Акань кодь мича тайö челядьыс Улыс Вочса «Оз тусь» садйысьöсь. Колö шуны, мый садйыс кöть районса ылi ичöт сиктысь, а бур уджöн да вермöмъясöн нималö оз сöмын районын, но и республикаын. Сiйö медводдзаяс лыдын пырöдчис «Дзолюк» программаö, кодöс веськöдöма коми кыв, коми оласног да культура пыдiсянь велöдöмлы. И сы серти уджалöны пыр на. Танi эм коми керка-музей, кöнi челядькöд тшöкыда нуöдöны занятиеяс, важногöн вöчлöны рытпукъяс да войпукъяс, пасйöны вичкоса да мукöд тöдчана лунъяс, кыдзи Ыджыд лун, Рöштво, велöдчöны пöжасьны да с.в. Таын, дерт жö, водзмöстчöны садйöн веськöдлысь Н.А.Ветошкиналöн юрнуöдöмöн воспитательяс В.В.Савина, Н.В. да Т.А.Логиноваяс. Налы быдторйын отсасьöны няняяс А.С. да В.Г.Морохинаяс. Тшöтш и бать-мам. Быд гаж кежлö лöсьöдчöны да нуöдöны найöс öтлаын, вöччöдöны-мичмöдöны жыръяс, колiгöн вурöны налы паськöм. Кöть сад абу сэтшöм озыр, а ас вöчöмторъясöн да вурöмторъясöн мукöд садъясысь öдвакö кодкö вермас ордйöдны. Зiльöны, медым гажъясын быд петкöдчигöн зонпосни вöлiны выльысь-выль паськöмаöсь да дзоридз кодь мичаöсь. 
«Оз тусь» садса уджалысьяс тшöкыда пырöдчылöны конкурсъясö, районса тшупöдсянь босьтöмöн Россия тшупöдаöдз, да петавлöны вермысьяс лыдö. Сiдз, во куим сайын «Медбур сиктса сад» республикаса конкурсын лоисны вермысьöн, öнi «Сьылам коми кыв вылын» регионъяскостса конкурсын бара лоисны медводдзаöн, таво «Став сьöлöмсянь аттьöалам» республикаса конкурсын, кодöс котыртiс «Йöлöга» газет, петiсны мöдöн, «Безопасность глазами детей» районса конкурсын Эвелина Лютоева лоис коймöдöн да петкöдчис республика тшупöдын. Быд тöлысь пырöдчöны, весиг бать-мамкöд, енби петкöдлан ставроссияса интернет-конкурсö, медым видеороликъяс либö мукöд уджъяс отсöгöн петкöдлыны челядькöд уджалан сям. А налы эм мыйöн юксьынысö, öд тöдöмлунъяссö кыпöдöны воысь воö. Сиам, мед «Оз тусь» сад и водзö сöвмас да нималас бур уджöн, медшöрыс — сэтчöс оз тусьясöс лючки быдтöмöн-велöдöмöн, найöс олöманыс медводдза воськовъяс вöчны туйдöмöн. 
Галина НЕСТЕРОВА. 
Снимок Надежда ВЕТОШКИНАЛÖН.