Ме дасьта районса шензьöдана йöз йылысь мöд книга. Сэтчö пырта гижöд и Дереваннöйын чужöм да öнi Норвегияын Огэ Ингберт Тобиассен верöсыскöд олысь Татьяна Владимировна Антоновская йылысь, кодi волiс верöсыскöд кольöм воын районö Дереваннöй сиктлы 360 во тырöмкöд йитöдын. Ме аддзысьлi гозъякöд районса лыддьысянiнын и Дереваннöйын да чужис мöвп гижны на йылысь книгаын. Кори мöдöдны Норвегияын вöчöм фотояс. И со найö воисны. 
Дереваннöйын вöвлöм велöдысь Василий Иванович Королёв сетiс Татьяна Владимировналы татчöс му, мед сiйö разöдас сэнi дзебöм военнопленнöйяслöн гуяс вылö, кодъяс лыдын вермасны лоны и миян районсаяс. Та йылысь, а сiдзжö йöзöс гажöдöм йылысь и гижö Т.В.Антоновская: «Позянлунъяс серти гажöдам школаясын да культура керкаясын. Сьыла и коми сьыланкывъяс. На лыдын и «Войвыв дзоридз» (кывбур да шылад Василий Лодыгинлöн — Н.Л.), кодöс танi олысь йöз зэв ёна радейтöны. Му, кодöс ми вайим Дереваннöйысь, ме ставсö ичöтикаöн разöдi Чётта дi вылын миян виöм салдатъяслöн гуяс вылö. Тайö вöлi 2018-öд вося август 5-öд лунö (Дереваннöйын гозъя вöлiны июль 7-öд лунö — Н.Л.) Зэр кисьтiс ведраысь моз. Верöсöй видео вылö снимайтiс ставсö. Енэжыс бöрдiс, и ме бöрдi. Сьöкыд сэнi. Кыдзи найö, ловъя нисьö кулöмаяс, олiсны танi? Кыдзи найöс видзисны?.. Танi орччöн вöлiны военнопленнöйяслöн лагер и форт, кöнi найöс уджöдiсны, вöчöдiсны дорйысьöм могысь фашистъяслы гранит гöраясын кутчысянiнъяс. Ёна жö и сьöкыдтор вöлi. И öнi сэнi весиг олыштны сьöкыд. Но олöм мунö водзö. Став бурсö Тiянлы. Пыдди пуктöмöн Татьяна Владимировна Антоновская да Огэ Ингберт Тобиассен». 
Лыддянныд кö коланаöн, йöзöдöй юöрсö «Парма горын», мед тöдiсны йöз. 
Николай ЛЮТОЕВ. 
Ыстöм снимок вылын: Т.В.Антоновская да О.И.Тобиассен.