Челядьлы шылад велöдан Кулöмдiнса школа топыд йитöд кутö Сыктывкарса искусство колледжкöд. Неважöн колледжса велöдчысьяс Кулöмдiнын петкöдлiсны фортепиано, домра да балалайкаöн ворсан сям. Волiсны быдпöлöс конкурсъясын вермысь 1-4 курсын велöдчысьяс: Юрий Вакулов, Алина Туркина, Катерина Харченко, Владислав Калистратов, Полина Хлопотных, Анастасия Ушурелу, Татьяна Блинкова да Марина Оплеснина. Юрнуöдiсны колледжса велöдысь И.И.Мецгер да «фортепиано» юкöнöн веськöдлысь С.И.Карманова. Ворсiсны Ыдж-ыд Вермöмлöн 75 во тырöмлы сиöм шыладъяс, бöрйöмаöсь гöгöрвоанаяссö ныв-зонлы. Тайö Ф.Шопенлöн «Полонез», К.Чернилöн «Этюд», Л.Бетховенлöн «Соната» да война кадö балалайкаöн да домраöн ворсöм вылö лöсьöдöм сьыланкывъяс. Кывзiсны найöс сöмын школаса велöдчысьяс да некымын пöч — нелямын кымын морт. Найö пасйисны, мый тöдмалiсны уна выльтор, босьтiсны аслыныслы тöд вылö, окота лои тшöтш велöдны татшöм произведениеяс да велöдчыны ворсны домраöн да балалайкаöн.
С.И.Кармановалöн кывъяс серти, колледжын велöдöны инструментъяс лöсьöдöмö, инструментоведение, дирижируйтöмö да с.в. Республикаын ёна оз тырмыны пианистъяс. Тайö уджаланногсö босьтысьяслöн пыр лоас удж. Колледж помалöм бöрын ныв-зон вермöны водзö велöдчыны институтъясын. А сэсся мунöны уджавны театръясö, школа-садъясö. И.И. Мецгер пасйис, мый инструментъясöн ворсöм сöвмöдö зiльлун, том войтырлысь öдйöджык сöвмöдö юрвем.
Галина КЛЮЖЕВА.
Сигуте Антанолöнснимок вылын:колледжса велöдчысьяс.
Редакциясянь содтам: татшöм петкöдчылöмыс, дерт, зэв колана быдмысь войтырлы. Сöмын тай этшаöн тöдлiсны сы йылысь. Юöрыс некытöн эз вöв, да и петкöдчыны позис культура керкалöн жыръясын либö школаын.