Федерациялöн законодательство серти республикаын выль ногöн лöп-ёг чукöртöм да нуöм котыртöм бöрын колис кык тöлысьысь унджык. Кыдзи уджалöны та вылын районын, видзöдлiсны да донъялiсны энергетика, жилищно-коммунальнöй овмöс да тарифъяс кузя, ывлавывса озырлун, вöр-ва да сынöд видзан министерствоясысь, «Стройжилтех» службаысь, «Ухтажилфонд» котырысь, республикаса общественнöй палатаысь кывкутысь йöз. Районса администрацияöн веськöдлысьöс вежысь В.В.Бадьинкöд, «Ухтажилфонд» котырлы медасьöм «Север» котырса директор А.И.Шаховкöд да сiйöс вежысь А.И.Поповкöд найö кытшовтiсны да видзöдлiсны лöп-ёг чукöртанiнъяс Кулöмдiнын да Кебанъёльын. Юрсиктын сувтлiсны кыклаö, кöнi шыблас чукöртöны гöгыльяс вылын выльпöлöс контейнеръясö. Накöд орччöн дась нин лэбулын шыблас торъя чукöртанiн. В.В.Бадьин висьталiс, мый квайт во сайын ньöбисны 120 контейнер, нёль ГАЗ да öти КАМАЗ машинаяс. 2017-2018-öд воясын бара жö ньöбисны бумага да пластик торйöн чукöртöм могысь контейнеръяс. 80 процентсö сетiс министерство, кызьсö пуктiс район. Ньöбисны и шыблас топöдан. Выль контейнеръяссö сувтöдасны «Ухтажилфонд» котырлöн удж ладмöм бöрын. 
А.И.Шахов висьталiс, мый юрсиктын контейнеръясысь лöп-ёг петкöдöны быд лун. Сизим во нин юрсиктын ас керкаясын олысьяслысь босьтöны быд субöтаö. Машина волö урчитöм кадö да босьтö мешöкъясö чукöртöмсö. Тадзи ёна бур, оз ков чукöртны-весавны гылалöмсö либö понъясöн кыскалöмсö. Йöз кö шыбитöны ыджыдджыктор, медалöны техникаа котырöс. 
Волiсны «Северлöн» базаö, кöнi сулалöны 1,1 кубометр ыджда контейнеръяс, кодъяслы бумагаысь да пластикысь дозъяс сюян розьяс «северсаяс» вöчисны асьныс. Выльногöн лöп-ёг чукöртан программаын абу урчитöма ньöбны машина. «Северлы» ковмас босьтны аслыс. Вöлiны юрсиктлöн кывтыдпомын, сэнi эм райадминистрациялöн стрöйба, кытчö кутасны вайны да топöдны торйöн чукöртöм бумаг да пластик. Сiйöс дзоньтавны районса администрация торйöдiс 700 сюрс шайт. 
Районса администрацияын кывкутысь йöз (вöлiны и «Энергосбыт» котырлöн шöринысь) аддзысьлiсны овмöдчöминъясса юралысьяскöд, общественнöй котыръяскöд, водзмöстчысьяскöд. В.В.Бадьин пасйис, мый тайö туйвизьын райадминистрация уджалö öтув министерствояскöд да ведомствояскöд. Та йылысь кутасны сёрнитны, вочавидзны юалöмъяс вылö сикт-посёлокъясын йöзлöн чукöртчылiгъясöн. 
Энергетика, жилищно-коммунальнöй овмöс да тарифъяс кузя министерстволöн управлениеса начальник Д.В.Коротич сувтлiс донъяс вылö. Юöртiс, мый донъяс урчиттöдз министерство уджалiс районъясса да овмöдчöминъясса администрацияяскöд. Медся уна майшасьöм йöзлöн, кодъяслы воö шоныд, эм и пач. Налы колö вештыны унджык. Россияса правительство тшöктiс лöп-ёг вöсна кывкутысь да дöзьöритысь министерствояслы видлавны мытшöдсö, мед дасьтыны колана индöд. Кор сiйö лоас дась, сэки и видлаласны, кутшöм дон урчитны пача бур патераясын олысьяслы. 
