнi Немдiнын лöсьöдöны Теле-2 операторлысь йитöд. Сиктын кыпöдiсны выль школа, клуб. Эмöсь сад да вузасянiнъяс. Колöны содтöд уджаланiнъяс, сэки, чайта, томъяс оз пышйыны бур олöм корсьöм могысь бокиö, а велöдчöм бöрын бергöдчасны чужанiнö.

Татьяна Владимировна УЛЯШЕВА — «Помöсдiн» кооперативлöн правлениеöн веськöдлысь:

• Таво Помöсдiнса совхозлы котыртчöмсяньыс тырис 50 во. Такöд йитöдын петiс овмöсын уджалысьяслöн казьтылöмъяса книга. Аттьö Николай Александрович Лютоевлы, кодi отсалiс лэдзны сiйöс. Гижисны асьныс воддза да öнiя уджалысьяс — совхозса вöвлöм директор Владимир Анатольевич Рогожников, зоотехник Елизавета Михайловна Игнатова, йöлысь вöлöга вöчанiнöн веськöдлысь Нина Михайловна Карманова, йöзкöд удж котыртан юкöнысь специалист Лидия Евгеньевна Пыстина, инженер, а сэсся совхозлöн Помöсдiнса юкöнöн веськöдлысь, а öнi Помöсдiнса юралысь Анатолий Егорович Уляшев, олöмаяслöн Вöльдiнса котырöн юрнуöдысь Полина Алексеевна Уляшева да мукöд. Бать-мамныслысь да пöль-пöчьясныслысь уджалöмсö казьтылiсны и челядьныс да внук-внучкаясныс. Ассьыс гижöдъяс содтiс Н.А.Лютоев. Сьöмсö пуктiсны уджалысьяс, йöз, медся уна кооперативлöн правление, сетiс и Госсöветса депутат Владимир Алексеевич Косов. Сьöм чукöртантор лöсьöдлiм асланым лавкаö.
  Воыс вöлi зэв сьöкыд. Скöрöдумса скöт картаын ас кадö эз тырсявны мöсъяс да сэнi йöв чинiс 70 тонна вылö. Сэкжö Помöсдiнын, кöнi бригадиралö Мария Вячеславовна Уляшева да кодöс таво пасйисны видз-му овмöс министерстволöн нимöдан пöв вылö, вевтыртiсны во кежлö урчитöмсö, кольöм вося дас öти тöлысьöн серти содтысисны 31 тонна вылö, быд мöслысь шöркодя лысьтiсны 3442 килограмм. Медся уна, Лидия Васильевна Уляшева, 24 тоннаöн унджык.
  Медся ичöт удждон содтöмöн да донъяс кыпöдöмöн сьöкыда бергöдчим сьöмöн. Но бур, мый видз-му овмöс министерство вöлöга вöчан йöв вылö содтiс субсидия.
  Кольöм воын серти öнi быд лун йöв лысьтöны 400 литрöн унджык. Октябрсянь вайсис 17 мöс, во помöдз нöшта куканясясны 12-öн. Пыр на вузасям выйöн. Во помын ветлiм Мылдiнö, Югыдъягö, вузасям и Кулöмдiнын.
  Эска, мый локтан воын бергöдчам кокньыдджыка. Öнiя да вöвлöм уджалысьясöс чолöмала выль воöн. Ставнысö аттьöала да сиа ён дзоньвидзалун, семьяясын шань да судзсяна олöм.

Надежда Александровна НАПАЛКОВА — том мам:

• Таво воыс вöлi зэв шудаöн. Во джын сайын миян верöскöд öтпырйö чужисны Николай да Максим. Дзик öткодьöсь. Чужöм бöрас, мед эг сорсьы, öтиыслы киас пысавлi весиг кöвтор. Бергöда ставсö ачым, отсасьны волöны Татьяна да Елена ичиньяс, батьöй. Владимир верöскöд пукта став вын да кад, мед миян пиукъяс быдмисны дзоньвидзаöн, шудаöн, аддзисны асьнысö олöмын.

Оксана Анатольевна КУЗНЕЦОВА — челядьлысь енби сöвмöдан районса керкаысь методист:

• Нимкодь, мый таво кыкысь вермим республикаса конкурсын. Первойсö челядьöс гожöмын ёнмöдöмысь. Вичмöм сьöм вылö ньöбим компьютер, ноутбук, принтер да велöдысьяслы коланторъяс. Велöдан министерствоын вылö донъялiсны том инспекторъяскöд удж, мыйысь вичмис 90 сюрс шайт. Туйвывса том инспекторъяскöд матö 10 во уджалö Вера Вячеславовна Потоцкая. Топыд йитöдаöсь ГИБДД-лöн районса юкöнкöд, öтув петалöны туйяс вылö. Юкöн могмöдö техникаöн ылi сикт-посёлокъясö ветлiгöн. Челядь некымын во дорвыв лоисны медбурöн районса конкурсын, ветлiсны и республикаö. Велöдчöны шöр школалöн торъя классын, кодöс восьтлiсны 2015-öд воын. Кутам уджавны водзö, сöвмöдны челядьлысь енби.