Кулöмдiнысь Алексей Владимирович да Анна Владимировна Гришинъяс абу сöмын бур спортсменъяс да тренеръяс, но и шуда семья. Налöн шуда позйын Макар да Спартак, кодъяслы майын тырас öти арöс да кöкъямыс тöлысь. Кöть пияныс дзоляöсь на, мамыс уджалö нин кольöм вося сентябрсянь. Асывсянь пажын бöрöдз да рытнас, кор Анна Владимировна уджалö, пияныс батьыскöд.Сöмын на мам локтö гортас, удж вылö котöртö Алексей Владимирович. Öтсасьöны пöль-пöч, ыджыд бать да ыджыд мам, рöдвуж. Гозъя уджалöны спорт школаын. Верöсыс велöдö челядьöс ворсны футболысь. Ачыс пырö футболысь ворсан районса öтувъя котырö, петкöдчö ордйысьöмъясын. Гöтырыс методист, нöшта велöдö зонпосниöс ворсны баскетболысь. Буретш школасянь спорткöд ёртасигöн и тöдмасисны. 
Алексей Владимирович Кебанъёльысь. Ичöт классъясын баскетболысь ворсны ышöдiс тренер Игорь Егорьевич Лагутин, а сэсся водзö велöдiс Ханверди Гаджимурадович Исрафилов. Ворсысьяслöн котыр пыр ветлiс ордйысьöмъяс вылö. Анна Владимировна быдмис-велöдчис Кулöмдiнын. Урокъяс бöрын котралiс спортзалö, ворсiс баскетболысь и волейболысь. Налöн котыр тшöтш петкöдчис ордйысьöмъясын. Со и тöдмасисны. Пыр аддзысьлiсны, сёрнитiсны. 
Алексей Владимировичлöн ыджыдджык Андрей вокыс тшöтш ёртасис спорткöд. Школа помалöм бöрын пырис велöдчыны Сыктывкарса педколледжлöн физкультура юкöнö. Сы вылö видзöдöм сэтчö жö мунiс ичöтджык вокыс. Коймöд воас педколледжö велöдчыны локтiс и Анна Владимировна. Но вöлiны кыдз тöдсаяс. Сöмын велöдчöм помалöм да армия бöрын Алексей гöгöрвоис, мый окота тшöкыдджыка и тшöкыдджыка аддзысьлыны сыкöд. Мича ныв вöрзьöдiс сьöлöмсö. Анна Владимировна педучилище бöрын пырис велöдны физкультура Эжваса школаö. Öттшöтш бöрйöм туйвизьöд велöдчис Вяткаса госуниверситетын. Алексей Владимирович жö бергöдчис чужанiнас, велöдiс спорт школалöн Кебанъёльса юкöнын. Шуд вылö, сьöлöм косьтысь нылöс корис уджавны Кулöмдiнö спорт школаöн сэки веськöдлысь Екатерина Ивановна Мишарина. Локтiс, лоис велöдöм кузя директорöс вежысьöн. 
— Ми öта-мöдöс гöгöрвоим быд сёрниын. Да и спорт кузя видзöдласъясным вöлiны öткодьöсь. Öтчыд öти гаж дырйи гöгöрвоим, мый ог вермöй öта-мöдтöг, да вöзйи овны öтлаын. Аня эз бöрыньт. Сiйö менö ёна вежис. Ме радейтi ачымöс, уна кад коллялi ёртъяскöд. А сэсся гöгöрвои, мый ме абу нин öтнам. Колö тöждысьны и муса ныв вöсна. Аня велöдiс, мед ме видзöдi ас бöрся, бура пасьтаси, тшöктiс велöдчыны водительö. Дерт, вензьыштлiм и пинясьлiм, но öдйö бурасьлiм, волiм öти кывйö, — казьтывлiс öтув олöмын медводдза воськовъяссö Алексей Владимирович. 
2013-öд воын сiйö вуджис уджавны Кулöмдiнö, мöд вонас ворсiсны кöлысь. Гижсьытöдз олыштiсны Анналöн пöчыс дорын. Сэсся вуджисны Кебанъёльö. Шудыслы эз вöв помыс, кор тöдмалiсны, мый виччысьöны кагаöс. Кад кольыштöм бöрын висьталiсны, мый лоас кык зонка. Медся ёна нимкодясис тесьтыс, кодлöн куим ныв. Алексей Владимирович кыдзи вермис видзис нöбасьысь гöтырöс. Но Анна Владимировна уджалiс и гортас ставсö бергöдiс, эз кокньöдчы. Век вöлi шыд да рок, гладитöм кöлуй, сöстöм керка пытшкöс. Кор колiс ветлыны юркарса бурдöдчанiнö, верöсыс нулiс ачыс асланыс машинаöн. 
Водзвыв мöвпалiсны, кутшöм нимъяс сетны зонъяслы. Кöсйисны шуны Володяöн да Александрöн, но тайö нимъясыс эз воны сьöлöм выланыс. Öти кагаыслы бöрйисны Макар, а мöдыслы Алексей Владимирович вöзйис Спартак. 
