Найö медбуръяс лыдын

[ A+ ] /[ A- ]


Вöльдiнысь Николай Николаевич да Юлия Владимировна Уляшевъяслöн семья сиктын медся буръяс лыдын. Налöн шуда позйын öти ныв да кык пи. Петкöдчöны быд уджын, ордйысьöмын, гажын. Овмöдчöминса администрация быд во помын бöрйö олöмын да сиктын водзмöстчысьясöс да Выль во водзын пыр пасйö и тайö семьясö. 
Юлия чужлiс Сордйылын. Вöльдiнö вуджисны мамыскöд да вокыскöд ыджыд мам дорас да танi и пырис школаö, Помöсдiнын помалiс 11 класс. Вöльдiнысь жö Николай Николаевич. Кöть и сиктын тöдiсны öта-мöдсö, но эз казявлыны. Школа помалöм бöрын ныв мунiс Санкт-Петербургö мамыслöн воча чой дорö, ыджыд карын велöдчис пусьысьö да пöжасьысьö. Эз кöсйы уджавны бокиын, сьöлöмыс кыскис гортас, да локтiс бöр. Николай велöдчис юркарын автомеханикö да волiгъясöн син улас и усис мича нылыд. Сэки и тöдмасисны матöджык. Армия бöрын овмöдчисны öтлаын нин. 
— Николай — мамыслöн öтка пи. Ме пыр висьтала, мый менам кодь бур инькаыс сэсся некодлöн абу. Некор эз индав, мый вöчны, эз вомав. Öта-мöдöс гöгöрвоим зэв бура. Видзис ныв пыдди. Сэки сiйö вöлi уджалö на, ме гортын пуси, мыськаси, бергöдi мукöд удж. Висьтавлiс эськö, Коля пö оз радейт капуста, йöв да йöлысь вöлöга, но мый пулi да вöчлi, сёйис ставсö. И öнi на оз ышнясь. Куим жыръя сылöн ыджыд керкаö тöрим ставным, но верöсöй шуис кыпöдны аслыным торъя шуда поз. Лэптынысö чукöртлiс сиктсаясöс, а сэсся ставсö, весиг пачсö, вöчис ачыс. Ыджыд батьыс вöлi зарни кияса да быдмигас сы гöгöр и бергалiс да велöдчис. Унатор кыпöдiс керка йöрын, — висьталiс ань. 
Чужис Анастасия, сэсся Валерий. Выль керкаö пырисны вит во сайын. Юлия Владимировна кöсйис, мед выль керкаын вöлi выль олысь, да шуисны лöсьöдны коймöд кагаöс. 11 арöса Анастасия велöдчö Помöсдiнса школаын витöд классын. Челядьлысь енби сöвмöдан «Патриот» керкаысь вежоннас кыкысь сиктса библиотекаö волö Егор Геннадьевич Шабанов, велöдö туриставны. Анастасия урокъяс бöрын зэв окотапырысь котралö сэтчö. Тшöкыда найö петалöны вöрö, велöдчöны, кыдзи кутчысьны сэнi, кы-дзи венны паныдасьöм сьöкыдлунъяс да с.в. Валерий коймöд классын, Евгенийлы кык арöс да сизим тöлысь, кык пи котралöны Вöльдiнса школа-садйö. 
Анастасия велöдчö бура да аскиа урокъяс кежлö дасьтысьö ачыс. Гежöда шыöдчылö бать-мам дорö. Колiгöн корсьö интернетысь. Ёнджыкасö ачыс гортса удж вöчö и Валерий. Корсюрö отсалöны чойыс либö батьыс. Школаысь локтöны да пыр и ошйысьöны бур оценкаясöн. Мамыс оз пиняв, кодныскö кö босьтiс «3». Найö мöд лунас висьталöны нин, мый велöдiсны да выльысь висьталiсны велöдысьыслы да пуктiсны «4» либö «5». Но татшöмыс овлö гежöда. 
Кык ыджыдыс пырджык öтлаынöсь. Öтлаын пыртлöны керкаö да пывсянö пес. Тöлын кö, керкалöн ыджыд йöрысь батьыскöд весалöны лым. Корсюрö отсасьны котралöны ыджыд мам да пöч дорö. Нывка мыськалö тасьтi-пань. Кор мамыс пусьö-пöжасьö, челядь орччöнöсь. Велöдчöны отсасигмоз.
Николай Николаевич уджалö кусöдчысьяслöн Помöсдiнса часьтлöн Ягкöджса постын, гöтырыс овмöдчöминса администрацияын пелькöдчö, ломтö пач. Вит час асылын ань петö нин удж вылö. Батьыс и чеччöдö челядьöс, вердö да мöдöдö школаö. Абу кö удж вылын, дзоля Евгенийöс нуö садйö. Юлия Владимировналöн мамыс олö орчча керкаын да быд здук локтö отсöгöн. Сiйö и котöртö, кор гозъя уджалöны либö кодныскö кытчöкö мунöны кутшöмкö да могöн. Волö и пöчыс, либö кагасö нуöны сы дорö. 
Керкаыс öти судтаа да куим жыръя. Николай Николаевич кыпöдiс торъя пусянiн. Вöчасигас пыр орччöн вöлi Валерий да шуис, тайö пö керкаыс лоö менам. Эм гараж да пытшкас вöчасянiн, батя-пиалöн лов кыпöданiн. Оз пиняв, мый пиыс быдлаö сюйö ныр, видласьö-вöчасьö. Чайтсьö, батьыс моз жö лоас зарни киясаöн. На дорö мырдöн петö Евгений, быдмö нöшта öти отсасьысь. Овмöсын эмöсь трактор, дзоля да ыдж-ыд машинаяс. Трактор колö пес вöчигöн да ваялiгöн, мукöд удж бергöдiгöн. Гырысь челядь ордйысьöны лыжиöн котралöмын да пыр вермöны. Ас машинаöн и новлöдлö Помöсдiнö, босьтö и мукöд челядьöс, «висьö» на вöсна. Гортас лыжи эм ставныслöн, тшöкыда петавлöны исласьны, котравны öтув. Николай Николаевич öшинь улас вöчис ыджыд теплицаяс. Вöдитöны помидор да öгурцы, мукöд градвыв пуктас. Консервируйтöны да тöв кежлö вöчöны быд сикас салатъяс. Кöзяин кыйсьö и вöралö. Пиян быдмыштасны да тшöтш кутас босьтлыны вöрö. 
— Ме зэв шуда морт. Менам зарни кияса, семья вöсна ыджыд тöжда муса верöс. Танi жö миян мамъяс, менам дядь да вок, олам öта-мöдлы отсасьöмöн, тöждысьö-мöн. Тайö аддзöны челядь да эска, коркö жбырнитасны шуда позйысь, кутасны овны миян моз жö бать-мамöс пыдди пуктöмöн, овны öта-мöдыскöд ёртасьöмöн да отсасьöмöн, — кывкöртiс ань. 
Марина Дадашова. 
Снимок Уляшевъяслöн чукöртöмысь.

Комментарии:

Добавить комментарий

Свежий выпуск: 28 марта

Осторожно — мошенники!