Пытшкöсса делöяс министерстволöн районса юкöнын 115 уджалысьысь 29-ыс аньЯС. Мичаöсь да авъяöсь, мелiöсь да шаньöсь, керка пытшкын шоныд кутысьяс, а удж вылын пöрадок видзысьяс. Налы некутшöм кокньöд абу. Айловкöд радын уджалöны лун и вой, весиг шойччан да ГАЖ лунъясö. Видзöны-öлöдöны олысьясöс оланпас торкöмысь, повтöг петöны ылi туйö, мед туявны мыж вöчöм, ёртасьöны спорткöд да с.в.
Наталья Викторовна Касева 20 во нин кывкутана удж вылын. Пытшкöсса делöяс министерстволöн район юкöнса штабын, веськöдланiнын, старшöй инспектор. Пасъялö, кымын уголовнöй мыж вöчöма районын, содö али чинö, ставсö туялö, вöчö кывкöртöд полицияса сотрудникъяслöн уджлы. Мукöд погона йöзкöд полицияса майор петавлö видзны пöрадок уличьяс вылö, дежуритлö. Сёр рытöдз уджалö и гортас.
-Удж зэв кывкутана да сьöлöм серти. Ни öтчыдысь юрö эз волы мöвп, Мый колö сiйöс вежны, — висьталiс Н.В.Касева.
Овлö, мый суткиясöн удж вылын и участокса уполномоченнöй Светлана Викторовна Воробьёва. Сiйö кывкутö пöрадок вöсна Носимын да Паспомын. Нöшта сылöн дöзьöр улын сьöкыд мыж вöчöмысь пукавлöм йöз. Следовательяслöн да оперативникъяслöн котыркöд тшöкыда петавлö туйö, кор полициялöн дежуритан юкöнö воö кутшöмкö лоöмтор йылысь юöр. Оз элясь, кöть удж юрвывтыр. Позьö шуны, мый участокса уполномоченнöй вöчö полициялöн став юкöнлысь удж, кор мунö туявны либö эрдöдны мыж вöчöм. Отсöгöн локтö быд шыöдчысь дорö. Сiйö абу мыждысь, а отсасьысь да дорйысь, сiйö и психолог, и юрист, и велöдысь, и öлöдысь.
Со татшöм авъя аньяс уджалöны полицияын.
Марина ДАДАШОВА.
Авторлöн снимокъяс вылын: Н.В.Касева; С.В.Воробьёва.