Январ 10 лунö пасйис 90 арöс тырöм Смолянкаысь Мария Алексеевна Морозова. Чолöмавны волiсны районса администрацияöн веськöдлысь С.В.Рубан, олöмаяслöн районса котырöн веськöдлысь Г.А.Кравченко, олöмаяслöн Югыдъягса котырöн веськöдлысь В.И.Юшкова, сиктса овмöдчöминлöн администрацияöн веськöдлысь В.В.Паршуков. Сиисны ён дзоньвидзалун да кузь нэм, сетiсны президент В.В.Путинсянь козин. 
М.А.Морозова чужис Калуга обласьтын. Быдмис уна челядя семьяын: вöлiны кык вок да кык чой. Велöдчис сöмын нёль во, нинöм вöлi пасьтавны да дугöдчис. Уджавлiс колхозын, лысьтысьлiс. Комиö 1964-öд воын вайис Анатолий Ефимович верöсыс. Мариялы танi ньöти эз во сьöлöм вылас, но вочасöн велалiс. Овмöдчисны Зöридз посёлокын, вöлi садса воспитательлы отсасьысьöн. 1971 воын посёлоксö бырöдöм бöрын вуджисны Смолянкаö. Уджалiс пöжасянiнын да орслöн контораын. Чöскыда пöжасьöм кындзи мичаа кысис. Зарни кияса ань. 
Верöсыскöд быдтiсны Александрöс, кодi пыр уджалiс автокрановщикöн. Öнi шойччöг вылын, гöтырыскöд видзöны Мария Алексеевнаöс. Лэптiсны зэв лöсьыд да шоныд оланiн. Олöма мортлöн куим внучка, кык правнук да кык правнучка. 
Верöсыс абу нин 20 саяс во. Öнi пыр орччöнöсь пиыс да моньыс, вöчöны ставсö, мед Мария Алексеевналы овсис долыдджыка. 
Гижöд да снимок 
Галина КЛЮЖЕВАЛÖН.