Вöлi и интернат

[ A+ ] /[ A- ]

Дiасёръяса школа босьтчисны кыпöдны 1965-öд воын, эштöдiсны 1974-öдын. Нимкодясисны и челядь, и велöдысьяс, и бать-мам. Выль школаö пырисны февральын. Сiйö чайтсис сэтшöм ыджыдöн. Сэнi вöлi спортзал, велöдчыны, ёнмöдчыны, ворсны став коланторйыс. Унатор челядь аддзисны медводдзаысь. Лоис и нуръясянiн. 
Выль школа восьтöмöн лоис позянлун велöдны Югыдтыдорса челядьöс. Найö пуксисны партаяс сайö февральсянь жö. Яслилöн вöвлöм керкаын восьтiсны интернат (öнi сэнi овмöдчöминса администрация). Воспитательöн вöлi Елизавета Семёновна Карманова, пусьысьöн Галина Ивановна Стяжкина, овмöс видзысьöн да няняöн Роза Саватеевна Шебырева. Интернатын олiс 20-ысь унджык 5-8-öд класса велöдчысь. Гортаныс ветлiсны сöмын каникулъяс кежлö. Со мый казьтылiс Е.С.Карманова: «Мед нуны гортö тöвся каникулъяс вылö, локтiс пысалöм пу доддя трактор. Ывла вылын 30 градус кöдзыд. Школаса директор А.И.Поповакöд повзим, кыдзи мöдöдны челядьöс? Дадь вылö пуктiс интернатлысь матрасъяс, пуксьöдiм сэтчö югыдтыдорса зонпосниöс. Тадзи и мунiсны». 
Велöдысьяс да воспитательяс ветлöдлiсны Югыдтыдорö, сёрнитiсны бать-мамкöд, висьталiсны, кыдзи велöдчöны-олöны налöн быдтасъясныс. 
Челядь ыджыд перемена дырйи сёйны котравлiсны интернатö. Урокъяс бöрын дежуритысьяс пыртлiсны пес, ваялiсны нуръясянiнö ва, пелькöдiсны ассьыныс жыръяс. Урчитöм кадö вöчисны гортса удж, дасьтысисны урокъяс кежлö, рытъяснас ворсiсны, лыддьысисны, ветлiсны клубö, библиотекаö. Унаöн ветлiсны посёлокын олысь рöдвуж дорö. Öтчыд вежонын мыссисны öтувъя пывсянын либö рöдвуж дорас. 
Воспитательясöн сiдзжö вöлiны Мария Вениаминовна Рассыхаева, Раиса Васильевна Соломная, нянечкаясöн — Александра Егоровна Ключко, Нина Савельевна Липина, Раиса Дмитриевна Уляшева, Нина Ивановна Курочкина. 
Интернат сиптысис 1982-öд воын. Челядь водзö велöдчисны Помöсдiнса школаын. Сiйö керкаас меститчис Вöльскöй лесопунктлöн контора. 
Елена КУРОЧКИНА, 
Дiасёръяса библиотекаын уджалысь. 
Снимок вылын: Югыдтыдорса велöдчысьяс интернатлöн кильчö вылын (1979-öд во).

Комментарии:

Добавить комментарий

Свежий выпуск: 28 марта

Осторожно — мошенники!