Сiйö гижлiс и пöся и ёся

[ A+ ] /[ A- ]


Дас куимыд — збыльысь шудтöм лыдпас. Буретш та мында во нин абу миянкöд Эдик. Тадзи асьсö ыдждöдлытöг йöз водзын висьтасьлiс Эдуард Алексеевич Тимушев. Поэт, писатель, журналист, сiйö колис джуджыд пас районлöн да республикалöн олöмын, ас войтырлöн сьöлöмъясын. Мортыслысь енбисö, аслыспöлöс лунсö донъялiгöн ставöн казьтылöны, кутшöм сiйö вöлi тöлка, сибыд, варов кыввора. Эз пов веськыда синмö шуны збыльсö. Тайö ёна отсалiс быдлунъя уджын — гижöмын.
Школасянь на кутiс топыд йитöдъяс вöвлöм «Ленин туйöд» газеткöд, а сэсся армия бöрас дзикöдз нин локтiс «Парма горöн» шусьысь редакцияö. Вöлi татчöс радиоын корреспондентöн, газетын воöдчылiс литсотрудниксянь юралысь редакторöс вежысьöдз. Кöть и эз помавлы институт ни университет, но бур писькöслун сетiсны бать-мамыс: Алексей Степанович, мича басняяс гижысь да Нина Дмитриевна — коми кыв велöдысь.
Районкаын уджалöмкöд тшöтш Эдик слöймывлiс йöзöдчыны республикаса радиоын, «Коми му» газетын, став коми журналын. Бöрынджык лэдзис ассьыс небöгъяс. Водзтi Россияса гижысьяс котырö пыртöдз быть мед вöлi куим книга. Э.Тимушевлöн висьтъяса «Гу» да «Крест» нимаяс петiсны Кулöмдiнса типографияын ас тшöт весьтас. Коймöдыс, кывбуръяса — Сыктывкарын нин. Юркарын писательяс Союзö примитiгöн Эдиклысь юалiсны: «Кытысь тэ босьтан гижöдъясыдлы сюрöссö, геройяссö?» А юалысьнас вöлi коми литератураын яръюгыд кодзувъясысь öти — Геннадий Анатольевич Юшков. Эдуард кывъясысла зептас эз пыр: «А кытысь нö? Олöмсьыс!» Но Москваын мыйлакö вель на дыр мöжгисны Россияса гижысь котырö примитöмнас.
Та бöрын том автор босьтчис радейтана уджас нöшта на ярджыка кывкутöмöнджык. А районса газетад уджыс «гöгрöс»: öтитор на он помав, мöд мог нин виччысьö. Шмоньсорöн «пыдöстöм пельсаöн» тай и шуöны газеттö. Эдиклöн уджа-лiгкостi миянлы мойвиис волыны Эжва йывса быд пельöсö, шуам, Югыдтыдорö, Канаваö, Вöлльö, талун эндöм ылi грездö. Кытчöкö подöн, кытчöкö вöлöн либö моторкаöн. Помнитсьö, Дзолльö ветлöм бöрын сiйö вайис змейяс йылысь лыддяна материал, гижöдыс шусис «Вужля улын вижля». Некод тадзсö пыдiсянь эз гижлы Комиын змейяс йылысь (вижляяс). Шогмана туйяс эз вöвны да, машинаяс ылöсö эз письтны, «Ан-2» самолётъяс лэбалiсны вежоннас öтчыд. А редактор, и дерт жö, лыддьысьысьяс корöны выльысь-выль вöрзьöдана гижöд. Со и збыльмöдiсны сэкся журналистъяс тöдса коми шусьöг: «Кöинтö кокыс вердö».
Буретш татшöм командировкаясын Эдуард Тимушев сöвмис эз сöмын кыдзи журналист, но и кыдзи писатель. Öд кузь туяд аддзысьлан сы мында йöзкöд, тöдмалан сы мында выльтор. Мед вöчны интервью либö репортаж костын художествоа гижöд, колiс корсьны лов ыззьöдан лöсялана кадколаст. Эдик та вылö медсясö торйöдлiс кузь войяс. Шулывлiс, висьт-кывбуръясыдлы пö колö сетны став нöгыльсö, а кольöм лöзйöвваыс туяс öти лунся газетыдлы. Ыджыд литератураыдлы пö миянсянь колöны ыджыд жö пластъяс. Шуам, повесьт либö роман. Йöзыд найöс оз сотны ломтас пыдди. Збыльысь, повесьтъясыс сылöн кутiсны нин артмыны, ырыштчылiс и роман вылö. Но…
Медбура позьö донъявны морттö сыкöд пуд сов сёйöм, либö сылöн виччысьтöг мунöм бöрын. Кыдзи жö оз тырмы öнi Эдик матыссаясыслы да тöдсаясыслы. А босьтны кö паськыдджыка — и ставнас Коми мулы. Мыйта на эськö вöчис шань пиыс аслас чужанiнлы. Мыйта на радлун эськö вайис муса гöтырыслы да ныв-пиыслы. Да Енмыдлы тай колö жö, вöлöм, татшöм бур быдтасыд.
Вячеслав Бабин.
Снимок вылын: Кулöмдiнын «Войпук» нима лыддьысьöмъяс дырйи Э.А.Тимушев
да тайöс гижысь, 1987 во.

Комментарии:

Добавить комментарий

Свежий выпуск: за 13 февраля