Татьяна Шаховалы 14 арöс, велöдчö Пожöгса шöр школаын 8 классын. Ичöт арлыд вылö видзöдтöг, сылöн лыжиöн котралöм кузя медводдза разряд, пырö республикаса öтувъя котырö. Ныв медводдзаысь лыжи вылö сувтiс 6 арöсöн. А котравны босьтчис сöмын куим во сайын.
— Спортын вермöмъяс шедöдöмын зэв ыджыд пай тренер Владимир Степанович Мингалёвлöн, — висьталiс Татьяна. — Куим во сайын сiйö босьтчис велöдны менö котравны лыжиöн. Ачым эськö татшöм дженьыдик кадöн медводдза разрядтö эг босьт. Лыжи база восьтöм бöрын тренируйтчыны лоис нöшта бурджык. Меным сэтчöдз гортсянь зэв матын.
Татьяналöн эм нин 17 медаль, уна диплом. Пырöдчылiс районса, республикаса да весиг Россияса тшупöда ордйысьöмъясö да шедöдлiс приза местаяс. Сiдз, Первоуральскын 130 спортсмен пиын сiйö лоис 23-öдöн.
Татьяна Шахова водзö кöсйö шедöдны спортын вермöмъяс. Но медся ыджыд кöсйöм — лоны мамыс моз бурдöдысьöн.