Январ 22-öд лунö тырö кызь во, кыдзи миян дона пиным, Кулöмдiнысь Владимир Лодыгин Чечняын служитiгöн сетiс ассьыс олöмсö.
Владимир чужлiс 1979-öд вося апрель 16-öд лунö. Семьяын вöлi мöдöн, ныв бöрын зэв колана кагаöн. Торйöн нин нимкодясис батьыс, öд пи — сiйö овсö и вужсö водзö паськöдысь. Быдмис визув зонкаöн, вöлi сибыдöн да варовöн, мыйöн дзолядырсяньыс ас дорас кыскис уна ёртöс да йöзöс.
Миян, бать-мамлöн, уджалiгкостi зонка векджык олiс ыджыдджык Валентина чойыслöн видзöдлас улын. Нывка вöлi кывзысьысь, тöждысьысь, быд уджö чепöсйысь, и вокыс сылысь босьтiс унатор, олiсны ёртасьöмöн. Ми пыр зiлим велöдны Володяöс быд уджö: куртны и ытшкыны, пелькöдчыны гортын, отсасьны град йöрын гöригöн и пуктысигöн. Ёна радейтiс батьыскöд ветлыны вöрö вотны тшак.
Школа помалöм бöрын мунiс велöдчыны Сыктывкарса 28-öд номера профтехучилищеö телемастерö. 1998-öд вося ноябрын сiйöс босьтiсны армияö. Веськалiс Владикавказö, лоис связистöн. Сэсся недыр мысти нуисны Чечняö. Та йылысь Владимир, вöлöм, юöртöма сöмын медматысса ёртыслы да эз тшöкты висьтавны миянлы. А миянлы, гортсаясыслы, гижис: «Муса мамук да папук, чой! Менам ставыс бур, служба лöнь…». Мöд письмöын, кодöс гижис январ 14-öд лунö, бара жö, кöнкö, миянлысь лов кыпöдöм могысь ошйысис: «Гажаа пасйим Выль во, вердiсны-юкталiсны пöттöдз. Май праздникъяс кежлö, гашкö, лоа нин гортын. Колöкö, воа и чужан лунöдз на. Таво градтö пуктам öтлаын…». Тайö Владимирлöн вöлi бöръя письмö.
Ми пыр чайтiм, мый Чечняö, би улö, сiйö оз веськав, регыд локтас гортö. Но миянлы воис сöмын шог юöр, кöнi гижöма, мый январ 22-öд лунö бандитъяскöд ёсь тышын налöн взводыс веськалiс гранатаяслöн би улö, и Володя кувсис сьöкыда доймалöмла. Цинка гортйын сiйöс вайисны гортö сöмын февраль дасöд лунö. Ростов-на Донуöдз сыла ковмис ветлыны зятьлы. Февраль 12-öд лунö бöръя туйö колльöдiм став сиктöн, некод эз коль бокö, тыдалö, тайö ставлы вöлi ыджыд шог. Некор бырлытöм дой лоис и миянлы, матыссаясыслы. А öд сылы вöлi овны да овны на. Став олöмыс вöлi на водзын. Но…
Кулöмдiнса шöр школалöн стенын öшалö, пинымлы, Владимир Лодыгинлы, сиöм казьтылан пöв. Сэнi велöдчысьяс кодь жö том зонлöн подвиг вöчöмыс, салдатлысь мог олöмö пöртiгöн немжалиттöг ассьыс олöмсö Айму вöсна сетöмыс ныв-зонлы лоас ловъя примерöн. Быд во январ 22-öд лунö школаса велöдысьяс да велöдчысьяс пöся казьтывлöны сiйöс, нуöдöны паметьлысь вахта. Юрсиктын выль уличаясысь öти новлöдлö Владимир Лодыгинлысь жö ним.
Став бур йöзöс — рöдвужöс, тöдсаясöс, öти классын велöдчысьясöс — корам казьтыштны Владимирöс бур кывйöн.
Мария Семёновна Лодыгина,
мам.
Кулöмдiн.