Тайö нылыскöд ме тöдмаси том йöзлöн чукöртчылöм вылын гоз-мöд во сайын Ичöт Аныбын. Збой, варов, нюмсера, сiйö кыскис ас дорас йöзöс. Сöмын кад кольöм бöрын тöдмалi, мый сiйö пырö корсьысян котырö. 
Тöдмасьöй. Вöльдiнысь Полина Игнатова велöдчö Сыктывкарса университетын коми да йöз кыв велöдысьö. Корсьысян котырö пырис 2011-öд воын, кор велöдчис на искусствояс гимназияын. Медводдзаысь корсьысьны ветлiс 2013-öд воын. Кутiс петкöдчыны нуöданторъясын да ветлыны Псков обласьтса Невель карö. Ветлöны быд во августын кык вежон кежлö. Кыдзи шуö Полина, сылы дзолясяньыс сюйисны юрас, мый колö тöдны да пыдди пуктыны аслад страналысь история. Весиг öнi, университетын велöдчигöн, ныв оз вунöд гимназияса ёртъяссö да быд гожöм ветлывлö накöд корсьысьны. 
— Миян бур ёртасян котыр. Лэптiм нин уна салдатöс да дзебим найöс колана ногöн. Веськавлöны и важся сiмöм патронъяс, паськöм да кöм торъяс. Ме вайлi сэтысь мыйсюрö да сетi Пелагея Алексеевна Уляшева пöчлы школаса музейö. Сюрлöны медальяс, но зэв гежöда. Ыджыда мойвиö, сюрö кö патрон пытшкысь бумаг, кытысь позьö лыддьыны гижöдсö. Тшöкыда нимъяссö тöдмалам архивъясысь, йöзлöн висьталöмъясысь. Сьöлöм висьö, мый унджыкыс кольöны нимтöмöсь, но найöс пыдди пуктöмыс оз кус. Медводз, кор кутi ветлöдлыны, ёна майшаси, мöвпалi, гашкö, мися, мыйкö ог сiдзи вöч, и мыйла меным тайö колö. Кыдзкö чуймöдана вöлi лэптыны гуясысь ме кодь арлыда зонъяслысь лыяссö. А öнi тайö менам оласногöй, быд во колö чукöртчыны и мунны, и тайöс вöчны быть. Корсьысьöмыс ёнджыкасö колö миянлы, öнiя том йöзлы, мед ми эг кöсйöй кисьтны вир, мед пыдди пуктiм батьяслысь да пöльяслысь подвигсö. Миян бур олöм вöсна найö пуктiсны юр. Усьöм салдатъясöс корсьысян уджыс йитö и мукöд странаясысь йöзöс. Став корсьысьысьыс шаньöсь, эмöсь быдпöлöс арлыдаöсь. Ми накöд ёртасям. Тайö снимок вылын 2018-öд вося гожся паметьлöн вахта вылын корсьысян котырлöн юкöн. Турунвиж футболкаясаöсь лётчик-истребитель Н.К.Лошаков нима «Наследие» котырным. Гитараöн сулалö миян командир Сергей Викторович Таскаев, — висьталiс Полина. 
Корсьысянiнысь кö аддзöны боеприпасъяс, юöртöны кытчö колö да вешйöны сэсь. Сэки нин уджалöны торъя службаяс. Нывлысь мамсö пыр юасьöны, оз-ö пов лэдзны, но Полина татöг овны оз нин вермы. Ветлiс витысь и кöсйö водзö. Нывкакöд тшöтш öти котырын Кулöмдiнысь Александра Кочанова. 
— Ме велöдча Сыктывкарса университетын социальнöй технологияяс юкöнын. Корсьысян котырö ме локтi 2014-öд воын. Ми ветлöдлам Невельö С.В.Таскаевлöн юрнуöдöм улын. Вöлi нёль казьтылан вахта вылын и быдöн мыйöнкö аслыспöлöс да сьöлöмö коляна. Миянлы мойвиис лэптыны муысь медальяс, медальонъяс, нима паньяс. Котыр ветлöдлö сэтчö 10-ысь унджык во нин. Тайö корсьысьöмыс — месянь салдатъяслы аслыспöлöс аттьö, — висьталiс Александра. 
Галина КЛЮЖЕВА. 
Снимок интернетысь.