Корсьысьöмöн, воча мунöмöн
«Парма гор» газет йöзöдлiс юасьöмъяс, кыдзи лыддьысьысьяс донъялöны районса газет, мый, налöн видзöдлас вылö, колö вежны, кутшöм выльторъяс пыртны, мыйöн найö вермасны отсавны асьныс.
Вочавидзысьяс пöвстысь унджыкыс ыджыд арлыда нин йöз, олöны кыдзи сиктъясын, сiдзи и посёлокъясын. Судзöдöны газетнымöс дыр нин ? 40-50 во. Вöлiны татшöм вочакывъяс: «Судзöда нэм чöж», «Судзöда асшöр олöм вылö петöмсянь», «Бать-мам век судзöдiсны да босьтчи лыддьыны дзолясянь. Öнi судзöда ачым, судзöдны кута век».
Вöлi юалöм, мый медся ёна воö сьöлöм вылö, и вочакывйыс воис унапöлöс, öд быдöнлöн аслас вежöр да интерес. Öтияс лыддьöны, мый медся интереснöйöсь кывбуръяс да висьтъяс, мöдъяс ? бур йöз йылысь висьтъяс, коймöдъяс ? асланыс лыддьысьысьяслöн «Миянлы гижöны» рубрика улын гижöдъяс, нёльöдъяслы медся интереснöйöсь выльторъяс да с.в. Кодсюрö гижисны, мый сьöлöм выланыс воö ставыс, но тадзи, дерт, лоны оз вермы. Вывтi окшöмыс, ме думысь, оз лöсяв, сы вöсна мый унатор на колö выльмöдны да бурмöдны.
Тайöс тöдчöдiсны жö вочавидзысьяс. Вайöда, нимсö висьтавтöг, öти вочавидзысьлысь татшöм пасйöдъяс: «Меным сьöлöм вылö воöны збыльсö петкöдлан гижöдъяс, но сэтшöмъясыс этшаöсь. Корреспондентъяслöн йöз йылысь гижöдъяс öткодьöсь. Юасьöны став олöм йылысь, гижöны биография, мортсö некодар боксянь оз восьтны. Миянлы тайö колö? Öти бала вылö ставсö зэвтны оз ков. Сэсся мöд тырмытöмтор — став мыжсö вештöны чина йöз вылö. Районса администрацияöн веськöдлысьöс вежысь И.В.Попов петiс отпускö, и пыр жö кынмис ва. Иван Владимирович шонтö васö али мый?»
Лыддьысьысьяс жö пасйисны, мый сьöлöм выланыс оз во, кор гижöдъяс петöны посни шыпасъясöн, торйöн кö, районса администрациялöн урчитöмторъяс, районса бöрйысян комиссиялöн кывкöртöдъяс, реклама да с.в.
Анкеталöн юалöмъяс вылö вочавидзысьяс лыддьöны коланаöн ёнджык гижны олöмын падмöгъяс йылысь, найö торйöн тöдчöдöны сиктлысь гöрöдъяс. Вöзйöмъяс лыдын татшöмъяс: «Пыдiсяньджык гижöй сиктъяс йылысь, кöнi олöм кутчысьö кыйсьöм-вотчöм, град йöр вöдитöм да скöт видзöм помысь. Ёнджык гижöй том йöз йылысь, тöдчöдöй, мый налы абу удж, да мед сыöн могмöдöм кузя ёнджык уджалöны районöн веськöдлысьяс».
Быд вочавидзысь гижис, мый водзö вылö газетнымöс колö лэдзны комиöн. Комиöн и лэдзам. Татшöм кывкöртöдыс абу сöмын редакциялöн, но и районса администрациялöн да та йылысь öтиторсö дольны сэсся ог кутöй.
Виччысим, мый вöзъянторйыс, выльторйыс лоö унджык, но видзöдöмпырысь, тайö юкöнас лача кутанныд редакция вылö. Юöрта, мый мыйсюрö выльсö пыртiм нин. Медводз-кö, вежим логотипсö: газетлöн «Парма гор» ним петö выльногöн серпасалöмöн. Талун кежлö выльторйöн лоö и сiйö, мый босьтчим лэдзны «Сöвман туйöд» лисб бок, кöнi кутам гижны сы йылысь, мый вöчсьö йöзлысь олöм бурмöдöм, налысь корöмъяс пыдди пуктöм могысь. Тайö, дерт, оз висьтав сы йылысь, мый падмöгъяс да тырмытöмторъяс колясны казявтöг. Мöдарö, редакция водзын сулалö мог: петкöдлыны найöс пыдiсяньджык, тшöтш и индыны петан туйяс.
Миянкöд важысянь ёртасьысь А.А.Попов вöзйис лэдзны коми оласноглы сиöм лист бок. Коми йöзлöн чукöртчылiгöн шуисны, мый колö тöдмöдны и районса мукöд национальносьта йöзлöн оласногöн да культураöн. Мöвпыштам да кутам лэдзны и тайö туйвизьяса лист бокъяс.
Ноябр 27 лунö коми йöзлöн чукöртчылiгöн торйöн сёрнитiсны районын петан газетъяс да мукöд юöртан средствояс йылысь. Шуим öтувтчыны, босьтны öта-мöдлысь бурторъяс, медым гижöдъясöн тöдмасисны кыдз позьö унджык йöз. Та могысь жö урчитiм унджык гижöд петкöдны асланым сайтъяс вылö, могмöдны наöн «ВКонтакте», «Живой журнал» да мукöд электроннöй лист бокъяс.
Дерт, водзö колясны и сэтшöм гижöдъяс да лист бокъяс, кодъяс сьöлöм сертиыс лыддьысьысьяслы. Тайö семьялы сиöм «Олам-вылам», кывбуръяса да висьтъяса «Эжва», енлы эскысьяслы «Бур кыв», вöр-ва радейтысьяслы «Чибльöг», гортса овмöс кутысьяслы «Град йöр», быдсяма интереснöйторъяса «Шердын», томъяслы сиöм «Томлун», спорт юкöнса олöм петкöдлысь «Спорт» да мукöд лист бокъяс.
Газет водзö нуöдас районлöн олöмöн тöдмöдан туйвизь. Медшöрöн лоöны гижöдъяс, кодъяс петкöдлöны экономикаын выныштчöм, социальнöй юкöнын вежсьöмъяс, водзö мунан туй вылын кыдзи вермöмъяс, сiдзи и падмöгъяс.
Аттьöала газет судзöдысь став йöзöс сiйöс пыдди пуктöмысь да отсасьöмысь. Ёртасьысьясöс локтан воын чукöртлам редакцияö да паськыдджыка висьталам, мый вылын уджалам да кутшöм могъяс сувтöдам водзö.
Медым ышöдыштны, йöзöдам кык конкурс: öтисö медбур висьт, мöдсö морт йылысь медбур гижöд (очерк) вылö.
Регыд нин выль во. Сиа ставныдлы, мед сiйö лоис шудаöн!
Василий ЛОДЫГИН