Дас квайт арöса нывкалы вöзйисны уджавны садйын пусьысьöн. Эз повзьы сьöкыдысь да вит во чöскыда вердiс комын кагаöс. Ставсö вöчис öтнас: и пусис, и мыськалiс тасьтi-пань. Радейтiс челядьöс, мукöд дырйи весиг вайлiс гортас, пуксьöдлiс да ворсöдiс. Война бöрся вояс мырддисны челядьдырсö, Донысь Анна Васильевна Напалкова верстяммис кадысь водз. Сiйö чужис 1939-öд вося январ 13-öд лунö вит челядя семьяын. Василий Андреевич батьыс уджавлiс колхозын, а сэсся мунiс тышкасьны вöрöгкöд. Локтiс гортас висьöмöн, 1949-öд воын кувсис. Аньлöн пыр на син водзас батьыскöд пастукалöм. Мöсъяссö нулiсны Колода ягöдз. Домна Михайловна мамыс тшöтш уджавлiс колхозын. Верöсыслöн кулöм бöрын и овмöс, и челядь усисны сылöн нэриник пельпом вылö. Нывка аддзис, кутшöм сьöкыд мамыслы да квайт классöдз и велöдчис, сэсся пырис уджавны. Казьтылiс, кыдзи кузь доддьöн олльысь кыскалiсны тöв кежлö пес. Садйын пусьöм бöрын корисны уджавны вузасянiнö, но бöрыньтiс велöдчытöм вöсна. Пырис туй вöчан да дзоньталан юкöнö рабочöйöн. Мастернас вöлi Иван Васильевич Кузнецов. Висьталö, кыдзи вöчисны Джеджимö туй. Васöд, тракторъяс эз сибавны, да аньяс айловкöд öттшöтш пельпом выланыс петкöдiсны пöрöдöм пуяс. Мастер сöмын шензис том нывбабалöн вын вылö, öткодялiс айловкöд. Вöчисны и Кулöмдiнöдз туй. Донын воссис нуръясянiн, да Анна Васильевна Нина Анатольевна Петровакöд кутiсны пусьыны да вердны сикт пыр мунысь йöзöс. Бöрынджык ань дас вит во пусис школаын. Öнi на сиктсаяс аттьöалöны чöскыда вердöмысь. Весь эз пукав пенсия вылö петöм бöрын, зiлис öти асшöр уджа-лысь дорын, вузасис, могмöдiс сиктсаясöс кöлуйöн. Эз öтдортчы сиктса олöмысь, аньяскöд сьылöм-йöктöмöн ветлiсны Керчомъяö, Лöгинъягö да мукöдлаö. Пырис сиктсöвет бердын котырö, кодлöн видзöдлас улын вöлiны лёк оласнога семьяяс. Велöдiсны-öлöдiсны, мед олiсны бура, тöждысисны челядь вöснаыс.
Важас бергöдчылiгöн аньлöн унаысь доршасьлiс синваыс. Мамыс кувсис 80 арöсöн. Мунiс гортсьыс да вошис. Корсисны дыр, бöрыннас сюрис вöрысь кулöмöн нин. Абу жö нин ловъяöсь чоя-вокыс. Вера Васильевна чойыс вузасис, абу нин таладор югыдас. Елена Васильевна мöд чойыс война вылын вöлi зенитчицаöн. Ань казьтылö, кыдзи вочаалiсны сiйöс. Кор локтiс гортас, дыр шензисны. Ёна вежсьöма, быдмöма-верстяммöма. Петлiс Джеджимö верöс сайö. Дина Григорьевна Холопова нылыс олö Сыктывкарын, Куратов нима музейын уджалö директорöн. Анастасия Васильевна коймöд чой олiс Сосногорскын. Егор Васильевич вокыс олiс чужанiнас, уджалiс совхозын, гöтырыскöд быдтiс квайт челядьöс. Нэм чöжыс кыйсис, вöлi шань да бур мортöн.
Ачыс Анна Васильевна верöс сайö петiс кызь арöсöн. Сьöлöмсö вöрзьöдiс Донысь жö Александр Петрович. Гозъя чужтiсны-быдтiсны вит челядьöс. Кöзяин кулiс водз, да ань öтнас ныв-пиянсö сувтöдiс кок вылö, петкöдiс ас олöмö. Венiс став сьöкыдсö, весиг рöдвуж отсöгöн кыпöдiс керка. А сэсся нöшта öти шог суис сiйöс. Германияын служитiгöн кулiс Василий пиыс. Олöмас кутчысьны отсалiсны удж да челядь. А найö лоисны бур йöзöн. Иван пиыс олö сыкöд. Валентина вузасис, öнi пенсия вылын. Антонина велöдчис воспитательö, олö Якутияын. Елена Сыктывкарын, патераяс вузалöм кузя директор. Пётр сьылö-йöктö «Асъя кыа» ансамбльын. Ставныс ыджыд тöждаöсь муса да радейтана мам вöсна. Со и январ 13-öд лунö волiсны матö ставныс. Шоныд кывъяс вичмис насянь да ыджыд рöдвужсянь, ставныс сиисны ён дзоньвидзалун да кузь нэм. Шойччигöн нин Анна Васильевна пырöдчис олöмаяслöн котырö. Раиса Семёновна Тимушевакöд тшöкыда волывлiсны ас сиктса, Джеджимса да Шöръягса олöма йöз дорö, олiсны налöн тöжд-могъясöн.
Дыр да бура уджалöмысь Анна Васильевналöн уна аттьöалан гижöд да почёт грамота, «За долголетний и добросовестный труд», «Медаль материнства» медальяс. Сiйö Коми республикаса пыдди пуктана ветеран, уджывыса ветеран. Эмöсь и мукöд пасъяс.
Нина Калистратова.
Снимок гижысьлöн.