Районын öтнас

[ A+ ] /[ A- ]

  • Меным, эськö, колiс чужны зонмöн, дзолядырсянь пыр вöлi винёлöн да вильышöн да. Ыджыдджык Алексей вокöй öти кадö пырöдчис ушу вермасьöмö. Окота лоис тшöтш пырöдчыны спортö. Гашкö, сысянь и чужис дзоньвидза оласногö кутчысьöмыс, — восьтiс сьöлöмсö Надежда Владимировна Попова.
    Юркарса мöдöд номера педколледжын физкультурникö велöдчигöн, куим во чöж ветлöдлiс дзюдо секцияö. Босьтчисны 35-öн да помас колисны сöмын витöн. На-деждалы тайö дзик висьöм кодь вöлi, быть пуктiс ас водзас мог сöвмыны тайö туй визьын. 2004 воын вермасьöмын шедöдiс мöдöд места да сылöн лоис турунвиж вöнь.
    2005 восянь босьтчис уджавны социальнöй управлениелöн семьялы да челядьлы социальнöй отсöг сетан шöринын физкультура кузя инструкторöн. Сэки жö босьтчис нуöдны дзюдоöн вермасьöм кузя кружок. Сы мынта воöн шедöдiсны уна вермöм.
    2014 вося декабрын юрсиктын воссис выль ыджыд сад, и сэнi Надежда Владимировна кутiс велöдны физкультура, тшöтш вит арöсаясöс вермасьны дзюдоöн. Öттшöтш дзюдо босьтчис нуöдны «Олимпик» ёнмöдчанiнын медводдза класса велöдчысьяслы. Сы дорö нöшта котралöны 2-4 классаяс да кадетъяс. Волывлöны вежоннас куимысь: кыкысь ёнмöдчöны, а коймöдысьсö тренажёръяс вылö.
  • Челядьлöн воö сэтшöм арлыд, кор найö дугöдчылöны волыны ёнмöдчыны. Кутшöмкö кад мысти локтöны бöр. Ме некодöс ог бöрыньт. Пасйышта, мый ставöн, кодъяс котралöны ме дорö, велöдчöны бура. Бöрас ми накöд сэсся кутам йитöд, гижасям «Вконтактеын». Дзюдо вылын уджалам куснясьöм да нюжласьöм вылын, сдайтам ГТО-лысь урчитöмторъяс. Уналöн эм нин тайö пасыс. Ме дорö локтысьяслы колö гöгöрвоны, мый вермасны доймавны и колö лоны дасьöн, öд тайö спорт. Бать-мам тöдöны, кытчö сетöны кагасö. Дзюдо вермас отсавны олöмын, мортлы сетö ас вынъясö эс-кöм. Кужöны дорйыны асьсö, ёртсö да мукöдöс, — сёрнитiс Надежда Владимировна.
    Öнi том ань район пасьта сöмын öтнас нуöдö дзюдо. Водзтi нуöдiсны Помöсдiнын А.А.Глуханич да Пожöгын Н.Д.Лужиков. Александр Андреевич вöлi вонас кыкысь нуöдö ордйысьöмъяс, коркö пуктылiсны республикаса тшупöдö, сы вöсна мый спортсменъяс волiсны Сосногорскысь, Емваысь да мукöдлаысь. Надежда Владимировна казьтылiс, кыдзи сэтчö Кулöмдiнсянь нулiсны челядьсö кык автобусöн. Бöръяысь тайö вöлi 2012-öд воын. Сэнi олiсны кык лун чöж, Александр Андреевич петкöдлiс «Зумыд ош» вермасьöм, вöлi öтув ёнмöдчöм.
    Челядь оз сувтны, сöвмöны водзö. Паспомысь Иван Римский öкмысöд класс бöрын мунiс велöдчыны карö. Сэнi водзö вермасьö дзюдоöн. Кор волiс чужанiнас, Надежда Владимировналы отсасис нуöдны ордйысьöм. Сы дорö ветдлöдлö öти зонка, кодлöн мамыс коркö ачыс котралiс дзюдо вылö. Таысь ёна нимкодь.
    Ёнмöдчан паськöмыс шусьö кимоно. Эм унапöлöс вöнь. Медся бöръяыс сьöд. Сыöдз колö дыр да зiля уджавны. Сöмын на босьтчысьяслöн еджыд вöнь. Бура кö петкöдчасны, лоасны вермöмъяс, чукöртöны комиссия да петкöдлöны мыйö велалiсны, вочавидзöны юалöмъяс вылö. Видзöдöны налысь сямсö, вöчöны кывкöртöд, позьö-ö сетны кольквиж вöнь. Талун кежлö Надежда Владимировна дорö ветдлöдлöны татшöм вöньöн вит морт. Декабр помын вермасьöмъяс бöрын содiсны нöшта куимöн да кыкöн петiсны оранжевöй вылö. Сы бöрын босьтöны турунвижсö, но сiйöс шедöдны сьöкыдджык. Колö вермыны республикаса ордйысьöмын. Сэсся лöз. Надежда Владимировналöн сэтшöм. 2006 воын ань вермис дзюдо кузя ордйысьöмын да лоис Коми республикаса чемпионöн. Водзö коричневöй да дзик нин бöрас сьöд. Кыдзи шуö ань, пырöдчыны кö ёнмöдчöмö медводдза классянь да ветлöдлыны дугдывтöг, позьö босьтны сьöд вöнь 20 арöсын. Зонпосни кольквижöдз воöдчöны шöркодя куим воöн. Вöньяссö колö ёнмöдчигöн новлыны пыр.
    Выль во водзвылын Сыктывкарын мунiсны Кöдзыд пöльлöн козинъяс вылö дзюдо кузя ордйысьöмъяс. Петкöдчисны Емваысь, Сыктывкарысь, Сосногорскысь, Ухтаысь, Выльгортысь, Абъячойысь да Кулöмдiнысь, ставыс 150 гöгöр морт. Миян Кулöмдiнсаяс петкöдчисны бура.
    Надежда Владимировна семьянас ёртасьö спорткöд. Мам вылö видзöдöмöн сюртчöны и челядьыс. Илья пиыс сöмын на босьтчис дзюдоö. Нылыс ветлöдлö йöктыны. Петкöдчöны«Кросс наций», «Лыжня Россия» ордйысьöмъясын.
    Галина КЛЮЖЕВА.
    Снимок Надежда ПОПОВАЛÖН чукöртöмысь.

Комментарии:

Добавить комментарий

Свежий выпуск: 28 марта

Осторожно — мошенники!