«Час-пик» дырйи ыджыд каръясын тэрыб отсöг зэв дыр локтö ДТП артманiнö. 50 прочент доймалöмаыс тайö пöрйö кувсьö, а ловъяяслöн дзоньвидзалуныс – медводдза отсöг сайын, кодöс вермöны сетны водительяс да авариясö аддзылысьяс.

Мый колö вöчны авария дырйи?

Медводз колö гöгöрвоны, мый тiянлы грöзитö, да отсавны аварияö сюрöм войтырлы. Оз ков доймалöм мортöс кыскыны машинаысь, абу кö та вылö татшöм помкаяс:

— машинаын сылы кольччыны оз позь, сы вöсна мый транспорт вермас öзйыны либö усьны буждöминö,

— мортлы колö отсöг, но салонын отсавны нинöмöн он вермы.

Мортöс машина салонысь кыскигöн видзöдöй, медым не дойдавны ёнджыка, эн ёна сiйöс вöрöдöй: вермас лоны лёкджык. Торйöн тайö овлö, доймöма кö сюрса лы. ДТП дырйи тшöкыдджыка чегö сюрса лылöн сьылі юкöныс. Кыскан кö тадзи доймöм мортсö, сiйö вермас кувны.

Кыскины колö тэрмасьтöг, лайкыда. Бурджык, отсалас кö тiянлы некымын морт. Öти морт кутö юрсö, мöд – пельпомсö да тушаыслысь вылыс юкöнсö, коймöд – каджсö да кокъяссö. Нöшта на бурджык лоö, кокъяссö кö кутас нёльöд морт. Отсасьысьяс кö абуöсь, кыскöй мортсö ки кресталöмöн:

— кутöй мортлысь гырддза горувсö, киныдтö лэдзöй киняувтіыс,

— шуйга киöн кутöй веськыд гырддза горувсö, а веськыднас – шуйга гырддзагорувсö,

— кыскöй доймöмаöс ылöджык машинаысь,

— морт кö садьтöм, сьылісö кутöмöн бергöдöй сiйöс кынöм вылас.

Мортыс кö садьын, юалöй, кыдзи асьсö кылö, кыті доймö да висьö. Ачыс кö салонысь петны оз вермы, а тэрыб отсöг эз на во, сёрнитöй сыкöд, ышöдöй. Юрсö да сьылісö доймöмалысь эн-ö вöрöдöй.

Морт кö куйлö машинаяс ветлан инын, туй шöрын, кыскöй сiйöс бокö. Оз позь мортöс водтöдны мыш вылас, юрсö колö лэдзны боклань. Эн пöрччöдöй неминучаö сюрöмаöс, сійö вермас кынмыны да ёнджыка на висьмыны. Пасьсö кö пöрччыны быть колö, медводз мездöй дойтöминъяссö, сэсся зэв ньöжйöник – доймöминъяссö.

Биысь видзчысян служба да войтырöс доръян

республикаса управление.