Му шар гöгöр

[ A+ ] /[ A- ]

Парчлöн таво тшупöда пас. Сiдзсö сэтчö овмöдчылöмаöсь 1707-öд воын нин, но гижöдъясын казьтывсьö 1719-öд восянь. Грездас вöлöма 3 овмöс, медводдза овмöдчысьясыс Булышев да Попов. Став сертиыс, Немдiн либö Висер вожысь воöмаяс. Сёрнитанногныс тай дзик öти-а. 1782-öд воын грездын вöлi нин 20 овмöс, 152 олысь (73 мужичöй, 80 нывбаба). Вочасöн Парч ыдждiс. Кольöм нэмся 30-öд воясö танi вöлi школа, вузасян котыр. Колхоз дырйи сойборд улас пырис и Лебежнöй грезд, некымын бригадаöн. Вöдитiсны градвыв пуктас, видзисны скöт, весиг порсьясöс, вöвъясöс, но олöмыс тай гудыртчис, öнi сиктсаяс бергöдöны медсясö овмöс, кодсюрö нöшта вöдитчö вöрöн: заптö пес, тшупö срубъяс. 
Парч, мöд ногöн кö, джуджыд кыркöтш йылö Эжва веськыдладорас паськöдчöм сикт, нэмсö нималiс аслас зiль да уджач йöзöн. Кымын механизатор, доярка, кукань видзысь танi орден-медаляöсь. Татысь жö петавлiс тöдса коми гижысь Степан Тимушев, танi чужанiныс коми колипкай Вера Булышевалöн, нималана политик Валерий Потолиицынлöн. А Парч йылысь гижöд чукöрсö ми панам нöшта зэв аслыспöлöс морт йылысь висьтöн. 
Роч флотлысь история тöдысьяс, дерт жö, бур кывйöн казьтылöны капитан-лейтенант, бöрынджык адмирал Степан Лесовскийöс. Сiйö куимысь кытшовтiс му шар. 1862-öд воын Америкаын вöлi дипломатическöй миссияын, пуктiс пай гражданскöй война лöньöдöмö. Мöд вонас квайт военнöй корабльысь эскадра вуджис Атлантическöй океан, мед петкöдлыны, мый Россия сулалö Линкольнлöн правительство дор, оз ошкы Англиялысь ыршасяна политика. Сэки 600 матроса 52 пушкаа «Диана» фрегатын вöлi и 1 степеня матрос Герасим Сергеевич Булышев, Лебежнöйса быдтас. Немдiн вöлöсьтса рекрутöс служба вылö босьтлiсны 1848-öд воын. А колiс рекрутавнысö 20 во. Кыдзи и мукöд матрос, Герасим, статя, ён, ыджыд тушаа — эз öтдортчы некутшöм сьöкыдлунысь, командование тайöс казявтöг эз коль. Регыд мысти Булышев лоис комендорöн — орудиеса командирöн. «Диана» фрегат мугöгöрса туйö петiс стöч могöн: вежны «Пеллада» фрегатöс, кодöн командуйтiс роч адмирал да дипломат Евфимий Путятин. «Паллада» вылас жö секретаралiс нималана гижысь Иван Гончаров (бöрыннас ясыда петкöдлiс суйöр сайö ветлöмсö). Лыддьöны, мый Путятин Европаса олысьяс лыдысь медводз восьтiс Япония. А сэки öд тайö страна торйöдчис став мирысь, öтдортчис суйöрсайсаясысь. Путятин сяммис аддзыны öти кыв асыввывса правительствокöд, весиг сёрнитчыны вежласьны-вузасьны тöваръясöн. Но «Палладаöс» суис неминуча — веськалiс штормö. Юöрыс воис Петербургö да фрегатлы отсöг вылö мöдöдiсны «Дианаöс». 1854-öд вося июль 18-öд лунö и паныдасисны Де-Кастри заливын кык фрегат. Ускöттьöö воöмаясöс аслас борт вылö босьтöмöн «Диана» Путятинлöн веськöдлöм улын бöр мöдöдчис Японияö. 
Кыдзи гижö историческöй наукаясса кандидат, КГПИ-са доцент Николай Суриков, «Диана» фрегат вылын служитлiс уна нимлана йöз. Лейтенантöн вöлi Александр Можайский, кодi бöрынджык думыштiс мирын медводдза самолёт. Пöшти кык метр джуджда, сiйö зэв бура ворсiс гитараöн, гижис акварельöн, вöчалiс фотографияяс. Но медсясö зiлис Александр Пещуров, кодi бöрыннас лоис вице-адмиралöн. «Палладаöн» сiйö кытшовтiс му шарсö Кронштадсянь Японияöдз, Доброй Надежды кöдж кытшовтöмöн. Путятинкöд и вуджис «Диана» вылö. 
