Ыджыд пачысь чöскыд нянь

[ A+ ] /[ A- ]


Сиктад ёна на пöжасьöны ыджыд пачад. Асывнас кö водзджык мунан Руч кузя, керкаяссянь нырад öвтö чöскыд нянь кöр. Ломтысьöны пачьяс, да пöжасьöны аньяс. И пирöгъяс, и тупöся нянь. Быд кöзяйкалöн эм кутшöмкö аслас гусятор, кодöн оз юксьы мукöдкöд. Позьö аддзыны, кыдзи кыскöны гортаныс мешöкъясöн пызь, медым пöжасьны кузь тöлöн да чöсмöдлыны гортсаясöc. Ме и ачым радейта ас пöжастö. Пачö сюйла тупöся нянь, капустаа, сола тшака, нöкъя, юмов вотöса пирöгъяс да мукöдтор. Радейта, кор керкаад кылö чöскыд пöжас кöр, весиг быттьö шоныдыс пырö морöсöдзыд. 
Анна Ильинична Адамова пыр чуймöдö миянöс. Пызан вылад лэптас ас пöжастö, да он и тöд, мый весиг лöдöма. Öтчыд висьталiс, кыдзи босьтöма пельнянь, ра-зöдöма ыджыд рачö, кисьтöма йöв, пуктöма кольк, нöк и со дась чöскыд пöжас. Тайöс висьталiгöн ань весиг сералiс. А кодi оз тöд Владимир Трегубовлысь чöскыд шаньга-пирöгсö? Людмила Михайловна Чувьюрова аслас чериняньнас, важ ног пöжалöм шыдöса няньнас чöсмöдлiс Ыбсаясöс, кор «Сударушка» котыр ветлiс сэтчö гажöдчыны. Вöсни коркаа чöскыд пирöг-шаньга пöжалö и Татьяна Александровна Попова. Орччöн олысь Капитолина Александровна Порошкина аслас инька Роза Изосимовнаыс моз, няньсö мöдöдлö карöдз пи семьяыслы. Радейтö пöжавны яя да лук сора чипан колькйысь пöжасъяс. А Роза Изосимовналысь, шонъянöйлысь, сы мынта чöскыд черинянь да картупеля шаньга сёйлiм.
Казьтышта и ассьым мамукöс. Ольга Александровна Воробьёвалöн ми куим чоя-вока. Узьлiм пöлатьын да шойччан лунъясö садьмылiм пувъя да капустаа няньлöн пöжас кöрысь. Сы моз чöскыда артмылiсны рача шаньга да черинянь Татьяна Петровна Воробьёва моньлöн. Керчомъяö волiгöн пыр кежавла Галина Ивановна Степанова воча чой дорö, кодлöн ас пöжасыд век жö пызан вылас. 
Руч сиктын эм пöжасянiн, нянь да пöжас вайöны и мукöдлаысь, но öд гортса пöжалöмтö нинöмöн он öткодяв.
Екатерина УЛЬНЫРОВА.

Комментарии:

Добавить комментарий

Свежий выпуск: 28 марта

Осторожно — мошенники!