Михаил Анатольевич Шомысов матö 40 во нин вöр овмöсын. Лесничöйлы отсасьысьсянь быдмис медшöр лесничöй — Помöсдiнса лесничествоöн веськöдлысьöдз.

Чужис да быдмис вöр посёлокын, Вылыс Ярашъюын. Батьыскöд ёна гызмалiс парма, лесопунктын уджалiсны бать-мамыс, да и школа бöрын армияö мунтöдз ачыс зiлис сэнi жö пöрöдчысьлы отсасьысьöн. Архангельскса лесотехническöй институтö Михаил Анатольевичöс мöдöдiс Помöсдiнса лесхоз, сiйö жö вештiс студентлы стипендия, сэтчö и бергöдчис том специалист.

— Сэки директорнас вöлi Дмитрий Петрович Жевора. Вочаалiсны зэв пöся. Та мында вонад вöлi лесничöйлы отсасьысьöн, инженер-технологöн, медшöр лесничöйöн, медшöр охотоведöн (водзтi вöлi и татшöм должносьт), директорöн. Предприятиелöн нимыс вежласис, но могыс вöлi öти — сöстöма видзны вöр, видзöдны, мед вöр юкöнъяс кöртымалысьяс эз торкавны закон, кутчысисны вöрöн вöдитчöм, санитарнöй да биысь видзчысьöм кузя урчитöмторъясö, — сёрнитiс Михаил Анатольевч.

 Водзтi лесничествоын уджалысьяс весиг вöчавлiсны корöсь, вöлi и план, да инавлiсны öтувъя пывсянö. Примитлiсны и тшак, чукöртöмсö нулiсны Россияö. Асьныс пуктылiсны пуяс, пöрöдчылiсны. 2007-öд восянь унатор вежсис, да вöр юкöнъяс кöртымалысьяс пуктöны пуяс, лесничество видзöдö, мед найö кутчысисны вöр пöрöдöм кузя балаын урчитöмторъясö, сöстöмöн колисны пöрöдчанiнъяс. Лесничество сетö вöр юкöнъяс керка, пывсян да мукöд стрöйба кыпöдысьяслы да дзоньталысьяслы, торйöдö и пес вылö.

Михаил Анатольевичлöн Артём да Алексей пияныс мунiсны сылöн кок туйöд, помалiсны Сыктывкарса вöр институт, уджалiсны лесничествоын. Артём кыкысь вермылiс вöр овмöсын уджалысьяслöн республикаса конкурсын, сылысь нимсö пасйылiсны республикаын медбур уджалысьяслöн почёт пöв вылö. Талун пияныс уджалöны ас выланыс.

 Уна вося бур уджысь Михаил Анатольевичлы сетiсны «Почётный лесовод Республики Коми» ним, «За заслуги перед Республикой Коми» отличие пас, почёт грамотаяс. Кывкутысь морт водзмöстчö сиктса олöмын. Сiйö овмöдчöминса депутат, пырö сиктса сöветö, ворсö йöзкотса театрын.
Марина Дадашова.
Снимок Наталья Игнатовалöн.