Республикаын Стройжилтехнадзор службалöн веськöдлысьöс медводдза вежысь О.М.Микушева пасйис, мый кольöм вося ноябрöдз шыблас петкöдöм пырис оланiн кузя юкöнö да вештысисны оланiнлöн ыджда серти. /нi лыддьыссьö коммунальнöя могмöдöмöн да арталöны патераын либö керкаын олысьяслöн лыд серти. 
Та бöрын кывкутысь йöз вочавидзисны юалöмъяс вылö: 
-Бытьысь-ö вештысьны дзоля сиктса ас керкаын олысьяслы, кодъяс тайöс водзтi эз вöчлыны? 
-Да, бытьысь. Та йылысь пасйöма оланiн кузя кодексын. 
-Закон серти-ö тшöктöны вештысьны, мортыс кö эз вöч «Ухтажилфондкöд» сёрнитчöм? 
-Оланiн кузя кодекс серти сёрнитчöм оз ков, но мортыс кö кöсйö, вермас шыöдчыны котырö да лöсьöдны. Вештысьны колö быть. Морт кö петкöдö лöп-ёг да сiйöс нуöны, сiдзкö, могмöдöны. 
-Морт пасйысьöма, а патераын либö керкаын оз ов. Колö-ö сылы вештысьны? 
-Колö вайны документъяс, мый сiйö кöнкö велöдчö, шойччö-ёнмöдчö, служитö либö уджалö да гижöмöн шыöдчыны «Ухтажилфонд» котырö. Документсö позьö вайны бокиö мунтöдз, позьö локтöм бöрын, но 30 лунöн. Котыр арталас выльысь. 
-Кодлы вештыны, патераын кö некод оз ов? 
-Код вылын патера, сы вылö и воас квитанция. Морт кö кутö куим патера, вештысьны куимнансьыс. Öти патера кö эмбуралiсны куимöн, вештысьны куимнанныслы. Пасйысьöм морт кö кытчöкö ветлiс да подулалiс документöн, арталасны выльысь. 
-Патераын пасйöма öти мортöс да öтиысь и вештöны, а олöны унаöн да чукöрмö уна шыблас. 
-Патера кутысь либö кöртымалысь дорö кö кад кежлö локтöны гöсьтъяс да олöны вит лунысь унджык, сылы колö юöртны «Ухтажилфондö» вит лунöн водз, мый содас олысьялöн лыд. Оз кö висьтавны асьныс, юöртасны орччöн олысьяс. Сэки локтасны котырын уджалысьяс, лöсьöдасны гижöд, кырымöдасны кöзяинсö. Оз кö сiйö тайöс вöч, кырымöдасны патераын да керкаын олысьясöс. Сiйö гижöд серти и арталасны вештан дон. 
-Морт олö республикаысь бокын. Локтас шойччыны чужанiнö да ковмас вештысьны танi и сэнi могмöдöмысь. 
-Мунас бöр, петкöдлас öтарö да мöдарö мунан билетъяс, да сэнi сьöм оз босьтны. 
-Шуöны, мый семьяын кö эм студент да ваяс бокиын олöм йылысь справка, выльысь оз артавны. 
-Мортыс мунас кöть кытчö да ваяс документ, арталасны выльысь. 
-Керка шогмытöм, некод нин оз ов, а кöзяиныслы воöны квитанцияяс. Мый вöчны? 
-Та кузя нинöм абу пасйöма, но овны кö шогмытöм, колö резьöдны да киритны пасйöдысь. 
-Звöнитi «Ухтажилфондлöн» операторлы, виччыси 10 минут, но эз и шыöдчыны. Эм-ö телефон звöнитны дон босьттöг? 