Макар кык минутöн ыджыдджык Спартакысь. Ставыс нин вöлi дась налöн локтiгкежлö. Öти кагаöн бергöдчыны кокни, а танi кык. Анна Владимировна чужöмсяньыс öти кадö вердiс, петкöдлiс ывла вылö, да тайö ёна кокньöдiс челядьöс водзö быдтöм-сöвмöдöмын, найöс видзöмын. Сiйö велöдчис бурдöдан физкультура факультетын да пияныслы вöчалiс массаж, песiс налысь ки-кок. Ёна отсасисны гозъялöн бать-мам, Анна Владимировналöн кык чой. Гозъя эз велöдны челядьöс ки вылö, эз лэдзны тайö вöчны и рöдвужлы. 
— Макар да Спартак чужöмсянь велалiсны, мый миян пыр уна йöза. Волывлö менам чой, гöтыр чойлöн нылыс, мыйысь ставныслы ыджыд аттьö. Бур, мый отсалöны, но миян олöмö нырсö оз сюйны. Менам мамöй висьталiс, мый Макар дзик ме кодь вильыш. Спартак олö лöня, но мыйкö кö сылы ёна колö, вермас и джоджö водлыны, бöрдыштны. Но ми ог вельмöдöй. Челядь радейтöны öта-мöдсö, ворсöны öтлаын. Öтчыд Макарöс лэччöдлiм юркарса бурдöдчанiнö, Спартакöс кольлiм тьöщалы. Лунтыр пö корсьысис воксö, — водзö сёрнитiс айлов. 
Кольöм воын Кулöмдiнысь ньöбисны кык судта керка. Анна Владимировналы медся ёна сьöлöм вылас воис ыджыд пусянiн. Верöсыс ёна радейтö сылысь чöскыд шыдъяссö. Лоис торъя жыр и пиукъяслы, гöсьтъяслы. Эм кöнi котравны Спартаклы да Макарлы. Дзоляöсь на да, мöд судтаö кайны оз лэдзны. 
Макар чеччö водз. Овлö, мый вит час асылын кок вылас нин. Садьмöдö воксö. Водз чеччö и мамныс. Пусьö пияныскöд ворсiгмоз. Олöны лöня, шаня, лэдзöны дырджык узьны батьлы. Кор сiйö чеччö, ставныс сёйöны. Корсюрö челядь нуръясьöны водзджык. Асьныс нин кутöны пань, велöдчöны сёйны асьныс. 
— Гöтыр мунö удж вылö, а ми ворсам, видзöдам мойдъяс. Анна зэв тöждысьысь мам да гöтыр. Удитö ставсö. Лöсьöдö сёян, ме сöмын шонта. Водзвыв дасьтö и ывла вылö петны кöлуй. Пиянлы вöлi кык-куим вежон, а ми петавлiм нин. Эг повзьылöй, кор вöлi 20 сайö градус кöдзыд. Сöвмöны лунысь-лун. И гöгöрвоöны нин. Ог пиняв, а сёрнита накöд, мыйкö кö вöчисны эз сiдз. Ог вельмöд. Ворсiганыс кö зурасисны либö усисны, бöрдыштасны и бурасясны, — юксис челядь быдтöмын гусяторъясöн том бать. 
Алексей Владимирович спорт школаын велöдö куим котырöс, 1-2-öд, 3-5-öд да 6-8-öд класса велöдчысьясöс. Ветлiсны нин ордйысьны Сыктывкарö, Ухтаö, Сосногорскö. Нöшта волывлöны вит арöса зонкаяс. Ачыс ворсö футболысь, волейболысь, баскетболысь. Ордйысьны волывлöны и бокиö мунысь сылöн вöвлöм велöдчысьяс. Нöшта на велöдчö удж кузя туйвизьöд Сыктывкарса университетын. Анна Владимировна асывнас уджалö методистöн, рытнас велöдö öти котырöс ворсны баскетболысь. Тöдмасис нин 1-2-öд классъясса велöдчысьяскöд, ышöдiс ёртасьны спорткöд. Локтан велöдчан воын кöсйö босьтны содтöд котыр да лоны сöмын тренерöн. Миян олöмын пö 80 процентыс — тайö спорт. Унаысь нин Макарöс да Спартакöс вайлiсны уджаланiнö «Олимпикö». Зэв сюся котрöдлöны мач, асьныс котралöны бурпöт, оз кöсйыны мунны гортас. 
— Дереваннöйысь тренер Николай Ремович Ракин висьтавлiс, мый Дмитрий пиыс, позьö шуны, быдмис спортзалын. Дзолядырйиыс сiйöс новлöдлöма нопйын, кор ветлöма ордйысьöмъяс вылö. Колöкö, сы моз жö кутам и ми. Эска, мый быдмасны да аддзасны асьнысö олöмас, олöмсö йитасны спорткöд. Ми асьнымöс кылам шудаöн. Ми абу сöмын гöтыр да верöс, но и удж кузя ёртъяс. Асьным аслыным лöсьöдiм олöм, öта-мöдöс кывзöмöн да кылöмöн, коркö да и вензьöмöн да гöгöрвоöмöн, öти кывйö воöмöн, — кывкöртiс Алексей Владимирович. 
Марина ДАДАШОВА. 
Снимок Гришинъяслöн 
чукöртöмысь.