Афганистан йылысь Иван Михайлович висьтасьны оз радейт, да и абу уна сёрниа сиктса мортыс. Кыдзи ыджыд семьяын быдмöм уна зонка, школа помалöм бöрын велöдчис шоперö Сыктывкарын ДОСААФ-ын. 1980-öд вося майын призыв серти армияö веськалiс Красноярск крайö, Ужур карса автобатальонö, ветлöдлiс ЗИЛ автомашинаöн. 1980-öд вося октябрын часьтсьыс куим салдатöс мöдöдiсны Ташкентö. Сэтчö мунiгöн нин гöгöрвоисны, кытчö мунöны. Но присяга примитöма, эм приказ, сiдзкö, колис сöмын сiйöс пöртны олöмö. Ташкентса сборнöй пунктын вöлi чукöртöмаöсь Сöветскöй Союз пасьталаысь салдатъясöс. Олiсны сэнi дас лун: эз лыйсьыны ни дасьтысьны. Ташкентсянь границаöдз мунiсны поездöн, сэсся вертолётöн лэбисны Кундуз карöдз. Сэнi 
олiсны тöлысь, а сэсся вуджöдiсны Пулихумри карын сулалысь часьтö. Местаыс вöлi шыльыд, гöраяс танi эз вöвны. Комиысь часьтын некод эз паныдась. Иван КАМАЗ-öн новлiс сёян-юан, боеприпасъяс, веськавлiс и тышъясö. Афганистанын олысьясыс роч салдатъясöс пыдди пуктiсны, тöдiсны уна роч кыв, а мый эз кужны висьтавны, гöгöрвоöдлiсны кияс отсöгöн. Гортö письмöяс мöдöдлiсны прöстöй конвертöн, мамыслы Афганистанын служитöм йылысь юöртiс бöрынджык. Но мамтö он пöръяв, сiйö пыр кевмысис Енлы пиыс вöсна. 
1982-öд вося майын уна салдатöс петкöдiсны Афганистанысь, тшöтш и Иванöс. Вуджисны Союзö Термезса «ёртасян поскöд». А сэсся воис гортас, пырöдчис сиктса уджö. 
Талун Иван Михайлович Татьяна Анатольевна гöтырыскöд олöны Дiасёръяын, бергöдöны ассьыныс кöзяйство, отсасьöны челядь да внукъясныслы. Радейтö разьны кроссвордъяс. Бöръя кадас тшöкыда висьöдчö да, ньöти оз радейт казьтывны воюйтöмсö. 
Нина ШАТОХИНА. 
Снимок гижысьлöн.