Сентябр 22-öд лунö Кебанъёльса «Дружба» спортзалын муніс олöма йöзлöн лунлы сиöм ордйысьöм. Таво чукöртчыліс куим котыр: Кулöмдінысь «Долголетие», Кужйысь «Оптимисты» да Кебанъёльысь «Убойная сила». Олöма йöзöс медводз чолöмалісны ветеранъяслöн районса сöветöн юрнуöдысь Г.А.Кравченко да овмöдчöминса юралысь А.И.Валуйских, ставныслы сиисны мойвиöм да вермöм.
«Гажа стартъяс» збыльысь вöліны гажаöсь. Ми котралім ласты пасьталöмöн, мешöкö пырöмöн, чеччалім мачöн да скакалкаöн, пуктім да босьтім «картупель», торъя конкурсъяс мунісны капитанъяслы да котыръяс вöсна «висьысьяслы». Котыръяс пиысь некод эз кöсйы сетчыны, быдöн зілис лоны медводзын. Нöшта коліс петкöдлыны «гортса удж» — сценка, сьыланкыв. Залын пукалысьяс эз дугдывны сералöмысь да кекöначöмысь. Тайö ордйысьöмъясыс лоисны спортлöн, дзоньвидзалунлöн, том ловлöн ыджыд гажöн!
Ордйысьöмъясын вермис Кебанъёльысь «Убойная сила» котыр. Став котырлы вичмисны грамотаяс да юмов козинъяс, а котыръяс вöсна «висьысьяслы» козинöн лоис кыпыд ловру. Спорт гаж котыртöмысь да нуöдöмысь аттьöалан гижöд сетісны Татьяна Борисовна Никитиналы.
Котралöм-ордйысьöм бöрын юим чай, юксим сьöлöмкылöмъясöн. Ёна жö и чöскыдторъяс дасьтöмаöсь асшöр уджалысьяс Н.И.Зубко да И.П.Бигбулатов. Выль аддзысьлöмъясöдз!

Нина Плескач,
Кебанъёльса ветеранъяслöн котырöн юрнуöдысь.
Снимок гижысьлöн.