Июнь 25 лунö Кулöмдiнысь Мария Петровна Липина пасйис 90 арöс тырöм. Чолöмавны волiсны матыссаяс и велöдчысьяс, öд сiйö челядькöд уджалiс 37 во. Сыктывкарса учительскöй институт помалöм бöрын велöдiс Мысса да Керчомъяса школаясын, вöлi Кулöмдiнса челядь керкаын воспитательöн. Меддыр уджалiс Кулöмдiнса школаын. Ичöт классъясса зонпоснилы вöлi мöд мамöн: кужис ышöдны и бурöдны найöс, быдöнлы аддзис колана кыв. Велöдчысьяс, кöть колис уна во, пыр волöны видлыны сiйöс. Челядькöд уна вося бур уджысь сетiсны РСФСР-лöн народнöй просвещениеса отличниклысь ним, «Уджвывса ветеран» да юбилейнöй медальяс. Районса администрацияöн веськöдлысьöс вежысь Н.А.Левченко чолöмалiс Мария Петровнаöс юбилейöн да сетiс Россияса президентлысь чолöмалан гижöд да козин. Шоныд кывъяс висьталiсны и ветеранъяслöн райсöветса юралысьöс вежысь П.В.Лодыгина да ветеранъяслöн Кулöмдiнса котырöн веськöдлысь В.П.Нестеренко.

Галина НЕСТЕРОВА.

Авторлöн снимокъяс вылын: М.П.Липина вöвлöм велöдчысьяскöд.