И кутiс ворсны том морт гуслиöн

[ A+ ] /[ A- ]

Висьталiсны, мый миян районын эм гуслиöн ворсысь Александр Иванович Шахов (снимок вылын) да окота лоис тöдмасьны сыкöд. Чужис Вöльдiнын, а быдмис Ягкöджын. Бать-мамыс вöлiны вöрдорса удж бергöдысьясöн. Быдмис медся ичöтöн, кык чойыс öнi Затонынöсь. 
Батьыс ёна кыйис чери да пыр аскöдыс босьтлiс писö, кодлы вöр-ва лои мусаöн. Александрлöн кывъяс серти, сылöн челядьдырыс вöлi шудаöн. Кыйсисны во гöгöр чöж да вузалöмöн босьтлiсны вель уна сьöм. Сiйö вичмылiс и асланыс вöчасянiнын пу кöлуй дасьтöмысь. Дас кык арöсöн велöдчигмоз медводз вöчис пу кокъяс, кодъяс вылын ворсiгмоз ветлöны зонкаяс. 
Помалiс Помöсдiнса шöр школа да пырис велöдчыны Эжваын маркетолог вылö. Помалiс да медводдза тöлысяс и гöгöрвоис, мый тайö абу сылы, сьöлöмыс оз кыскы. Кыкысь видлiс пырны пединститутö, но эз вермы. Кутiс виччысьны армияö нуöм, но дойдiс коксö. Хирург лыддис, мый сiйö ылöдлö да шуис: «Тэ талун кöкъямысöд нин». И Александр кöстыльясöн мунiс военкоматö, кöнi сетiсны кад бурдöдчыны тулысöдз. 2007-öд воын тулысын нуöмысь дугдiсны, и мунiс армияö сöмын арнас. Веськалiс Санкт-Петербург дорö, связьлöн войскаясö. Сэтчö мунтöдз уджалiс пилорама вылын да сиктса администрацияын специалистöн. Тöдмасис вежа ай Александркöд да шойччан лунъясö кольччылiс сы дорö. 
Техникумын велöдчигöн бурдöдчанiнын куйлiгöн пыртчис да сетчис еннога олöмö. Ёна лыддьысьöм бöрын кык во мысти гöгöрвоис ассьыс грекъяссö да корис мамыслысь прöща. И лоис кокньыдджык, олöмыс дзик вежсис. Бать-мамыс Енлы эскысьяс жö, торйöн нин мамыс. 
Витöд во нин Александр Иванович ворсö гуслиöн. Шылад вöлi сьöлöмас ичöтдырсяньыс. 16 арöсöн сылы козьналiсны гитара да вöлi зэв шудаöн. Öти кадö босьтчылiс ворсны рок шылад, Победа лунö сьывлiс чужанiнöс пыдди пуктана сьыланкывъяс. Сэсся кутiс пырöдчыны духовнöй кантъясö, кодъясöс ворсöны гуслиöн. Ньöбис тайö инструментсö. Тöдмасис гуслиöн нималан ворсысьяс М.Гавриленкокöд да Е.Стрельниковакöд. 
Вичкоö ветлысьяс аддзылöны, кыдзи Александр сьылö вежа ай Александркöд. Öнi Александр Иванович Сергиев Посад карын, велöдчö Москваса духовнöй академиялöн магистратураын, кодöс помалöм бöрын лоö Енма олöмö велöдöм кузя магистрöн. Кöсйö бöр локны чужанiнас, кодöс некор оз вунöдлы. 
Тöдсаясыс первойсö ёнакодь шензисны, эз гöгöрвоны, мыйла том зонлы Енлы эскöмыс, а сэсся вежöртiсны, мый тайö сылöн олан подулыс, олöмын кутöдыс. Том морт босьтчылiс «пöсь вывсьыс» пыртны Енлы эскöмö кыдз позьö унджыкöс, но сэсся гöгöрвоис, мый морт эскöмö воö ачыс. 
Александрлы 32 арöс. Ас йывсьыс висьталiс: 
— Ме öнi лючки тöда, мый кöсъя олöмысь. Эска, мый олöмын ставыс артмö Енлöн ошкöмсянь. Морт, кодi эскö Енлы, лöньджык, этшаджык шогалö да нинöм абуысь оз майшась. Овны зэв бур, тайö зэв ыджыд шуд, кодöс сетöма Енмыс. Мед лоны шудаöн, уна сьöм оз ков. Медся шудаöн позьö лоны весиг сьöмтöг. Он кö эскы, асьтö кылан вошöмöн. Ме водзыннас сэтшöмöн и вöлi. Öнi ставыс вежсис. 
Гожöмнас Александр Иванович доръяс диплом да бергöдчас гортас. Мед ставыс артмас сiдзи, кыдзи кöсйö. 

Галина КЛЮЖЕВА. 
Снимок интернетысь.

Комментарии:

Добавить комментарий

Свежий выпуск: 28 марта

Осторожно — мошенники!