Ноябр 28-öд лунö Кулöмдiнын воссис туйвыв мортлы керка. Татчö вермасны сувтлыны районöн тöдмасьны воысьяс. Татшöм керкаыс районын медводдза. Сiйöс вылö донъялiсны Коми республикаса культура, туристалöм да архивлöн делö кузя министерствоысь туристалан удж кузя начальник Н.Макарова, «Вöр-валысь торъя дöзьöр улын видзан юкöнъяслöн шöринысь» гöгöртасöн тöдмöдан-велöдан юкöнöн весьöдлысь Т.Витязева да финн-йöгра этнопаркысь директор Е.Иванова, кодъяс волiсны районö. 
Кыпöдiс керкасö Кулöмдiнысь В.Д.Напалков. Юрсиктын чужöм-быдмöм морт школа бöрын велöдчис Сыктывкарса вöр институтын, лоис инженер-экологöн. Сиктса зонлы вöр-ваö петалöм абу чуймöдантор, но, кыдзи висьталiс ачыс, туристалöмöн «висьмис» институтын велöдчигöн, кор нулiсны Полярнöй кытшдорса Уралö да «Югыд ва» национальнöй паркö. 
Велöдчöм бöрын вöлi армия, сэсся карын удж, но бергöдчис чужанiнас. Уджыштiс вöр-ва видзан райкомитетын, сэсся петiс ас нянь вылö. Ёна ыджыд полöм эз вöв, сы вöсна мый уджыс вöлi бура тöдса. Босьтчис ичöтторсянь. Медводз лöсьöдiс Дон да Кадам тыяс кузя ветлан куим ордым. Найö мунöны вöр-валöн торъя дöзьöр улын кутан юкöнъясöд да ковмис лöсьöдны торъя паспортъяс. Медым пöртны баласö олöмö, пырöдчис республикаса туристалан агентствоöн котыртöм конкурсö да шедöдiс 100 сюрс шайт. Сы вылö ньöбис пыж мотор. Та мында жö сьöм пуктiс ассьыс да кыпöдiс юрсюянiн, вöчис вöр керка сямаöс. Волысьяс вöлiны да мöвпыштiс кыпöдны бур керка. Ветлысьяс пиысь кодлыкö тырмымöн палатка, узьлан мешöк да бипур, а кодкö и кöсйö узьны небыд вольпасьын, пыравлыны душö, асмогасьны коз пу улын. В.Д.Напалков бара пырöдчис конкурсö, кодöс нуöдiс культура, туристалöм да архивлöн делöяс кузя министерство. Шуис вöчны 18-öд нэмся коми керка, кутшöмын нэмсö овлiсны да и öнi на олöны сиктъясын: посводзсянь веськыдладорын да шуйгаладорын ыджыд торъя жыръяс (комияслöн найö шусьöны тöвся да гожся жыръясöн), кöнi лоасны и душ да шоныд асмогасянiн. 
Вöр пöрöдöмсянь да кыпöдöмöдз ставсö вöчисны асьныс. Тшуписны Дереваннöйысь Олег Тарабукин да Георгий Торопов, а кыпöдiсны водзтi моз помечöн. Керъяссö сiсьмöмысь мавтiсны сорасöн, пытшкöссяньыс эз лöсавны, а сöмын краситiсны. Сувтöдiсны ыджыд пачьяс. Öшинь дорын пызан да лабичьяс. Стен пöлöн залавка, джоджын ас кыöм мича джодж дöраяс. Узьны торöны этша вылö квайтöн: эм нёль крöвать (кыкыс пач сайын), кык-ö-куимöн тöрасны пöлать вылö. И тадзи кыкнан жырйын. 

Керка вöчны босьтчытöдз отсöг вичмис районса администрациясянь: сiйö вештiс пуысь вöчасян станоклысь джын донсö. Эз ковмы вештысьны тьöс-плакаысь, ставсö вöчисны пöрöдöм вöрысь асьныс. 
Районö волысьяслы Василий Дмитриевич вермö котыртны Дон да Кадам тыяс вылö ветлöм, гожöмын кыйыштны чери, тöвнас иславны лямпаясöн да «ватрушкиясöн», мунны «бананöн» лым вывтi ветлан техника дорö пысалöм доддьöн да с.в. Вöр-ваöд пöттöдз «уялöм» бöрын позяс небзьöдчыштны пывсянын. В.Д.Напалков нöшта кöсйö кыпöдны сьöд пывсян. Сiдзжö кöсйö вöчны турунысь лэбув, кöнi позяс петкöдчыны быдторйöн. Сiдзжö позяс велöдны пöжасьны ыджыд пачын. 
