Син водзö сувтiс Надежда Николаевна да Александр Павлович Никоновъясöс пируйтöм. Надялöн мам норлун эз петкöдлы, гöсьтъяс сорыс шмонитiс и гажöдчис. Но казялi, син дорыс вель унаысь вазьывлiс. Öти-кö, томлунсö жалитiс нылыслысь, кодi неважöн на помалiс шöр школа да велöдчö Архангельскса государственнöй медицинскöй институтын. Жöникыскöд тöдмасьны волiгöн видлiс бöрыньтны верöс сайö петöм йылысь мöвпсö, но кык гулюяс кодь том йöзлысь муслунсö казялöм бöрын ёна паныд эз сувт. Сöмын вöзйис бур сöвет, мед нöрöвитласны öтлаасьöмнас да бурджыка тöдмаласны öта-мöдсö. Нöшта, мед оз тэрмасьны кага лöсьöдöмнас. Сiдзсö, сылы зонмыс воис сьöлöм вылас. И абу ворссьöма: ныв гозъялöн олöмöн öнöдз пыр нимкодясьö.
Семьяöн велöдчöмын сьöкыдлунъяссö сiйö тöдiс эз йöз сёрниысь, а аслас олöмсьыс. Галина Андреевна Новожилова тайö жö мединститутас пырис велöдчыны медицинскöй сестраöн мыйтакö уджалöм бöрын нин Надя кагаöн. Сэнi чужис мöд ныв Настенька. Танi, Кулöмдiнын уджалiгöн мукöдыс чужисны. Вит челядьöн олiсны-быдтысисны. Аттьö висьталö Николай верöсыслы, кодi вöлi семьясö кутысьöн, сьöм нажöвитöм могысь некымынлаын уджалысьöн. Ачыс Галина велöдчиг чöжыс жö уджалiс. Гортса став тöжд-могсö вöчисны öтув. Нöшта, кыкнанныс удитлiсны ветлыны курсъяс вылö. Торйöн нин уна специальность шедöдöма вит воöн Николай Витальевич. Водзö олöмас кужöмлуныс ёна сгöдитчис.
Надя, семьяын медыджыд, чой-воклы пыр вöлi мам кодьöн. Эз, эз верстьööн мырдöн тшöктöмöн, ичöтджыкъяссö радейтöмыс сылы вуджис бать-мамсяньыс. Никонов гозъя асьныс челядьысь эз жö повзьыны. Патераын лоис дзескыд да керка ньöбисны. Ёна дзоньталiсны, выльмöдiсны оланiнсö, йöрсö баситiсны. Градъяс да кустъяс вылын быдтор воö, кöзяйкалöн пуöм-вöчöмыс гöбöч тыр. Майбыр, он кö дышöдчы, эм мый пызан вылад лэптыны. Быдмöны челядь. Öнi Егор уджалö нин юркарын, водзö нуö ыджыд батьöн сетöм удж. Лиза пöшти «пятьясöн» помалiс Кулöмдiнса шöр школа да пырис велöдчыны Сыктывкарса университетлöн медицина юкöнö-ыджыд мам да мам мозыс сiйöс кыскис йöзöс бурдöдысьö. Катя велöдчö кадетъяслöн öкмысöд классын, отличница, уна олимпиадаын вермысь. Ветлö паньясöн ворсысьяслöн ансамбльö. Котырнас уналаö нин волiсны, неважöн на Карелияысь воисны.
Торйöн кöсъя тöдчöдны Никонов гозъялысь да быдтасъясыслысь вежавидзöмсö: абу ошйысьысьöсь, кöть эм мыйöн, оз пуктыны асьнысö вылö, олöны лöня. Ёртасьöны спорткöд,туристалöны, Надя уна во сьылö «Эжваса дзоридзьясын». Рамлуныс сылы вуджöма батьсяньыс, мамыс кодь авъя.
Институт помалöм бöрын том специалистъяслы туй вöлi восьса уналаö. Но Надежда Николаевна бöрйис уджалан местасö чужанiнас, кыдз коркö вöчис мамыс. Врач стоматолог матö 30 во бурдöдö пиньяс, Александр Павлович — невролог. Йöзкöд лöсьöдчöмöн, шаньлунöн кыöма Никоновъяслöн олöм.
Нина Буткина.
Снимок вылын: Н.Н.Никонова уджалысьясыскöд.