Служитiс Калининградын

Быд мужичöй, кöть кöнi сiйö эз служитлы, сынöдса десант либö космическöй войскаясын, саридзвывса флотын, сiйö пыр казьтывлö салдаталан кад. Бергöдчылö мöвпъяснас, кадысь кадö чöвтлö синсö аслас дембель альбомö.

Кулöмдiнысь Руслан Алексеевич Попвасев оз вунöд служитан вояс. Школаын велöдчигöн кöсйис веськавны саридзса пехотаö. Збыльмис зонлöн кöсйöмыс. 2005-öд воын босьтiсны армияö, веськалiс Мурманск обласьтлöн Североморск кардорса Щукозеро посёлокö.

— Школаын кутчыси дзоньвидза оласногö, ёртаси спорткöд. Урокъяс бöрын ворсi волейбол, футбол да пызанвывса теннисысь. 9 класс бöрын карын велöдчи тракторист-машинистö. Сэки жö босьтi «В», «С» категорияяса водительлысь удостоверенньö. Армияö мунiгöн тöдi, мый ковмас кутчысьны дисциплинаö, велöдны устав. Урчитöм кад серти чеччыны, мыссьыны, сёйны, а медводз стöча вöчны приказ. Ме вöлi дась служитiгкежлö, эг пов сьöкыдлунъясысь, — сёрнитiс Руслан Алексеевич.

Велöдчöм да присяга примитöм бöрын Руслан веськалiс Калининградö. Сетiсны УРАЛ машина. Асыв-рыт новлöдлiс часьтса дежуритысьясöс караулъястi. Ачыс дзоньтавлiс жугалöмсö. Часьтса машинаяс сулалан-дзоньталанiнын офицеръяс торйöдiсны ичöтик жыр, кытчö салдатъяс чукöртiсны ас вöчöм гантельяс, вомöна тас да мукöдтор. Ёнмöдчан жырсö шуисны «Спорт городокöн». Сэнi и колляв-лiсны став прöст кадсö салдатъяс, песiсны вын-эбöс.

Руслан Алексеевичлы бура служитöмысь сетiсны «Лучший водитель», «Воин-спортсмен» да мукöд пасъяс. Гортö бергöдчис матросöн.
Армия бöрын велöдчис электрикö, пырис уджавны лунвыв электрическöй сетьяслöн районса юкöнö.

Аддзис муса нылöс — Татьяна Алексеевнаöс. Чужис Карина, кад кольöм бöрын — Алексей. Гозъя кыпöдöны керка. Спорткöд ёртасьны ышöдö и писö. Квайт арöса Лёшакöд гожöмнас котралöны, ветлöдлöны велосипедöн, тöлын исласьöны лыжиöн. Руслан Алексеевичлöн лов кыпöданторйыс — кыйсьöм-вöралöм. Уджъёртыскöд «Буранöн» тöвзьылöны вöрö.
Татьяна Чувьюрова.
Снимок Руслан Попвасевлöн.