Выльгортысь Светлана Николаевна Игнатова мамыс вылö видзöдöдöмöн 10-öд классын нин аслыс шуис, мый лоас садйын воспитательöн. 1996-öд воын помалiс школа, а 1999-ын Сыктывкарса мöдöд номера педколледж. Медводз уджыштiс карса садйын, а сэсся сьöлöмыс кыскис чужанiнас. Пырис Помöсдiнса «Шондi» садйö и сэнi зiльö 12 во. Светлана Николаевна челядькöд петкöдчö зэв уна конкурсъясын, кöнi тшöкыда вермöны. Нывбаба ыджыд тöдчанлун сетö зонпоснилöн дзоньвидзалунлы: нуöдö лолалан да лысьöмлы гимнастика, йога да с.в. Сöвмöдö зонпоснилысь вежöр, велöдö висьтавны ассьыныс мöвпъяс. Сiдзжö некымын во нин нывбаба веськöдлö воспитательяслöн Помöсдiн вожса методическöй котырöн. Нуöдö чукöртчылöмъяс, велöдöмъяс да конкурсъяс. Челядьлы нуöдлiсны «Сюсь юръяс», «Морт — вöр-валöн ёрт», «Шемöсмöданторъяслöн эрд», «Гажа котралöмъяс», «Коми йöзлöн ворсöмъяс» да с.в.
— Садйысь менам медводдза петысьяс 2020-öд воын помалöны школа, а ме казьтывла сэтшöмöн, кутшöмöн найö вöлiны ичöтдырйиныс. Век уджала гырысь челядькöд и менам быд во эмöсь школаö петысьяс. Найö тшöкыда волывлöны бать-мамыскöд босьтны чой-вокъяссö. Юася, кыдзи найö велöдчöны, кытчö пырöдчöны. Садйö ветлысь öнiя челядькöд öтув бöръям, мый кутам велöдны, вöчны вежон чöж, асьным мöвпыштам ворсöмъяс, серпасасям, бала серти вöчам мыйкö аслыспöлöстор. Ог вунöдöй ёнмöдчыны, ворсам футболысь да пионерболысь. Зэв ёна отсасьöны бать-мам: лöсьöдöны да нуöдöны экскурсияяс, ворсöдöны, дасьтöны став коланторсö, гажъяс кежлö вурöны костюмъяс да асьныс окотапырысь петкöдчöны. Челядькöд öтув вöчöны книгаяс да мукöдтор. Шуам, кольöм воын вöчисны ичöт Кремль, выль во водзвылын тöдмасисны мукöд странаса Кöдзыд пöлькöд. Ме тöда, мый быд кага аслыспöлöс, видзöда, кодлöн кутшöм сям. Кöть ме тшöкыда уджала гортын шойччан лунъясö, аслам уджöй ёна воö сьöлöм вылö, челядькöд вунöдлан став сьöкыдлунъяссö, — висьталiс Светлана Николаевна.
Галина КЛЮЖЕВА.
Снимок С.Н.Игнатовалöн чукöртöмысь.