Районса администрацияысь физкультура да спорт юкöнын уджалысь, а сiдзжö спорт шöринын ГТО-лысь урчитöмторъяс вöчигöн петкöдлысьяслысь вын-эбöс донъялан юкöнöн веськöдлысь Марина Владимировна Есевалöн олан гажыс — ыджыд семьяыс да сыкöд öтвылысь быдлаын, и олöмын и уджын, водзмöстчöм.

 Аслас уджысь кындзи Марина «Олимпик» ёнмöдчанiнын нуöдö фитнес, а прöст кадö гортас ловсö кыпöдö пöжасьöмöн. Кöть и ур моз бергалö-уджалö, медшöрыс сылöн — семья, тайö Александр верöсыс, Роман, Никита, Егор пияныс да Василиса нылыс.

 Есев гозъя тöдсаöсь школасяньыс нин, регыд öтлаын олöмыслы тырас 18 во. Кыкнанныс ыджыд семьяясысь, Александрлöн кык вок да чой, Мариналöн кык вок да кык чой, да век мöвпалісны, мый и налöн шуда позйын кутасны юргыны уна челядьлöн гöлöсъяс. И збыльмис кöсйöмныс.

 Марина школасянь ворсö волейбоысь да баскетболысь, верöсыс бöрйис пауэрлифтинг, радейтö кыйсьыны-вöравны. Роман пиныс велöдчö Сыктывкарса вöр промышленносьт техникумын. Кулöмдінса спорт школалöн быдтас, пырö футболысь ворсысьяслöн районса öтувъя котырö. Никита да Егор велöдчöны Кебанъёльса школаын, Василиса котралö садйö. Бать-мам вылö видзöдöмöн ставныс ёртасьöны спорткöд.

Марина Владимировнакöд он на кут прöстö овны — гортсаяссö пыр и ышöдас спорт ордйысьöмъяс вылад, нуöдлас вотчыны, велöдас пöжасьны. Со и таво, кор миян президент Россияын шуис Семьялöн воöн, Марина аслас котырыскöд петкöдчис «Семья — богатство Коми края» республикаса конкурслöн район тшупöдын. Конкурссö котыртіс удж, уджöн могмöдан да йöзöс социальнöя доръян министерство. Есевъяслöн семья район-ын лоис медся бурöн, петкöдчис и республикаын.
Сэнi донъялiсны куим туйвизьын. «В кругу любимых и родных» юкöнын тöдмöдiсны семьялöн традицияясöн, кыдзи путешествуйтöны да шойччöны öтув.

 «Семейный ужин» юкöнын «Юрган» телеканалса «Детали со вкусом» уджтасын веськыд эфирын пöжалiсны нектарин сьöмöса капкейкъяс да мичмöдiсны гöрд сэтöрöн. Роман, Егор да Никита вöчисны яблöг содтöмöн крабысь салат.

 — Артмис зэв чöскыд! — юксис Марина. — Челядькöд öдйö и велалiм миянöс кытшалысь снимайтан оборудование да уна йöз дорö, пöжасигöн да вöчасигöн эг нин казялöй найöс. Сентябр 16-öд лунö верманныд миянöс видзöдны телевизор пыр.

 «Семейный калейдоскоп» юкöнын петкöдчисны творческöй номеръясöн. Есевъяслöн семья дасьтіс баскетболысь ворсан мачьясöн синмö шыбитчана петкöдчöм.

 — Конкурсыс воис сьöлöм вылö. Майшасьыштiм камераяс водзас, но сэсся полöмыс бырис, творческöй номер дырйи полiм воштыны мач, яндысьыштiм йöктыны камера вылад, но ставыс колис кыпыда да бура! — татшöм ловшы колис Есевъяслöн челядьлы снимайтчан лун помланьыс.

 Арнас «Госуслуги» порталын кутам гöлöсуйтны республикаын медбур семья вöсна. А вермысьсö нимöдасны да пырöдчысьясöс чолöмаласны Сыктывкарын декабрын кыпыд чукöртчöм вылын семьялы во тупкигöн.
Сиам Есевъяслы экскыны да вермыны!
Никита Кирилловых.
Снимокъяс öтуввезйысь.