Февраль 4-öд лунö миянöс чукöстiс олöмаяслöн Ручса котырöн веськöд-лысь А.И.Адамова. Шуис, мый Сыктывкарысь локтöны ас окотитöмöн отсасьысьяс, колö уджавны накöд . Вöлiм нёльöн: К.Г.Есева, М.А.Нестерова, А.И.Адамова да ме. Автобусöн локтiс 16 студент. И ми накöд разöдчим сиктö. Том йöз сьöлöмсянь весалiсны керка, пывсян вевтъяс вылысь, öшинь улысь лым, паськöдiсны туйяс, казьтылан пас дiнö пыранiнъяс. Уджалiгмоз сёрнитiм. Менам котырын вöлi Дзолльысь нывка, сiйö висьталiс, мый налöн отрядыс шусьö «Биармия». Юксис, мый уджалiсны сыöдз Дереваннöйын. Став олöмаыслы, кодлы отсасисны, 80 сайö арöс. Найö ёна и аттьöалiсны отсöгысь. Кодлы да кутшöм удж вöчны, висьталiс социальнöй уджалысь Зоя Михайловна Гуляева.
Волiсны и школаö. Ичöт класса велöдчысьясöс велöдiсны вöчны ас киöн мичаторъяс. Гырысь класса ныв-зонлы висьталiсны, кытчö позьö мунны велöдчыны водзö. Велöдчысьяскöд ворсiсны волейболысь да баскетболысь. Ёна снимайтiсны, унатор юасисны сиктса олöм йылысь. Нывкаяс да зонкаяс унатор аслыныслы босьтiсны локтысьяссянь, гашкö, бур вöчöмыс пансяс том йöзлöн волöмсянь. Кар-ын велöдчысьяс шуисны, мый гежöд сиктын позьö аддзыны, мед вöлi нёль пас: усьöм воинъяслы, тылса уджалысьяслы, стелла, С.С.Есевлы казьтылан пöв, кодöс пуктылiм кык во сайын герой-снайперлы 100 во тыригкежлö. Кор сёрнитiс библиотекаса уджалысь Н.А.Митлякова, том йöз сулалiсны шы ни тöв. Сэки жö олöма ань Л.В.Расова висьталiс, мый 11 арöссянь колис батьтöг, кодi вошлöма Карелияса фронт вылын, лоис пыкны став сьöкыдлунсö. Анна Ильинична сиис, мед том йöз пыр вöлiны татшöм шаньöн, зiльöн, олöмаяс вöсна тöждысьысьясöн.
А рытнас том йöз гажöдiсны школаын. Гажсö сиисны шудлы. Тайö лун йывсьыс сёрнитiгöн казьтыштiм, кыдзи ас окотитöмöн отсасьысьяс котралiсны зыръясöн. Туй пасьталаыс панласисны, сы мынта серамыс да гажыс вöлi.
Екатерина УЛЬНЫРОВА.