Велöдiсны-öлöдiсны челядь

[ A+ ] /[ A- ]

OLYMPUS DIGITAL CAMERA


Быд во ноябрлöн коймöд шойччан лунö страна пасьта казьтылöны туйвывса неминучаясын кулöмъясöс. Тайö тöдчана уджысь оз кольччыны челядьлысь енби сöвмöдан районса керкаысь том инспекторъяс. Кулöмдiнса шöр школаысь нёльöд класса велöдчысьяслы нуöдiм урок, кытчö волiсны Шöръягса школаысь З.А.Пахомова велöдысьлöн том инспекторъяс да бать-мам. Казьтылiм челядьöс, кодъяс туйвывса лоöмторйö веськалiсны да кулiсны миян районын. На пиысь кодъяскö мыжанас вöлiны асьныс, босьтiсны велосипед либö мопед да петiсны туй вылö, либö эз кутчысьны туй вылын урчитöмторъясö. Кодъяскö веськалiсны неминучаö бать-мамкöд машинаын мунiгöн.
Сэсся юрсиктса да шöръягса том инспекторъяс петалiм туйяс вылö. Миянкöд уджалiс ГИБДД-лöн районса юкöнысь инспекторъяслöн экипаж. Шы гораммöданторйöн шыöдчим и подаяс, и водительяс, и верстьö, и челядь дорö, мед ставныс пыдди пуктiсны правилöяс, ветлiсны лючки-бура. Быдöнлы козьналiм öлöдан-велöдан гижöдъяса буклетъяс. Челядьлысь енби сöвмöдан районса керкаысь жö М.Х.Пулатовалöн «Акварелька» котырысь нывкаяс да зонкаяс ас киöн бумагысь вöчисны анделъясöс, да найöс ми козьналiм водительяслы, мед туй вылын видзас неминучаысь.
Быд во лöсьöдам юöртан пöв. Сэтчö пуктам водительяслы, подаяслы, верстьöлы да зонпоснилы челядьсянь шыöдчöмъяс, корöмъяс, туйвывса правилöяс, кывбуръяс.
Туй вылö петалiм и мамъяслöн лунö. Колö пасйыны, мый буретш мамъяс медся бура кутчысьöны туй вылын урчитöмторъясö. Бара на сёрнитiм накöд, козьналiм ас киöн вöчöмторъяс.
Вера Потоцкая, челядьлысь енби сöвмöдан керкаын велöдысь.
Снимок Зинаида Пахомовалöн.

Комментарии:

Добавить комментарий

Свежий выпуск: за 17 сентября