Донса социокультурнöй шöринын кружокъяс нуöдысь да гажъяс котыртысь Ольга Николаевна Тимушевалöн да Тамара Петровна Напалковалöн мича сьылöмöн пансис «Ноко, мамъяс!» кыпыд конкурс. Республикаса юралысьлöн общественнöй примитанiнысь районса службаöн веськöдлысь Антонина Анатольевна Кузнецова да Донса юралысь Александр Степанович Нехорошев чолöмалiсны мамъясöс, чойясöс, радейтанаясöс мича тувсовъя праздникöн да сиисны дзоньвидзалун, шуд да мед збыльмис став кöсйöмыс. Гаж вылын Анна Степановна Липиналы, вöвлöм велöдысьлы да тылса уджалысьлы, сетiсны Победа лунсянь 75-öд вося тшупöда паслы сиöм медаль. Анна Степановна аттьöалiс козьналöм дзоридзьясысь да медальысь.
«Ноко, мамъяс!» конкурсö пырöдчисны челядьныскöд куим ань: Дарья нылыскöд садйын воспитательница Мария Вячеславовна Тимушева, Наталья да Раиса нывъясыскöд «Шоныд сетан Коми компаниялöн» Кулöмдiнса юкöнысь контролёр Алёна Алексеевна Тимушева, Никита пиыскöд да Виолетта нылыскöд садйын воспитательница Анна Викторовна Гутьяр. Том аньяс челядьныскöд öтвылысь «Помав шусьöгъяс» юкöнын петкöдлiсны тэрыблунсö да стöча висьталöмсö, «Лöньöд бöрдысь кагаöс» петкöдчöмын аканьлы сьылiсны потандорса сьыланкывъяс да шуалiсны лелькуйтана кывъяс, «Мелi кывъясын» челядь висьталiсны мамъяслы радейтана кывъяс, «Мойдса геройлöн паськöмын» поснияс петкöдчисны гортын водзвыв дасьтöм паськöмöн. «Творчество» юкöнын висьталiсны кывбуръяс да сьылiсны гитара улын, весиг блинъясöн чöсмöдлiсны видзöдысьясöс, «Радейтана сёянын» петкöдлiсны пусянпöжасян сямсö: вöчöмöсь салат, пöжалöмаöсь торт, черинянь, вöтöса пирöг, «Кагалöн висьталöмын» мамъяс висьталiсны мый йылысь кö, а челядьныс тöдмалiсны. Мамъяслысь да челядьлысь кужанлунсö донъялiс стрöг жюри, а сiдзжö видзöдысьяс жетонъясöн бöрйисны медъёна сьöлöм вылас воöм петкöдчысьясöс.
Конкурс мунiгмозыс видзöдысьясöс гажöдiсны енбиа сьылысьяс да йöктысьяс: гажаа сьылiс «Донские зори» котыр, мичаа йöктiсны челядьлöн да аньяслöн котыръяс, сьылiсны Анна Попова да Артур Гарнов. Нöшта Светлана Александровна Тимушева видзöдысьяскöд нуöдiс мойдъяс йылысь ворсöм да мукöдтор.
Конкурс помасьöм бöрын жюри висьталiс, мый ставныс петкöдчисны сэтшöм бура да сьöкыд бöрйыны кодöскö торйöн, аттьöалiсны водзвыв бура дасьтысьöмысь, повтöмлунысь да тöдчöдiсны, мый нывбабалöн тöждысьöмöн, зiльлунöн кутчысьö олöмыс. Видзöдысьяслöн шуöм серти, Мария Вячеславовна Тимушева лоис медбурöн.
Видзöдысьяслы зэв ёна воис сьöлöм выланыс гажыс да вöзйисны нуöдны «Ноко, мамъяс!» конкурссö быд во.
Нина Калистратова. Снимок интернетысь.