Олысяяс 

Ёгорлöн лёка кутiс уджавны сьöлöмыс да водтöдiсны сиктса бурдöдчанiнö. Куйлiсны сöмын куимöн. Кыкыс регыд мунiсны да вылыс судтаын, кöнi куйлiсны бурдöдчысьяс, колис öтнас. Велалöма да, водiс водз. Войшöр гöгöрын садьмис улi судтаын öдзöс дзуртыштöмысь. Кодкö ёсь каблукöн котшкигтырйи кайис поскöд вылi судтаö, пырис орчча жырйö да öзтiс би. Чайтiс, мый тайö улi судтаысь вой кежлö кольччöм бурдöдысь да шыасис: 
— Надежда Николаевна, юрöй висьö да, лекарство кö сетанныд, эськö бур вöлi. 
Но жырйын некод эз вöв. Дзебсьыны вöлi некытчö. Шöйöвошис да весиг тiрзис кок лекйыс. Сэсся быттьö кынмис сулаланiнас. Коркö да вермис вöрзьыны, лэччис улi судтаас. Надежда Николаевна узис пызан вылö лэччысьöмöн, джоджын кокъяс улас вöлi книга, буракö, лыддьысьöма. 
Ёгор бöр кайис вылi судтаö, водiс да кöсйис узьны водзö, но дзуртыштiс орчча жырйысь öдзöс да ёсь каблукъяснас тотшкöдöмöн кодкö кутiс лэччыны пос кузя. «Час, вöтчыла бöрсяньыс. Кодкö, буракö, гусясьны пыралö», — мöвпыштiс Ёгор, öдйö чеччис узьланiнсьыс да кутiс мунны послань. Синъяс водзас мыйкö югнитiс да бырис. Эз кут кывны и тотшкöдчöм шы. Ёгор лэччис пос кузя, мунiс пызан дорö. Вой кежлö кольччöм бурдöдысь лыддьысис нин. 
— Мый нö лоис? — юалiс сiйö Ёгорлысь, и бурдöдчысь висьталiс унсö пальöдысь йылысь. Надежда Николаевна шуис: 
— Тайö танi кулöм йöзлöн ловъясыс ветлöдлöны. Эн пов, тэнö оз вöрзьöдны. Ме водзынсö полi, а сэсся велалi. 

Турун ош 

Тоняöс да Ваняöс ыстiсны вайöдны йирсянiнысь мöсъясöс. Том йöз усисны шемöсö, кор мöсъяскöд орччöн найö аддзисны ыджыдсьыс-ыджыд ошкöс. Сiйö мöсъяс моз жö йирсис, эз видзöд косявлыны пемöсъяссö. 
Эз тай ков плеть, кыкнанныс чепöсйисны гортлань. Öдйö и воисны бур туй вылöдз, кöнi чурка вылын пукалiс олöма нин Доментий. Кытшовтöма вöрсö тшак вотiгмоз да мудзöма. Тоня да Ваня висьталiсны, мыйла котöртöны. 
— Сiйö оштö ме аддзылi унаысь нин, мöсъяскöд и олö. Татшöмъяссö турун ошкöн шулöны. Эськö тiянöс нинöм эз вöч, — эскöдiс олöма морт. 
— Ми нö кысь тöдам? — век на шемöсын вöлiны томъяс. 
Иван ЛЮТОЕВ. 
Керчомъя.