Унаысь том йöзлысь кывлан: кага вайны водз на, эг на пöттöдз шодлы. Да и сылöн чужöм бöрын ковмас ёна топöдчыны сьöмöн, сы вöсна мый аньлы, мед видзны кагаöс, ковмас дугдыны уджалöмысь, семьяö сьöм кутас вайны сöмын верöс. Сэтчö жö, кага — тайö и узьтöм войяс, и помасьлытöм тöжд-нок, и унаторйын асьтö удзöдöм. Водзті кö кызь вит арöсöн медводдзаысь кага вайысьöс шулісны «пöрысьöн», то бöръя кадö медводдзаöс тшöкыда чужтöны ар 30-35-яс, и некодöс тайö оз шензьöд. Мöдарö, кöсича дорас бергöдласны чуньнас, тöдмаласны кö, мый абу на комын арöс, а нывбаба уна челядя нин. 
Меным кö эз висьтавны, мый Дереваннöйысь Мария Владимировна Поповалöн куим челядь, сы вылö видзöдöмöн эськö эг шу да чайті гырысь класса велöдчысьöн: ме водзын пукаліс визув сьöд синъяса, сьöд юрсиа, неыджыд тушаа, вöсньыдик томиник ныв. Но сёрни сертиыс пыр и тыдовтчис – тайö мортыс велöдысь. 
Мария чужис да быдмис Ручын, сэні жö помаліс шöр школа. Семьяаныс уна велöдысь, и мöд удж йылысь эз мöвпав. Пöрысь пöльыс, Василий Иванович Попов, велöдліс физкультура, география, химия, рисование, Ирина Алексеевна мамыс велöдö роч кыв да литература, Диана Алексеевна Гребенюк ичиньыс — коми кыв да литература. А Мария Владимировналы мусмис математика. Бур тöдöмлунъяс та кузя сетіс ас школаын математика велöдысь Татьяна Валерьевна Игнатова. Мария кокниа пырис велöдчыны Коми пединститутö. Вылі тшупöда кык велöдчанін — пединститут да университет — öтлаалöм бöрын помаліс нин Сыктывкарса государственнöй университет. 
Велöдчигöн чужис Юлиана, кодлы таво тырас нин квайт арöс. Но институт эз шыбит, помаліс, кöть эськö вöлі вель сьöкыд. 
Нёль во сайын диплом босьтöм бöрын локтіс ас районö. Вöзйисны велöдны математика да информатика Дереваннöйса шöр школаын. Мария дыр эз мöвпав, пыр и кöсйысис. Велöдысьяслöн котыр вочааліс зэв бура. Сетісны нуöдны тырмымöн час. Медводдза лунъяссянь босьтісны асланыс видзöдлас улö да быдторйын отсалісны, тшöтш велöдісны, кыдзи кутчысьны челядь водзын да кутны найöс киясын. 
Математика – школаын велöдан медшöр предметъясысь öти, сыысь быть колö сдайтны экзамен, та вöсна кывкутöмыс ыджыд, öд буретш экзамен вылын босьтöм оценкаяс серти донъялöны ставнас школалысь удж. Слабджыка велöдчысьяскöд Мария Владимировна уджалö и урокъяс бöрын, и гожöмнас. Кольöм воын 9-öд классын математикаысь экзамен сдайтiсны ставöн. 
Таво Мария Владимировналы сетісны веськöдлыны витöд классöн. Сэні öкмысöнöсь. Сы серти, челядь шаньöсь, öтувъяöсь, зільöсь, кöсйöны босьтны бур оценкаяс, кывзысьöны классöн веськöдлысьлысь. Мария Владимировна лыддьö, мый таын пайыс ичöт классын найöс велöдысьлöн, код сайын предметсö пыдди пуктöм. Мария Владимировна сiдзжö ошкö бать-мамöс, кодъяслы абу веськодь, кыдзи велöдчöны челядьныс. Найö волöны сылöн чукöстігöн, отсалöны нуöдны гажа рытпукъяс. 
Мария Владимировна серти, челядьлы ёртасьны отсалöны и öтувъя уджъяс, и гажа рытъяс, кор пасйöны челядьлысь чужан лунъяс. Найö юöны юмовторъясöн да чöсмасянторъясöн чай, ворсöны, нимöдöны чужан лун пасйысьясöс. Мария Владимировна быдöн дорö воліс гортас, видзöдліс, кыдзи олö кага, эм-ö кöні дасьтысьны. Велöдысь серти, классöн веськöдлысьлы колö тöдны аслас велöдчысь йылысь кыдз позьö унджык, мед ас кадö казявны лёкланьö сетчöм, велöдчöм кузя личöдчöм да отсавны. 
Арнас став школа, медводдза классянь дас öтиöдöдз, петалö орчча вöр-ваö. Пестöны бипур, пусьöны, ворсöны, ордйысьöны, а бöрыннас донъялысьяс шуöны, кутшöм класс вермис. 
Мария Владимировна зільö дасьтысьны локтан урокъяс кежлö, видлавны тетрадьяс школаын, мед этшаджык кольны рыт кежлö, öд гортас сійöс виччысьöны квайт арöса Юлиана, нёль арöса Александр да кык арöса Тимофей. Бергöдны гортса удж отсалö Антон Александрович верöсыс. Сійö жö пукалö челядьлöн висигöн. Семья олö уна патераа керкаын мöдöд судтаын (оланін сетісны кыдзи том специалистлы, районса администрация вичмöдіс сійöс дзоньталöм вылö сьöм). Ва да пес катлöм, лёк ва петкöдöм — бара жö верöслöн мог. Гожöмнас челядь олöны Ручын то ыджыд мамыс, то пöчыс ордын. 
Корсюрö том мамлы векжö ковмылö пуксьывны рытъяснас дасьтысьны. Юлиана гöгöрвоö, мый мамсö торкны оз позь, гусьöникöн ворсö ачыс либö ичöтджык Саша вокыскöд (найö пö торйöдны позьтöмöсь, öта-мöдтöгыс овны оз вермыны), а ичöтик Тимофей тшöкыда пукалö дінас ли воддзас, тшöтш «отсалö» мамлы видзöдлыны тетрадьяс да дасьтысьны урок кежлö. 
Мария Владимировна висьталіс, мый век кöсйис уна челядьöс, сы вöсна мый ачыс быдмис öткöн. Вайис водзвыв мöвпыштöмöн да кöсйöмöн. Том нылöс эз повзьöд, мый керкаас оз во ва ни шоныд, мый посёлокын абуöсь гажöдчанінъяс, мый челядь чужтöмöн гежöда сюрлö кад кор окота шойччыны да пöттöдз узьны. Аньлöн эм радейтана удж, абу ылынöсь мам да инька, кодъяс отсалöны. Гозъя мöвпалöны Дереваннöйын кыпöдны керка, сідзкö, дзикöдз нин лэдзасны вужъяс татчö. 
Бур велöдысь (ме чайта, мый Мария Владимировна татшöм и эм) аслас класса велöдчысьяс йылысь век шуö: «менам челядь». Сідзкö, сылöн абу куим, а 12 челядь! Мед жö Мария Владимировналöн тырмас вын да сям быдтыны найöс бур йöзöн. Эска — сылöн артмас. 
Лидия Липина. 
М.В.Поповалöн чукöртöмысь: 
уна челядя мам М.В.Попова.