Павел Андреевич Расов, менам пöль, чужліс 1901-öд воын Ручса сиктсöвет улö пырысь Лунпока грездын ыджыд семьяын. Бать-мамыслöн вöлі сизим пи да кык ныв. 
Пöльöс война вылö босьтісны 1941-öд вося декабрын (война пуксигöн сылöн вöлі бронь – Кулöмдінын вöчисны аэропорт). Кыдзи и Комиысь босьтöм мукöд салдатöс, сійöс пыр жö мöдöдісны фронт вылö: лыддисны, мый комияс да сибирсаяс – медбур кыйсьысьяс, ылісянь веськалöны пасö. Воюйтіс Рытыв-Войвыв фронт вылын, дорйис Ленинград. Сылöн усьöм йылысь гижöд менам пöчлы воис 1942-öд вося апрельын: юöртісны, мый воши лы ни ку. Павел Андреевичлысь нимсö пасйисны Коми республикаса Паметьлöн книгаö. Эм сійö и Великöй Отечественнöй война вылын усьöмъяслы сиöм пас вылын Ручын. 
Пöльлöн колины Анна Ивановна гöтыр да куим челядь: Зосим пи (менам бать) да Клавдия да Лидия нывъяс. Талун ловъя сöмын Лидия Павловна, коді олö Ухтаын. 
Фронт вылö пöльлöн семьяысь мунісны вит вок: Павел Андреевич (1901), Дмитрий Андреевич (1903), Егор Андреевич (1905), Зосим Андреевич, Илья Андреевич (1909). Кыкöн, Михаил да Иван Андреевичьяс, эз веськавны ыджыд арлыд вöсна. Ловйöн локтісны Дмитрий да Егор. Дмитрий война бöрын уджаліс «Ручевскöй» совхозын Лунпокаын бригадирöн, а Егор – Озъягса лесопунктын. 
Ми кыпалам асланым рöдвужöн, кодъяс дорйисны вöрöгысь чужан мунымöс, асланыс олöмöн шедöдісны вермöм. Нэмъяс кежлö паметь, нэмъяс кежлö слава! 
Татьяна Тарабукина, 
Сыктывкар.