Неважöн Ягкöдж посёлокса культура керкаын воссис «Коми джодждöра» кыан станъяс вылын велöдчан жыр. Тайö баласö отсалiс пöртны олöмö Ягкöджса «Центр» нима асвеськöдлан котыр, кодi пырöдчис Коми республикаса юралысьлöн гранта конкурсö да лоис вермысьöн.

«Коми джодждöра» бала вылö торйöдöма 177 296 шайт. Тайö сьöм вылас дзоньталöма кыан станъяс вылын уджалан жыр да ньöбöма кыан оборудование. Талун кежлö Ягкöджса клубын сизим кыан стан, куимыс на пиысь — челядьлы. Ньöбöма «Данила», «Пристольный» да «Илья» нима станъяс. На отсöгöн джодждöраяс кындзи позяс кыны ковёр, салфетка, шарп, вöнь, ки чышкöд, занавес да уна сикас дöраяс. Март 29-öд лунö «Коми джодждöра» жыр восьтiгöн велöдiсны кысьыны. Зэв бур, мый öнi выль жыр восьтöм да кыан оборудование ньöбöм бöрын позяс велöдны кыны джодждöраяс челядьöс да гырысьясöс. Олöма йöз вермасны вуджöдны ассьыс тöдöмлунъяссö посни войтырлы. Водзö кежлö ягкöджсаяслы позяс велöдны мукöдöс, нуöдны экскурсия, котыртлыны выставка.

Кыдзи висьталiс Ягкöджса клубöн веськöдлысь Елена Залевская, джодждöраяс кыан мöвпыс воис налы Сыктывкарысь Эльвира Дмитрошинакöд тöдмасьöм бöрын, кодi уна во нин кысьö аслас шойччан керкаын. Ягкöдж посёлокса водзмöстчысь йöзкöд сёрнитöм бöрын найö шуисны гижны кыан жыр лöсьöдöм кузя бала. Та дор сувтiс да тшöтш отсалiс Вöльдiнса юралысь Ирина Александровна Андриевская.
Эз вöв ставыс сэтшöм кокньыдöн. Гижöм балаöн ягкöджсаяс пырöдчылiсны кык конкурсö, кöнi эз вермыны. Надея эз нин кут кольны, но коймöдысьсö видлöм бöрын ставлы воис бур юöр — асвеськöдлан котыр вермис. Найö бур йитöдаöсь асвеськöдлан котыръяслöн республикаса ассоциациякöд, кодi отсалiс гижны баласö колана ногöн.
Сиам ягкöджсаяслы öтувтчыны лöсьöдöм кыан станъяс дорын да петкöдны олöмö уна мича рöма кыöмтор.
Артур Гарнов.
Снимокъяс асвеськöдлан котырлöн.