Уна офицерöс, вице-адмиралöс тöдлiс Герасим Булышев. И матросъяс бура тöдiсны öта-мöдсö. Роч гижысь Иван Гончаров на тöдчöдлiс, мый корабль вылын дурк йöзлы абу иныс. Вöлiны кö, быть вежлiсны оласногсö. Саридзöд ветлiгöн офицеръяс бура тöдмалiсны ассьыныс быдтасъяссö. Службаöдзыс Герасим Булышев со весиг абу на и аддзывлöма саридзсö. Кыйсис-вöралiс, ветлiс артельöн Из сайöдз. Код нö вермис шуны, мый коркö вуджлас оз сöмын море-саридзьяс, но и океанъяс — Атлантическöй, Тихöй. И мунiс медсьöкыд туйöдыс — Горн кöджöдз Европа пыр. Тихöй океан вуджöмöн локтiс Татарскöй проливöдз. Со мый гижö фрегатса командование флотскöй экипажлöн 1 статьяса комендор Герасим Булышев йылысь: «Аттестат сетöма сыысь, мый Герасим Булышев му шар кытшовтiгöн 1852, 1853, 1854 да 1855 воясны «Диана» фрегатöн ветлiс Амур вылö, суднолöн киссьöм бöрын Японияса берег дорын петкöдлiс бур да садь оласног, тöлкöн пöртiс олöмö ассьыс могъяс, мыйысь век ошкис начальство». Вöвлöм вöралысь бура кужис видзны аслас öрудилысь ствол, станина, витан планка век югъялiсны. Арнас, 1854-öд воын, Японияса Симода карлöн бухта дорын «Диана» веськалiс шызьöм-гызьöм саридзö. Корабль потласис, розьясöд кутiс тюргыны ва. Сöмын асывнас, лöньыштöм бöрын, лоис позянлун дзоньтасьыштны. Уна сьöкыдлун венiсны матросъяс дзоньтасигас, вöлi весиг сэтшöмтор, мый öти пушка тюрис да топöдiс матрос Симоновöс, лямöдiс юрсö. А водзö нöшта на локтiс цунами. Корабльöс гагйöс моз бергöдлiс-бергöдлiс. А вот Синода кар эз ло, пöгибнитiсны став олысьыс. Герасим ёртъясыскöд эськö уськöдчылiс дорйыны пöдысьясöс. Но найö полiсны йöз мусаясысь, кодсюрö асьныс шыбитчылiсны саридзö, мед пöдны. Некымын лун мысти вöйис и «Диана». Роч командование кужис сёрнитчыны японечьяскöд да Можайскийлöн чертежъяс серти, весиг татчöс йöз отсöгöн, роч матросъяс тэчисны «Хеда» шхуна. Сiйöн и бергöдчисны чужанiнас роч морякъяс. 
Бöрынджык, Крымскöй война помын, царскöй правительство козьналiс тайö шхунасö Япониялы да вештысис на роч морякъясöн вöчöм рöскодъясысь. 
Уна сьöкыдлун вуджöдiс ас вывтiсны Герасим Булышев. Ёртъясыс моз жö. Став сертиыс, сiйö векжö волiс Амур вомö, вуджис дзоньнас Сибир, локтiс пыр служитанiнöдзыс, Кронштадтöдз, кöнi водзö служитiс кöкъямысöд Флотскöй экипажын, 1 статьяа комендор званиеын. 
Чужанiнас Булышев локтiс 36 арöсöн, Лебежнöйын олiс 41 во на. Лöсьöдiс семья, вöдитiс видз-му, кыйсис-вöралiс. Кувсис 1903-öд вося апрель 19-öд лунö 77 арöсöн. Сьылöдiсны Немдiнса вичкоысь вежа айяс. 
А олöмыс мунiс водзö. 1916-öд воын Парчын вöлi нин 112 овмöс, 565 олысь. Сиктыскöд öтувмоз олiс Лебежнöй грезд. 1930-öд воын Парчын вöлi вузасян котыр, школа. 1934-öд воын археологъяс матiникысь аддзисны мезолит кадся некымын стоянка, арлыдныс 8 гöгöр сюрс во. Сюрисны гортын вöдитчанторъяс, ньöв вужъяс. Тайö аддзöмторъясыс, дерт, ыджыд донатор учёнöйяслы. Но, ме серти, медся тöдчана аддзöм-сюрöмторъясыс — тайö йöз, кодъясöс ми огö тöдöй, но кодъяс Россиялöн да Комилöн историяö колины некор вунöдлытöм пас. Чайта, асмувывсаяс оз кольны веськодьöн налöн рöк-судьба дорö да водзö нуöдасны газетын казьтылана сёрни. 
Вячеслав БАБИН. 
Немдiн.


Комментарии:

Добавить комментарий

Свежий выпуск: за 16 мая