Василий Ильич Нестеров чужис Кулöмдінын 1913-öд вося август 3-öд лунö крестьянин семьяын. Батьыс висьмис туберкулёзöн да кувсис зэв водз. Колисны кык ныв да Василий пи. Коліс отсасьны мамыслы, но 7 класс помаліс. Кыдзи грамота тöдысь, сюсь, зіль мортöс, корисны уджавны милицияö. Öтчыд удж кузяыс кайисны Скöрöдумö. Сэні Василий тöдмасис том нывбаба Анна Пашнинакöд, кодöс вöлöм зэв ёна увтыртö верöсыс, кöть вöлі нин ичöт кага. Василий гöтрасис Анна вылö, а öд аслыс муртса на тырис 18 арöс. 
Война пансьöм бöрын айловöс босьтісны фронт вылö. Гöтырыс колис квайт челядьöн (вöлі вит пи да öти ныв, коді война кадö висьмис да кувсис). 
Василий Ильичöс мöдöдісны велöдчыны офицеръяслöн школаö, кöні сетісны лейтенантлысь ним да пыр жö мöдöдісны Ленинградö. Блокада чöж сійö видзис Выборг, вöлі мотострелковöй ротаса командирöн. Ранитчыліс. Гортас локтіс 1946-öд воын. Зонпосни унаысь юасьлісны война йылысь, но Василий Ильич некор эз вермыв висьтавны помöдз, мый сэні вöчсис. Заводитлас эськö, а сэсся гöрддзасяс горшыс, синъяснас мунас ылö-ылö, бан боктіыс тюрö синва. Тыдалö, сэтшöм вöлöм сэні воюйтöмыд, абу сідзи, кыдзи петкöдлöны киноын. 
Локтöм бöрас гозъя нöшта на чужтісны öти нылöс. Василий Ильич бригадираліс «Сталинец» колхозын. Кутшöмкö кад юрнуöдіс «Вторчермет» котырöн – примитіс да мöдöдіс водзö кöрта кöлуй. Уджаліс и кер дорын. Öти кывйöн кö, вöлі сэні, кытчö индыліс коммунистическöй партия. 
Василий Ильичöс пасйисны «Гöрд звезда» да Великöй Отечественнöй войналöн орденъясöн, «За оборону Ленинграда», «За отвагу» да юбилейнöй медальясöн, эм и «Уджвывса ветеран» медаль. 
Василий Ильич кувсис Кулöмдінын 1988-öд вося июнь 12-öд лунö. 
Валентина Нестеренко, 
Кулöмдінса олöма йöзлöн котырöн веськöдлысь. 
Снимок вылын: В.И.Нестеров.