Грантöн урчитöмторъяс серти колiс корсьны вит уджъёртöс. Татшöмъяс лыдын «Зелёный свет» туристалан агентство, кодi кутас вузавны татчö волöм могысь путёвкаяс. Интернетын туристалан ордымъяс йылысь паськыда юöртiс асшöр уджалысь В.А.Игнатова. Лöсьöдiсны Донысь В.С.Павловкöд сёрнитчöм, мый локтысьясöс кутас вайöдлыны сылöн «Купеч Митрей керкаö». Сёрнитчöм серти ичöтджык донöн вузалö запчасьтъяс да техника «КПД» лавка. Сiдзжö эм ва вылын неминучаысь видзчысян республикаса котыркöд сёрнитчöм, код серти В.Д.Напалковлöн эм позянлун велöдны йöзöс ветлыны пыжöн да лым вывтi ветлан техникаöн, сетны та йылысь документ. Дась ёртасьны асшöр уджалысь В.С.Першинкöд, код дорын позяс чöсмасьны коми вöлöгаöн, а, гашкö, и велöдчыны сiйöс вöчны. 
Вöчöма зэв нин уна, но унатор жö колö на вöчны. Со мый висьталiс «Эжва йывса керка» бала олöмö пöртöм йылысь Василий Дмитриевич Напалков: 
— Керка кыпöдöм вылö грантлöн ыдждаыс 400 сюрс шайт. Та мында жö урчитiсны пуктыны аслым. Нöшта 100 сюрс вичмис сантехника вылö (та мындаöс жö пуктiм ассьыным нюжöдны би). Лоис гöгöрвоана, мый тайö сьöмыс ставсö эштöдны оз тырмы. Уджйöзалiм банкысь. Талун кежлö ставыс сувтiс 2,5 миллион шайт. 
Кыв шутöг, вöлi сьöкыд. Ыджыд аттьö Дмитрий Егорович да Александра Афанасьевна бать-мамлы, кодъяс пыр ышöдiсны менö, эз сетны усьны лолöн, отсалiсны сьöмöн и бур кывъясöн. Найö век шулiсны: «Тэ босьтчы да вöч. Артмас кöть оз — ми век лоам орччöн». Аттьö Елена чойлы, кодi ёна отсалiс туристалан туйвизь лöсьöдöмöн. Ковмис ёна мырсьыны аслым: ачым пöрöдчи, тшупси, вöчи пытшкöс уджъяс. Пачьяс тэчис Иван Кипрушев. 
Грант вылö бала гижи да ставсö арталi ачым. Медым бура артмис мöвпыштöмторйыд, колö, öти-кö, ёна эскыны, мый ставыс артмас, мöд-кö, быд уджö, тшöтш и сьöкыдас да няйтас, кутчысьны аслыд. Дерт, сё пöв кокни, кор эмöсь ёртъяс, матыссаяс да рöдвуж, кодъяс оз сöмын ышöдны кывъясöн, но и отсалöны, эскöны, мый ставыс артмас. Аттьö Василий Иванович да Алёна Ивановна Кочановъяслы — тестьлы да тьöщалы. Вöр пöрöдöмсянь да вевт улö вайöдöмöдз отсасисны Михаил Холопов, Дмитрий Тертычный, Дмитрий да Николай Тимушевъяс, Анатолий Ульныров, Григорий да Иван Кипрушевъяс, Денис Ивашев, Валерий Напалков, Андрей Зезегов, Иван Игнатов, Антон Кочанов, Константин Холопов, Василий Попов. 
Эжва йывса керка восьтiгöн В.Д.Напалковлысь зiльöмсö пасйис районса администрацияöн веськöдлысьöс вежысь Н.А.Левченко. Сiйö эскö, мый татчö волысь лоас тырмымöн, тайö бала дорас позяс кыскыны зэв на унаöс, кодъяс пуктасны районын туристалöм сöвмöдöмö ассьыныс пай. 

Вылö донъялiсны туй йöзлы керка карысь воöм кывкутысь йöз. Найö кывкöртiсны, мый танi лоö бур дзик быдöнлы. 
Бокиысь волысьясысь öтдор Эжва йывса керкаын позяс шойччыны и районын олысьяслы. Шойччанiн воссьытöдз на «сарапана радио» пыр тöдмалöм бöрын унаöн шыöдчисны, медым нуöдны танi выль вося шойччан рытъяс. Донъяс «оз курччасьны», а олöмаяслы эмöсь кокньöдъяс. 
Эжва йывса керка восьтiгöн вöлi кöдзыд, ывлаын сулалiгöн вель ёна кынми. Керкаас пырöм бöрын вöлi зэв окота кайлыны пöсь паччöрас, шонтысьыштны. Сёрни серти, татшöм мöвпыс юрас воöма уналы. Унаöн жö шуисны, мый быттьö бергöдчылiсны челядьдырö, ыджыд мамлöн ли пöчлöн керкаö, да шоналiс сьöлöм. Мед тадзи шоналас сьöлöм да лов дзик быдöнлöн, кодi волас татчö. 
Лидия ЛИПИНА. 
Гижысьлöн снимокъяс вылын: шойччан керка; гöрд лента вундöны (шуйгавывсянь) В.Д.Напалков, Н.Д.Макарова, Н.А.Левченко; ворсiс гитараöн да мукöдторйöн 
медшöр ихтиолог А.В.Попов.