«Петербургса политика» фонд вылö донъялiс Коми республикаöс да сыöн веськöдлысь В.Гайзерöс. Сiдз, Коми лоис зумыда кутчысьысь регионъяс пиысь öтиöн. Республикаöс вылö донъялöм ошкисны политикъяс, общественнöй котыръяс, пыдди пуктана йöз.
Со мый висьталiс районса юралысь Д.А.Шатохин:
«Республикаса юралысь ыджыд тöдчанлун сетö сиктъяс сöвмöдöмлы: кыпалöны школаяс, садъяс, дзоньтавсьöны туйяс, ёнмö бурдöданiнъяслöн материальнöй да техническöй подув. Республикаын сöвмö ичöт предпринимательство. Позьö пасйыны нöшта öти буртор: томъясöс ышöдöм. Республикаын вöчсьö став позянаыс, мед том специалистъяс локтiсны уджавны сиктъясö. Мунö ыджыд удж, медым сöвмöдны коми кыв да культура. Оз коль бокö аслас тöждъясöн да могъясöн семья. Зэв бур, мый республикаын кутас сöвмыны туризм, öд та отсöгöн позьö кыпöдны Комилысь тöдчанлунсö Российскöй Федерация тшупöдын.
Ме донъяла Вячеслав Михайловичöс, кыдзи вежöра политикöс, код водзын ясыд могъяс, и эска, мый сылöн веськöдлöм улын республика бура сöвмас и водзö».
Республикаöс вылö донъялöм кузя аслас мöвпъясöн юксис райсöветса депутат А.И.Кулясов: «Бöръя воясö позьö казявны ыджыд вежсьöмъяс республикалöн социальнöй юкöнын: кыпалöны выль школаяс, садъяс. Уна сьöм вичмöдöны и туйяс вужвыйöн дзоньталöм да выльысь вöчöм вылö. Тайöс ставсö позьö казявны и миян районысь. Но республикаса юралысьлöн да правительстволöн водзö вылö могъяс ыджыдöсь. Водзынджык нин вöчлiсны сиктъясö газ вайöдöм кузя балаяс, но мыйлакö найöс «кынтiсны», и делöыс некодарö оз вöрзьы. Чайта да, В.Гайзер вермас разьны тайö гöрöдсö.
Вячеслав Михайловичöс ме тöда важысянь нин, кор сiйö вöлi республикаса финансъяс министрöн. Ме серти, сiйö мывкыд, вежöра, сюсь, водзмöстчысь, республика вöсна тöждысьысь веськöдлысь».
Лидия ЛИПИНА.