Кулöмдiнысь Иван Ульныров тавося ноябр 27-öд лунö мунiс армияö. Кöсйис веськавны десант войскаö либö саридзса флотö. Кöсйöмыс збыльмис, босьтiсны Санкт-Петербургö саридзса флотö. 
Школа бура помалöм бöрын документъяс сетiс Ухтаса да Сыктывкарса университетъясö. Веськалiс кыкнанас, но бöрйис велöдчыны Сыктывкарын. Велöдчис геология кафедраын, сэсся гöрд дипломöн помалiс магистратура, экология да муöн вöдитчöм кузя кафедра. Бöръяас велöдчигöн нöшта на уджалiс геология институтын. Гожöмъяснас вöлi Воркутаса тундраын. Таво пырис аспирантураö да босьтiс отпуск, мед мунны армияö. 
— Пиöй ачыс кöсйис мунны армияö. Öнi сöмын колö ветлыны во кежлö, кадыс öдйö коляс. Иван шуö, мый позянлуныс олöмын лоö унджык. Дзолядырсянь ёртасис спорткöд. Нёльöд-витöд классянь заводитiс ветлöдлыны Елена Дмитриевна Кузнецова дорö, велöдчис туриставны. Некымынысь вöлiс «Том мездысь» лагерын, кодi медводз мунiс Ичöт Аныбын, сэсся Помöсдiнын. Быд гожöм кытчöкö ветлöдлiс. Пыр петкöдчис ориентирование да туризм кузя ордйысьöмъясын, аслас котырыскöд «Орлёнок» ворсöмын вермылiсны республикаын. Ветлiсны весиг Санкт-Петербургöдз. Велöдчис лыйсьыны, ворсiс футболысь. Батьыс кыйсьысь да дзолядырсянь Иванöс новлöдлiс сьöрсьыс, мый зонкалы ёна воис сьöлöм вылö. Ичöт-сянь радейтiс ветлöдлыны вöрö, 5-6-öд классъясын ёртыскöд вотчылiсны нин. Ме эска, мый пилöн ставыс лоас бур, а ми кутам виччысьны сылысь бергöдчöмсö,- висьталiс Валентина Олеговна мамыс. 
Галина Клюжева.