Менам ыджыд мам

[ A+ ] /[ A- ]


Менсьым ыджыд мамöс шуöны Мария Александровна Игушеваöн. Сiйö чужлiс 1950-öд воын Керчомъя сиктын. Сылöн вöлi нёль вок да куим чой. 1967-öд воын ыдждыд мам помалiс Дереваннöйса шöр школа да водзö велöдчис Сыктывкарса музыкальнöй училищеын. Сы бöрын уджалiс Дереваннöй сиктса клубын директорöн, садйын шылад велöдысьöн да совхозын градвыв пуктас вöдитысьöн. Быдлаын зiлис сьöлöмсяньыс. Ыджыд мамлöн вит челядь: кык ныв да куим пи. Менам мамöй — медыджыд. Сiйöс шуöны Наталья Владимировна Вороноваöн, уджалö медшöр бурдöдысьöн Дереваннöйса больничаын. Мамлöн чой-вокыс тшöтш бура велöдчисны, лоисны бур йöзöн. Вокъясыс олöны Дереваннöйын, а Анна чойыс Краснодар крайын. Ыджыд мамлöн уна внук да внучка. Ставныс найö радейтöны волыны сы дорö чöсмасьны чöскыд пöжасöн, а сiдзжö отсасьны сылы, вöчны гортгöгöрса удж. Ыджыд мам радейтö печкыны, кыны да уджавны град йöрын. Сiйö вöдитö уна сикас градвыв пуктас, весиг арбуз да тыква.Нöшта ыджыд мам гижö кывбуръяс, тшöтш и коми кыв вылын. Меным медся ёна воö сьöлöм вылö сылöн бать йывсьыс кывбур. Батьыс воюйтiс нёль во чöж. Победа паныдалiс Берлинын. Локтiс война вылысь дзоньвидзаöн да олiс 1992-öд воöдз.
Батьöлы
Тэ томöн война вылö мунiн.
Тэ дорйин ассьыд чужан му.
Тэ асьтö шудаöн век шуин,
Мый сьöкыд, некор дзик эн шу.
Тэ аддзин, кыдзи киссис вир,
Кыдз ёртъяс усины йöзiнö,
Кыдз пансис виччысяна мир,
Кор пырин вермысьöн Берлинö.
Меным батьö важöн шулiс:
Война некор мед оз ло.
Колö лöньлун чужан мулы,
Шог мед сьöлöмöдз оз во.
Батьöй менам важöн абу ловъя.
Шойна ягын куйлö вель нин дыр.
Оз нин сотны ранаяслöн дойяс.
Надзöникöн гортö оз нин пыр.
Анжела Воронова, 8-öд класса велöдчысь,
Дереваннöй.

Комментарии:

Добавить комментарий

Свежий выпуск: за 26 марта