«Афганлöн» йöлöга

[ A+ ] /[ A- ]


Февраль 15-öд лунö тырö 31 во, кыдзи сöветскöй войскаöс петкöдiсны 
Афганистанысь. Война мунiс матö дас во. Вöрöгкöд повтöг тышкасигöн ассьыс том олöмсö сетiс миян матö 15 сюрс салдат. Бырлас-ö коркö бать-мамлöн, матыссаясыслöн на вöсна дойыс, дыр-ö на сöдзтысяс миян олöмын «афганлöн» йöлöгаыс? 
Ручысь Афганистанö веськавлiс квайт морт. На лыдысь кык вок, Валерий Михайлович да Василий Михайлович Расовъяс. Öтиыс, Валерий Михайлович — водзджык. Сiйö школа помалöм бöрын велöдчис ДОСААФ-лöн радиошколаын, сы бöрын Сыктывкарса 26-öд номера профтехучилищеын босьтiс трактористлысь специальносьт. 1979-öд воын сiйö мунiс армияö, веськалiс пограничникъяслöн войскаö. Служитiс медводз Киргизстанын, сэсся Таджикистанын. Афганистанö 
нуисны 1980-öд вося августын. Вöлi Мургабын погран-отрядлöн мотоманёврнöй котырын лыйсьысьöн. Бöрсö йöз му вывсьыс петкöдiсны 1982-öд вося январын. Öнi нин казьтывлiс, мый служитiс Лянгарын, Сархадын, весиг Пакистанса граница вылын, но медся дыр — Барагизын туй видзан пост вылын. Юрас пыр вöлiны гортсаясыс, торйöн нин кык арöсöн ичöтджык Василий вокыс. Кевмысис ёна, мед сiйö нин кöть эз веськав татчö, Афганистанас. Но абу тай ставыс миян кöсйöм сайын: Василийöс службаыс вайöдiс ыджыд вокыслöн кок туйöд жö. 
Школа бöрын сiйö велöдчис Выльгортса мöдöд номера профтехучилищеын водительö да трактористö. Армияö босьтiсны 1981-öд воын, веськалiс погранвойскаö жö. Служитiс медводз Киргизстанын, сэсся вуджöдiсны Китай бердса граница вылö Чечекты заставаö. Афганистанын вöлi 1982-öд вося июльсянь 1983-öд вося январöдз Мургабын погран-отрядлöн мотоманёврнöй котырын, кöнi служитiс и вокыс. Радöвöй, пехоталы паныд водзсасьысь гранатомётчик кывкутöмöн олöмö пöртiс воинлысь мог. 
Кык вок паныдасьлiгöн тшöкыда казьтывлiсны Афганистанын служитöм йылысь: кыдзи веськавлiсны засадаö, öружиеöн киын вочаавлiсны-кыялiсны душманъяслысь караванъяс. Öтчыд войнас Василий Михайлович кыдзкö кольччис аслас ёртъяссьыс, тöдтöм йöз кытшалiсны сiйöс. Бур, мый миян салдатъяс удитiсны 
матыстчыны да дорйыны, эськö, код тöдас, кыдзи на ставыс помасис. Сэки быттьö пö чужи мöдысь. Сэнi поводдяыс абу миянын кодь небыд: войясыс ыркыдöсь, помтöг тöла, нöбöдö лыасö, гöгöр кытшалöны из кыртъяс. Пыр казьтывлiсны öтлаын служитысьяссö, налöн некор оз вун, кыдзи öта-мöднысö шулiсны «братöн». Тайö кывйын пö ставыс. 
Кыкнан вокыс бергöдчисны асланыс сиктö. Валерий Михайлович лöсьöдiс семья, Валентина Анатольевна гöтырыскöд быдтiсны куим челядьöс. Пыр уджалiс совхозын трактористöн. Öнi пенсия вылын. Василий Михайлович век жö мырсис совхозын. Олiс мамыскöд. Сiдз нин артмис, мый кувсис водз. Афганистанын мойвиис служитны и Керчомъяын чужлöм Иван Анатольевич Воробьёвлы, менам ичöт воклы. Школа бöрын велöдчис водительö. Дзолясянь 
ёртасис спорткöд, торйöн нин сьöлöм сертиыс вöлiны лыжиöн котралöм да баскетболысь ворсöм. Служитiс погранвойскаын, веськалiс Афганистанö. Вуджис сэнi став сьöкыдсö, но эз кöсйы казьтывны шог лоöмторъяс йывсьыс. Биа косьяса му вылысь гортас бергöдчис ловйöн, а танi кувсис лёк йöзлöн ки помысь. Со öд кутшöм олöмыс. 
Талун Ручын квайт воин-афганеч пиысь кыкöн — Николай Алексеевич Гуляев да Василий Михайлович Расов — абу нин ловъяöсь. А Михаил Дмитриевич Попов, Олег Александрович Холопов, Валерий Михайлович Расов да Александр Николаевич Юдин пыр на олöны асланыс сиктын. Став бурсö тiянлы, би да ва пыр мунöм повтöм салдатъяслы. 
Екатерина Ульныроваа. 
Руч.

Комментарии:

Добавить комментарий

Свежий выпуск: за 2 апреля