[ A+ ] /[ A- ]
- Видза оланныд, дона гöсьтъяс! Пырöй миян дорö да юöй пöсь, чöскыд чай! Сiйö бурдöдас став висьöмысь, бырöдас мудзöм, сетас уна вын!
Татшöм кыпыд кывъясöн вочаалiс Сыктывдiн районса Нювчимысь йöзкостса сьылан котыр социокультурнöй шöринын Донса йöзöс. Гажыс пансис конкурсöн. Видзöдысьяс тöдмалiсны унатор чай йылысь. Ворсöмын вермысьлы козьналiсны чай пачка. А сэсся мича югыдлöз рöма сарапана да юркышöда аньяс йöктöмöн сьылiсны частушкаяс, весиг петкöдлiсны самöвар. Залын пукалысьяс видзöдiсны нималана композитор Прометей Ионович Чисталёв йылысь кино, кытысь тöдмалiсны, мый квайтымынöд воясын сiйö вöлi сьылан котырöн веськöдлысьöн, нöшта ыджыд енбиа шылад тэчысьлöн батьыс вöлi Помöсдiнса нималана гижысь Тимофей Вениаминович Чисталёвлöн вокыс. 2006-öд воын Нювчимса сьылан котырлы сетiсны П.И.Чисталёвлысь ним. Пасъям, мый сылы 2017-öд воын тырис 110 во. А сэсся юргисны «Ижмаса шаль», мукöд коми да роч сьыланъяс. Уна петкöдчöм мичмöдiс паньясöн, чипсанъясöн да баянöн ворсöм. Ветеранъяслöн котыр сьылiс сы йылысь, мый пöрысьлунысь повны оз ков, а колö радейтны олöмсö. Быд петкöдчöм вöлi сэтшöм кыпыд, мый видзöдысьяс дыр аттьöалiсны артистъясöс. Видзöдысьяслы сьöлöм выланыс воис баянöн ворсысь А.А.Ковтун, кодi нöшта ышöдана йöктiс да лов вöрзьöдана сьылiс.
Нювчимын коркö уджавлiс чугун сывдан завод. Татчö овмöдчисны роч йöз, кодъяс петкöдлiсны и уджалiгöн киподтуйсö, и шойччигöн сямлунсö. Нювчимса сьылан котыр йылысь медводдзаысь казьтывсьö 1907-öд воын. Сьылысьяснас вöлiны заводысь уджалысьяс, посёлокысь велöдысьяс да бурдöдысьяс. 1970-öд вося август 4-öд лунö сьылан котырлы сетiсны «Йöзкостса асшöр котырлысь» ним. Ыджыд пай сöвмöмö пуктiсны В.А.Мартынов да А.Ф.Кустышев, а öнi уджалöны культура керкаса веськöдлысь Е.В.Попова, И.И.Чувьюрова да А.А.Ковтун. Гажъясö пырöдчылiсны öти рöдвужысь петысьяс, на лыдын П.И.Чисталёвлöн пöль-пöчыс да бать-мамыс, Воробьёвъяслöн да Савельевъяслöн семьяяс. Котырö пырысьяс уджалöны школаын, лавкаын, библиотекаын либö шойччöг вылынöсь, но рытъясын кыпыд сьöлöма, енбиа йöз волывлöны культура керкаö сьывны да аддзысьлыны öта-мöдкöд.
Гаж бöрын унаöн эз разöдчыны, öд Нювчимса сьылан котырын вöлiны кык чой, кодъяслöн Анна Степановна Лапшина (ныв дырйиыс Нехорошева) мамыс быдмис Донын, том дырйиыс мунiс Карнанаёльса лесопунктö, кöнi уджалiс увйысьысьöн. Лесопункт тупкöм бöрын семьянас вуджисны Нювчимö. Öнi аньлы 92 арöс. Н.В.Лыфарь, кодi лоö «Нювчим» овмöдчöминса юралысьöн, да А.В.Мясникова нывъясыс важöн нин кöсйисны волыны мамыслöн чужанiнö да аддзысьлыны рöдвужкöд. Кыдзи висьталiсны аньяс, налöн ичöтдырся кадыс колис Донын. Кутчысьлöм, сёрнитöм да öтувъя снимок вöчöм бöрын матыссаяс сёрнитчисны тшöкыдджыка йитчывлыны öта-мöдкöд.
Гаж видзöдысьяс сьöлöмсянь аттьöалiсны Нювчимысь воöм сьылысьясöс, сиисны сöвмыны водзö да шедöдны творчествоын ыджыд вермöмъяс, корисны нöшта волыны Донö да гажöдны мича сьылöмöн да йöктöмöн.
Нина Калистратова.
Комментарии: