Февраль 25-öд лунö республикаса юралысьлöн администрацияын донъялiсны «Йöзкостса бюджет» бала серти таво збыльмöдан йöзöн вöзйöмторъяс. Миян районысь бöрйисны 15 бала, найöс пöртасны олöмö «Югыдъяг», «Пожöг», «Руч», «Дiасёръя», «Дереваннöй», «Парч», «Дон», «Куж», «Зимстан», «Помöсдiн», «Кулöмдiн» овмöдчöминъясын. Уджъяс вылö урчитiсны 10,2 миллион шайт. Смолянкаын вöчасны челядьлы ворсанiн, Дiасёръяын да Пожöгдiнын бурмöдасны шойна да гöгöрсö, Дереваннöйын — парк, Аныбын, Парчын да Лебежнöйын вежасны Великöй Отечественнöй война вылын усьöмаяслы казьтылан пас да лöсьöдасны гöгöрыс, Озъягын нюжöдасны ва визь, Шöръягса да Кулöмдiнса школаясын дзоньталасны вевт да джодж, джодж вежасны Кужса культура керкаын, Зимстанса клубын вöчасны асмогасянiн, «Помöсдiн» кооператив босьтас оборудование, Кулöмдiнын асшöр уджалысь ньöбас кулöмаясöс новлöдлыны машина, юрсикт-ын жö вольсаласны моски, Вомынбöжын бурмöдасны туй юкöн, кодъясны пöлöнсö. 
Пасъям, республикаса юралысь Сергей Анатольевич Гапликов «Йöзкостса бюд-жет» бала вöзйис 2016-öд воын. Уджтасъясыс олöмö пöртсьöны культураын, физкультура да спортын, уджöн могмöдöмын, велöдöмын, видз-му овмöсын, туй вöчöмын, этнокультура юкöнын. Миян район пырöдчис тайö уджас 2017-öд восянь. Тайö кадöн видзисны 19,4 миллион шайт, олöмö пöртiсны 46 бала, таво босьтöмöн артмö 61 бала 29,6 миллион вылö. 
Талун республикаса кар-районъясын видлалöны да бöрйöны локтан во кежлö балаяс. 
Йöзкостса бюджет сетö быд олысьлы олöм бурмöдöм-сöвмöдöм могысь бюджетса сьöм юклöмö пырöдчыны позянлун. Быд морт вермас тöдмавны аслас овмöдчöминса администрацияысь, кор да кöнi чукöртчыласны бöрйыны да видлавны сиктлы либö посёлоклы тöдчана да колана балаяс. 
Кирилл Попов, 
районса администрацияысь социальнöй туйвизь юкöнын медшöр эксперт.