Июль 16-öд лунö — Коми милициялöн лунö, пытшкöсса делöяслöн районса юкöнын кыпыда восьтiсны служитан мог олöмö пöртiгöн кулöмъяслы да налы, кодъяс тöждысисны лöнь олöм вöсна да абу нин ловъяöсь, казьтылан пас. 
Öнiя уджалысьясöс да ветеранъясöс чолöмалiс пытшкöсса делöяслöн юкöнса начальниклысь могъяс олöмö пöртысь Д.В.Ших. Пасйис, мый пас восьтöм — зэв тöдчана öнiя да аскиа уджалысьяслы, сы дорын кутасны кывзыны уджö выль босьтчысьяслысь кыпыд кöсйысьöм, пуктыны казьтылан лунъясö дзоридзьяс. Полицияын вöвлöм уджалысьяслöн да олöмаяслöн котырöн веськöдлысьöс вежысь В.С.Першин висьталiс, мый юкöн пыр сетiс ыджыд тöдчанлун томъясöс туйдöм-велöдöмлы. Таысь оз кольччыны и вöвлöм уджалысьяс, уна вося сямöн юксьöны томъяскöд. Тайö казьтылан пас лöсьöдöм йылысь сёрни кыпöдлiсны дас во сайын. Кольöм восянь ветеранъяс быд тöлысь чукöртiсны сьöм. Отсалiсны тшöтш пытшкöсса делöяслöн районса юкöн да районса администрация. Василий Степанович корис, мед эз вунöдны и найöс, кодъяс уджалiсны асьнысö жалиттöг, кадöн артасьтöг да, позьö шуны, «сотчисны» удж вылын. Тайö Евгений Вадимович Лодыгин, Василий Николаевич Кирушев. 
Районса администрацияöн веськöдлысь С.В.Рубан чолöмалiс чукöртчысьясöс, аттьöалiс да висьталiс полицияын уджалысьяслöн тöдчанлун йылысь. Найö лун и вой тöждысьöны лöнь олöм вöсна. Пыр туйын участокса уполномоченнöй. Овлö, мый оперуполномоченнöйлы суткинас шойччыны артмö куим час. Дежурнöй сайын регыдъя кадöн мыж эрдöдöм кузя удж котыртöм. Полицияса уджалысьяс олöмын шаньöсь да бурöсь, водзмöстчöны сиктса да районса олöмын да спортын. Сергей Владимирович пасйис, мый В.С.Першинлöн водзмöстчöмöн Кулöмдiнса öти выль уличалы сетiсны милицияса уджалысь Б.П.Липинлысь ним, кодi кулiс мыж вöчысьяслы паныд водзсасигöн. 
Ставнысö чолöмалiс и юкöн бердын общественнöй сöветöн юрнуöдысь О.В.Десятова. Д.В.Ших аттьöалан гижöдъясöн пасйис бура уджалысьясöс. 
Гижысьлöн снимок вылын:казьтылан пас восьтiсны полицияса старшина А.И.Пименов да прапорщик А.П.Ситников. 
Марина Дадашова.