-8 800 350 39 62. Жилищно-коммунальнöй овмöс кузя министерстволöн либö «Ухтажилфондлöн» сайтъяс вылын эмöсь нöшта номеръяс. 
-Кокньöд босьтысьяс кö оз вештысьны, уджйöзаласны, налы оз сетны содтöд сьöмсö? 
-Да, оз сетны. 
-Югыдъяг вожö шыбласъясла медводдзысь волiсны декабр квайтöд лунö, а воис квитанция ноябрысь. Арталасны-ö выльысь? 
-Стройжилтехнадзорлöн служба шыöдчас «Ухтажилфондö» да арталасны выльысь. Сöмын тiянсянь колö шыöдчöм. 
-/ти квитанцияын öтувтöмаöсь биöн вöдитчöмысь да шыблас петкöдöмысь донъяс. Морт кöсйö вештысьны öтисьыс. Позьö-ö? 
-Кваитанцияас пасйöма кыкнан котырыскöд сёрнитчöмъяслысь номеръяс. Верманныд вештысьны торйöн. Шыöдчанныд кö банкö либö вештысянныд почта пыр, висьталöй, мый вештысянныд торйöн. Торйöн вештысьны позьö и интернет пыр. Но медбур вештысьны кыкнансьыс. Мынтысьысь серти кö могмöдöмысь доныс оз лöсяв, колö вайны документъяс да арталасны выль пöв. 
-Лавка кутысьлöн эм сёрнитчöм мöд котыркöд, кодi новлö сылысь бумага да картон. Колö-ö вöчны содтöд сёрнитчöм «Ухтажилфондкöд»? 
-Кольöм вося ноябрсянь республикаын лöп-ёг, шыблас босьтö-нуö сöмын «Ухтажилфонд», сыкöд и колö вöчны сёрнитчöм. 
-Ме, кыдзи асшöр уджалысь, вузасянiн кутысь, водзтi вöчлi сёрнитчöм «Север» котыркöд, картон-бумаг нуöмысь вештысьлi тöлысьöн 2,5 сюрс шайт. «Ухтажилфондлöн» тöлысся доныс 50 сюрс шайт. 
-Шыблас нуöмысь öнiя донъяс урчитiс жилищно-коммунальнöй овмöс кузя министерство. Тiян кö эм контейнеръяса асланыд шыблас чукöртанiн, верманныд вöчны сёрнитчöм да мыйта нуасны, сы мындаысь и вештысьны. 
-Нуи документъяс «Энергосбыт» котырö да сулалi 40 минут, могмöдiс сöмын öти морт. 
-Выльпыртöмöн збыльысь уна шыöдчысь. Кöнi эм интернет, позьö ыстыны сы пыр миян сайт вылö. Вочасöн ставыс ладмас. 
Кывкутысь йöз вочавидзисны и мукöд юалöмъяс вылö. 
Пасъям, республикаса юралысь С.А.Гапликовлöн тшöктöмöн да «Единая Россия» партиялöн республикаса юкöнöн веськöдлысь Н.А.Михальченковалöн индöд серти выль ног лöп-ёг чукöртöм да петкöдöм босьтöма партияö пырысьяслöн чорыд дöзьöр улö. Видзöдлас улын и Коми республикаса общественнöй палаталöн. 

Марина ДАДАШОВА. 
Гижысьлöн снимокъяс вылын: ывлавывса озырлун, вöр-ва да сынöд видзан министерствоысь юкöнса начальник Е.В.Потаров да общественнöй палатаысь жилищно-коммунальнöй овмöс туйвизьын пыркадся уджалан котырöн веськöдлысь Д.Д.Шучалина; вочавидзö О.М.Микушева; сёрниитö общественнöй палаталöн олöмö пöртысь дирекция котырöн веськöдлысь А.С.Афонина.