Ветлiм Санкт-Петербургö

[ A+ ] /[ A- ]

Ми — олöма йöз, но ог на кöсйöй кольччыны олöмсьыс. Вöдитчам компьютерöн, эмöсь ВКонтактеын асланым лист бокъяс. Гижасям, юксям выльторъясöн, вöчöмторъясöн да с.в. Ми, «Дзоньвидзалун» котырö пырысьяс, гежмалiм нин ставнас районсö, волiм став нималанаинас, снимайталiм. Унаысь ветлiм быдсяма ордйысьöмъяс вылö орчча Кöрткерöс районö, лэччылiм юркарö видзöдны спектакльяс да концертъяс. öтчыд Кöрткерöсö лэччылiгöн тöдмасим туристъяслöн федерация агентствоöн веськöдлысь Г.Е. Марковскийкöд. Сiйö юасис миян ветлöм-мунöм йылысь, корис гижыштны туристалöм кузя да мöдöдны тшöтш фотояс аслас лист бок вылö. Геннадий Евгеньевич вылö донъялiс миянöс да 2017-öд вося декабр 8-öд лунö Коми наука шöринын 9 мортлы сетiс «Россияса турист» удостоверениеяс да туристъяслысь морöсвывса пасъяс. Кольöм вося октябрын сiйö вöзйысис нулыны миянöс Санкт-Петербургö. Мöдöдiс экскурсиялысь «Люблю тебя, Петра творенье» программа. Ветлыны окотитысьыс чукöрмис 8 морт. Кузь туйö Кулöмдiнсянь петiм ноябр 29-öд лунö. Лэччим юркарö рытъя автобусöн. Войсö коллялiм аэропортын. Эг шойччöй, но ловнаным эг усьöй, öд миянöс виччысис Россиялöн войвывса юркар. Лэбзим бура, но эг öти рейсöн, самолётас нуръясьыштiм. Питер миянöс паныдалiс мича шондiа лунöн. Пулковосянь мунiм Можайскöй уличавывса дзоляник гостиницаö. Олiм сöмын ми, кык морта номеръясын. Быд жырйын вöлi телевизор. Торъя жырйын позис пусьыны. Миянлы ёна мойвиис — Геннадий Евгеньевич рыт и асыв пусис-пöжасис. Сёяныс вöлi чöскыд, пöтöса, уна пöлöс. Ми сöмын мыськалiм дозмуксö. Луннас сёйлiм столöвöйын. Асланым бур экскурсоводöн волiм уналаö. Геннадий Евгеньевич абу нин öтчыдысь вайлöма миян кодь котыръястö. Ветлiм Дворцовöй площадь да Невскöй проспект вылö. Петропавловскöй крепосьтын аддзылiм «Аврора» крейсер. Нимкодясим Чижик-пыжиклы памятникöн. Бöръя лунас ветлiм океанариумö, кöнi 57 аквариумын меститчöны море-океанса быдпöлöс олысьыс.
Тöдмасим и мукöд историческöй местаясöн. Синмö шыбитчис, мый олöмыс танi гажаджык рытнас. Уличаяс, проспектъяс вылын уна том йöз, гажöдчöны, ворсöны уличвывса музыкантъяс.
Унатор на колис казьтыланторйöн — ставсö он гиж. Колö ветлыны да аддзывны ас синъясöн. А ми ёна содтiм Санкт-Петербург йылысь ассьыным тöдöмлунъяс. Дерт, сьöмыс мунiс уна жö: самолёт вылö öтарö-мöдарö — 10 сюрс шайтöн, гостиницаын олöмысь да сёйöмысь — 8 сюрс. Содтöд на карöдз автобусöн мунöм-локтöм да Питерöд ветлöдлöм вылö. Кöсъянныд кö ветлыны тадзи жö — ковмас чöжыштны сьöм.

Диана Мингалёва,
«Дзоньвидзалун» клубöн веськöдлысь.
Снимок гижысьлöн.

Комментарии:

Добавить комментарий

Свежий выпуск: за 14 ноября