Босьтчöны томъяс

[ A+ ] /[ A- ]

Андрей Валерьевич Микушев да Артём Александрович Напалков участокъясса ыджыд сяма уполномоченнöйясöн квайт тöлысь чöж туйдöм да велöдöм бöрын лöнь олöм вöсна тöждысьны босьтчисны Алексей Викторович Аверьянов да Максим Юрьевич Зезегов.
Алексей Викторович Визинысь. Кебанъёльö локтiс муса Даша ныв дорö. Дарья Павлусенко водзмöстчö посёлокса олöмын. Сiйö пырö томъяслöн котырö, нöшта юрнуöдö полициялы ас окота серти отсасьысьяслöн народнöй дружинаöн. Топыд йитöда пытшкöсса делöяс кузя министерстволöн районса юкöнкöд да участокса уполномоченнöйкöд. Сы дорö и шыöдчисны, мед зонсö ышöдас локны районö да пырны уджавны полицияö.

  • Коми пединститутысь география да биология факультет помалöм бöрын вит во велöдi Сыктывдiн районса Яснöгса шöр школаын. Вежоннас уджалi 44 час. Нöшта нуöдi кружокъяс да секцияяс. Нёль во уджалöм бöрын кöсйи пырны Визинын ГИБДД-лöн юкöнö, но эз артмы. Школаын велöдчысьяслöн лыд воысь-во чинö, да аскиа лунö видзöдöмöн эг бöрыньт вöзйöмсö. Велöдысьлöн да участокса уполномоченнöйлöн уджыс мыйöнкö öткодь. Школаын тэ уджалан челядькöд да бать-мамкöд. Колö кывны да кывзыны, гöгöрвоны да отсавны быдöнлы. А уполномоченнöй шымыртö сылöн участокын став олысьсö. Сэнi и танi уджыс сьöкыд да кывкутана, но зэв колана, — тöдчöдiс Алексей Викторович, кодi кольöм вося сентябрсянь тöдмасис уджöн, февральын донъялiсны, да лоис участокса уполномоченнöйöн.
    Июньсянь сiйö кывкутö лöнь олöм вöсна «Кебанъёль» да «Куж» овмöдчöминъясын. Буретш тайö сикт-посёлокъясын квайт тöлысь чöж уджалiс Артём Александрович Напалковкöд. Тöдмасис йöзкöд, кор дежуритан юкöнö волiс кутшöмкö лоöмтор йылысь юöр, петалiс-ны öтлаын. Сюся видзöдiс, кыдзи участокса уполномоченнöй да полицияса мукöд юкöнысь уджалысьяс туясьöны да юасьöны, сёрнитöны йöзкöд.
    Алексей Викторовичлöн уджалан жырйыс Кебанъёльын почта юкöнлöн керкаын. Эмöсь телефон, компьютер да сы дорö став коланаыс. Интернетысь юöръяс öтувъя видзанiнысь аддзö ставсö. Шуам, кöнi олö Иван Иванович Иванов, эм-ö сылöн машина либö öружие, мыждылiсны-ö либö кыскылiсны-ö кывкутöмö да с.в. Сувтöдiс кö тöдтöм мортöс, сэтысь жö позьö тöдмавны, абу-ö сiйö мыждöмъяс да пышъялысьяс лыдын. Могмöдiсны и машинаöн.
    Лöнь олöм вöсна тöждысьысь топыд йитöда овмöдчöминса администрациякöд, дружинникъяслöн котыркöд. Бöръяыскöд рытъяснас тшöкыда петалöны посёлокса уличаяс вылö, сёрнитöны-öлöдöны тыр арлыдтöмъясöс. Öтув уджалiсны посёлоклöн чужан лунö. Дурмöдчанторъяскöд водзсасян лунö разöдiсны öлöдан гижöдъяс, томуловлы висьталiсны, кутшöм лёк вайöны наркотикъяс дзоньвидзалунлы, мый сiйöн дурысьясöс вермасны кыскыны уголовнöй кывкутöмö. Алексей Викторович быд вежон волö тыр арлыдтöмъяслöн Кебанъёльса реабилитация шöринö, сёрнитö челядькöд, мед найö олiсны шаня. Велöдчан воын кутас кежавны и школаö. Талун сылöн участокын вит тыр арлыдтöм, кодъяс вермасны сетчыны лёкланьö, кыкöн вермасны котырöн вöчны лёктор. 11 морт пасйысьöны уголовнöй инспекцияын. Нёль морт пукалiсны сьöкыд мыж вöчöмысь, да урчитöм кадö налы колö лоны гортын, сы мындаöн жö тшöкыда зыксьöны гортаныс. Став лыддьöдлöм йöзыс сылöн видзöдлас улын. Видзöдö и, мед вöралысьяс колана ногöн видзисны öружие.
    Алексей Викторович ёртасьö спорткöд, ворсö волейболысь да баскетболысь. Тöвнас исласьö коньки вылын. Кольöм воын районса культура керкаын нуöдiс пытшкöсса делöяс кузя министерстволöн юкöнъясын уджалысьяслы сиöм гаж.
