Миян йöз

[ A+ ] /[ A- ]


Помöсдiнысь Зоя Афанасьевна Шомысовалы январ 22-öд лунö тырис 90 арöс. Ыджыд пасöн чолöмавны волiсны районса администрацияöн веськöдлысьöс вежысь Н.А.Чаланова, олöмаяслöн районса котырöн веськöдлысь Г.А.Кравченко, Помöсдiнса овмöдчöминöн веськöдлысьöс вежысь Л.В.Шомысова да олöмаяслöн Помöсдiнса котырöн веськöдлысь М.В.Третьяков. Сиисны кузь нэм да ён дзоньвидзалун, сетiсны президент В.В.Путинсянь козин. 
Зоя Афанасьевна чужис Скöрöдумын. Быдмис ыджыд семьяын, кöнi вöлi сизим челядь. Удитiс велöдчыны сöмын вит класс, сэсся пансис война. Батьсö да ыджыд воксö нуисны тыш вылö. Дзолядырсянь вичмис уна сьöкыд удж. Отсасис вöв видзысьлы, кыскалiс вöлöн турун да йöв. Сэсся велöдчис трактористö да квайт во уджалiс колхозын. Верöс сайö петöм бöрын чужисны кык пи да ныв, но ковмис быдтыны öтнаслы, сы вöсна мый верöсыс эновтiс. Скöрöдумын кындзи олiс да уджалiс вель уналаын Помöсдiнын, Ягкöджын да Дiасёръяын. Сiдз, бöръяас пöжасис да пусис. 1975 воын овмöдчис Помöсö, а сэсся вуджис Помöсдiнö да шойччöг вылö петтöдз век пусис. 
Зоя Афанасьевналöн Валентина нылыс олö Псковын, Николай пиыс Сыктывкарын. Аньлöн нёль внук да öти правнук. Волöны быд гожöм. Зоя Афанасьевна уна во нин олö Иван Ильич пиыскöд, кодi зэв сьöлöмсянь да бура видзö мамсö. Гöгöр ставыс дзим-дзурк. Ыджыд керкасö мама-пиа лэптылiсны во 40 сайын. Керка гöгöр пожöмъяс, эмöсь гожся пусянiн да пывсян. 
Томдырйи ань ёна кысис. Кыдз шуис Иван пиыс, шоныд кепысь-носкияс эз бырлыны. Öнi пиыскöд петавлö ывла вылö быд лун. Татшöм бур пикöд сöмын овны да овны. 
Гижöд да снимок 
Галина КЛЮЖЕВАЛÖН.

Комментарии:

Добавить комментарий

Свежий выпуск: 28 марта

Осторожно — мошенники!