Февраль 21-öд лунö Сыктывкарын «Октябр» шойччан да кино видзöдан шöринын мунiс полицияын уджалысьяслöн, ведомствоысь ветеранъяслöн «В службе-честь!» фестиваль. Сiйö мунiс витöдысь нин, таво сиисны Победасянь 75-öд вося тшупöда паслы. Гажсö сiдз жö йитiсны культураын уджалысьяслöн лункöд. Енбисö петкöдлiсны республикаса каръясысь да районъясысь воöм комынысь унджык морт, на лыдын вöлi и «Июль» котырысь Людмила Яснецова. Жюри да видзöдысьяс донъялiсны петкöдчöмъяссö некымын туйвизьын: «Öткöн сьылöм», «Авторлöн сьыланкыв», «Кыкöн сьылöм да ансамбльяс», «Сöвмöдана корсьöм да кыпыд ру вöсна!», «Победалöн сьыланкыв». Жюрилöн уджöн веськöдлiс Коми республикаса искусствоын пыдди пуктана уджалысь, продюсер, сьылысьясöс да актёръясöс велöдысь, режиссёр, артист, Изабелла Юрьева сьылысь нима войтыркостса конкурсын лауреат, «Классика да современность» культуралöн войтыркостса фондöн веськöдлысь Владимир Юрковский, сiдзжö вöлiны республикаын мукöд нималана йöз.

Февраль 25-öд лунö республикаса юралысьлöн администрацияын донъялiсны «Йöзкостса бюджет» бала серти таво збыльмöдан йöзöн вöзйöмторъяс. Миян районысь бöрйисны 15 бала, найöс пöртасны олöмö «Югыдъяг», «Пожöг», «Руч», «Дiасёръя», «Дереваннöй», «Парч», «Дон», «Куж», «Зимстан», «Помöсдiн», «Кулöмдiн» овмöдчöминъясын. Уджъяс вылö урчитiсны 10,2 миллион шайт. Смолянкаын вöчасны челядьлы ворсанiн, Дiасёръяын да Пожöгдiнын бурмöдасны шойна да гöгöрсö, Дереваннöйын — парк, Аныбын, Парчын да Лебежнöйын вежасны Великöй Отечественнöй война вылын усьöмаяслы казьтылан пас да лöсьöдасны гöгöрыс, Озъягын нюжöдасны ва визь, Шöръягса да Кулöмдiнса школаясын дзоньталасны вевт да джодж, джодж вежасны Кужса культура керкаын, Зимстанса клубын вöчасны асмогасянiн, «Помöсдiн» кооператив босьтас оборудование, Кулöмдiнын асшöр уджалысь ньöбас кулöмаясöс новлöдлыны машина, юрсикт-ын жö вольсаласны моски, Вомынбöжын бурмöдасны туй юкöн, кодъясны пöлöнсö. 

Донса социокультурнöй шöринын кружокъяс нуöдысь да гажъяс котыртысь Ольга Николаевна Тимушевалöн да Тамара Петровна Напалковалöн мича сьылöмöн пансис «Ноко, мамъяс!» кыпыд конкурс. Республикаса юралысьлöн общественнöй примитанiнысь районса службаöн веськöдлысь Антонина Анатольевна Кузнецова да Донса юралысь Александр Степанович Нехорошев чолöмалiсны мамъясöс, чойясöс, радейтанаясöс мича тувсовъя праздникöн да сиисны дзоньвидзалун, шуд да мед збыльмис став кöсйöмыс. Гаж вылын Анна Степановна Липиналы, вöвлöм велöдысьлы да тылса уджалысьлы, сетiсны Победа лунсянь 75-öд вося тшупöда паслы сиöм медаль. Анна Степановна аттьöалiс козьналöм дзоридзьясысь да медальысь.