  • Удж сьöлöм серти. Топыд йитöда участокъясса став уполномоченнöйкöд, ыджыдджык опытаяс водзö туйдöны да отсалöны юкöнö том локтысьяслы. Кöсъя велöдчыны нöшта юристö. Майын Дашакöд ворсiм кöлысь. Кутам öтув лöсьöдны шуда поз, öтув жö сылöн дружинникъяслöн котыркöд тöждысьны лöнь олöм вöсна, — кывкöртiс А.В.Аверьянов.
    Максим Юрьевич Зезеговöс полицияын уджавны важысянь нин корис ёртыс. Но эз пыр кöсйысь. Армияöдзыс велöдчис техник-электрикö да уджыштiс Лунвыв электрическöй сетьяслöн районса юкöнын. Сэтчö жö локтiс служитöм бöрын да öттшöтш велöдчис Сыктывкарса вöр институтын инженерö. Но ёртыс эз öвсьы, коралiс патрульно-постöвöй службаö. Шуис видлыны. Татьяна Владимировна гöтырыс эз вöв паныд, кöть эськö бура тöдiс, мый верöсыс гежöда кутас аддзывны шойччан лунъяс, мый сьöкыд лоас бергöдчыны кык посни челядьöн. Ёна отсасьöны томъяслы Максимлöн бать-мамыс, босьтöны садйысь ыджыдджык Андрей внуксö. Кага вайöм бöрын Татьяна водз петiс уджавны, но эз тыр ставка вылö. Дзолюкöс видзны волiс инькаыс.
    Патрульно-постöвöй службаö и кöсйис пырны том морт, но пытшкöсса делöяс кузя министерстволöн районса юкöнысь начальник А.М.Литвинов вöзйис лоны участокса уполномоченнöйöн. Эз бöрыньт. Кольöм вося сентябрсянь тöдмасис нин уджöн. Туйдысь-велöдысь Андрей Валерьевич дорö шыöдчис, мед сiйöс босьтас туйö быд петiгöн. Тöдiс, мый вермас лоны быдторйыс, но эз чайт, мый медводдзаысьсö ковмас мунны кулöм морт дорö. Татшöмтортö аддзылан он быд лун. Ыджыд сяма уполномоченнöй висьталiс-петкöдлiс, кыдзи снимайтны кулöмасö, мый юасьны сыкöд олысьяслысь да с.в. Висьталiс лёк оласнога семьяяс, вежöрöн торксьöм йöз йылысь, кытчö бурджык öтнаслы не ветлыны. Татшöминъясö колö босьтны и мукöд юкöнъясысь уджалысьясöс. Тöдмöдiс йöзкöд. Март коймöд лунсянь Кулöмдiнын Максим Юрьевич уджалö ачыс нин.
    Быд асыв дежуритан юкöнö юöръяс воöм серти уполномоченнöйяслöн юкöнса начальник висьталö, кытчö мунны, мый вöчны участокса уполномоченнöйлы. Максим Юрьевич пыр жö петö туйö. Юасьöм да став колана материал чукöртöм бöрын печатайтö.
    Овлö, мый колö юасьны содтöд, корсьны мортсö. Став дасьтöм гижöд сетö начальниклы. Но медшöрыс — ставсö вöчны урчитöм кадö. Кор дежуритö, öтлаын уджалö туясьысьяскöд, дознавателькöд, уголовнöй розыскын уджалысьяскöд.
  • Тöрыт дежуритан юкöнö вежöрöн торксьöм мортсянь воис юöр, мый сiйö виис мортöс. Кöть и тöдса, мый сiйö висьö да и юö, колö мунны быть. Колöкö, збыль виис. Ветлiм патрульно-постöвöй службакöд. «Кулöм морт» вöлi ловъя. Звöнитчысь шуис, ме пö чайтi, мый вии сiйöс. Татшöм висьысьяссянь позьö виччысьны быдтор, — сёрнитiс Максим Юрьевич.
    М.Ю.Зезеговлöн уджалан жыр юрсикт шöрын «Шоныд сетан коми компаниялöн» Кулöмдiнса юкöнлöн керкаын. Эм интернет да сы дорö став коланаыс, телефон. Могмöдiсны машинаöн. Сöмын уджав да уджав. Андрей Валерьевич кындзи, пыр отсалöны и мукöд уполномоченнöйяс.
    Пасъям, мый апрельсянь юрсиктын участокса уполномоченнöйлы отсасьысьöн уджалö Вадим Егорович Опарин. Туйдö А.В.Микушев. Майсянь Югыдъягын выль уполномоченнöй Антон Эдуардович Абдуразаков, кодi водзтi уджавлiс пытшкöсса делöяс кузя министерстволöн юкöнын. «Вöльдiн» овмöдчöминын июньсянь Мантас Юозо Иванаускас, кодi уджавлiс патрульно-постöвöй службаын. Июньсянь Помöсдiнын участокса уполномоченнöйлöн уджöн тöдмасьö Никита Николаевич Игнатов. Туйдö-велöдö Борис Владимирович Зезегов, кодi кывкутö лöнь олöм вöсна Помöсдiнын да Руч вожъясын.
    Гижöд да снимокъяс Марина Дадашовалöн.

Комментарии:

Добавить комментарий

Свежий выпуск: 28 марта

Осторожно — мошенники!