Эн вунöдöй чужанiн!

[ A+ ] /[ A- ]


Май 25-öд лунö районса шöр школа помалысьяслы триньöбтiс бöръя звöнок. Кыпыда тайö луныс колис и Ручса шöр школаын. Танi таво 11-öд класс помалö кык морт, 9-öд — витöн. Челядьыс этша да гажсö налы нуöдiсны öтлаын. 
11-öд класса велöдчысьяслöн медводдза велöдысьöн вöлi Нина Николаевна Расова, классöн веськöдлö Мария Валерьяновна Пименова, зiльö социальнöй педагогöн да технология урок велöдысьöн. 9-öд класса велöдчысьяслöн медводдза велöдысьöн вöлi Елена Васильевна Булышева, кодi öнi олö да уджалö Дереваннöйын. Классöн öнi веськöдлö Диана Алексеевна Гребенюк, коми кыв да литература велöдысь. 
Велöдчысьяс висьталiсны пöсь кывъяс велöдысьяслы, бать-мамлы, школаса администрациялы, пусьысьяслы да мыськасьысьяслы. Пуктiсны школаын олöмысь босьтöм шмонитан петкöдчöм, петкöдлiсны ас йывсьыныс видеоролик, мыйысь ёна и сералiсны залын. 11-öд класса велöдчысьяс Семён Ульныров да Арина Гребенюк йöктiсны школаса вальс. Гаж котыртöмö да нуöдöмö ыджыд пай пуктiсны эз сöмын асьныс школа помалысьяс да классöн веськöдлысьяс, но и ичöт класса велöдчысьяс да налöн велöдысьяс. Ставлы сьöлöм вылас воис посни челядьöн йöктöм-петкöдчöмыс. 
Торйöн колö пасйыны 11-öд класса велöдчысьяс йылысь. Арина Гребенюк ичöт классын пыр велöдчис «витъяс» вылö, а сэсся помöдз вöлi «лучшöйöн». Школаысь öтдор нöшта велöдчис да бура помалiс Коми республикаысь сиктса енбиа челядьлысь лицей-интернат бердса физика-математика юкöн. Школа помалöм бöрын кöсйö мунны велöдчыны Сыктывкарса госуниверситетлöн экономика факультетö. Семён Ульныров сiдзжö бура помалiс школа, кöсйö видлыны пырны Санкт-Петербургса военнöй училищеö. Эскам, мый кöсйöмъясныс налöн збыльмасны, водзö вылö ставыс артмас, асшöр олöмын аддзасны ассьыныс туй. Сиам налы выль вермöмъяс, шудлун да мед некор эз вунöдны ассьыныс чужан сиктса школа. 
Диана ГРЕБЕНЮК. 
Руч. 
Гижысьлöн снимок вылын: 
С.Ульныров, Н.Н.Расова да А.Гребенюк.

Комментарии:

Добавить комментарий

Свежий выпуск: 28 марта

Осторожно — мошенники!